Read lunyore YEREMIA 29 Bible Online

YEREMIA 29 - lunyore bible

YEREMIA 29

¹Ndali okhuhandika ebarwa khubesaalisi, nokhubaroobi, nokhubemeli babandu nende khubandu bosi aba Nebukadinesa yali nafumiye okhurula Yerusalemu okhutsia Babulonia.

²Ndali okhuhandika ebarwa olwa Yehoyakini, na mama uwe, nabakhongo batiyanga hango homuruchi, nabemeli ba Yuda nende Yerusalemu, ababaatsi nende abaruli bali nibamal'le okhuhilwa mubuhambe.

³Ndahelesia ebarwa yiyo Elasa omusiani wa Safani nende Gemaria omusiani wa Hilikia, abomuruchi Sedekia wa Yuda yali narumanga khumuruchi Nebukadinesa wa Babulonia. Ebarwa yiyo yaboola mbu,

⁴“OMWAMI Wokhunyala Biosi, Nyasaye wa Isiraeli, yabool'la abandu bosi abo MWAMI yali okhuhuchil'lwa babukulwe singa abasumba okhurula Yerusalemu okhutsia Babulonia mbu,

⁵‘Mwombokhe tsinyumba ma mumenyemwo. Muraake emikunda chienywe ma mulie ebikhulangamwo.

⁶Muteesie abakhasi ma mwibule abaana. Ma khandi mulekhe abaana benywe bateesie nohomba bateesibwe, kho nabo babe abanyala khuba nabaana. Okhwola mumetekhe okhuba abenji muratutuha tawe.

⁷Mutiye khulwo khuleera amalahi mumatookho kandaboola mutsiemwo singa abasumba. Musaaye khu ise nimubakobokhelanga, Sichila nibakhaba nemiandu, nenywe khandi Mwakhaba nemiandu.

⁸Ise, OMWAMI, Nyasaye wa Isiraeli muchetsiyianga mulekhe okhukaatwa nende abaroobi bamenya muinywe nohomba kata abandi bosi ababoolanga banyala okhurooba aketsanga. Murabukula obweyangu mu kamalooro kabwe tawe.

⁹Bamubool'langa akobubehi nibarumikhilanga eliira lianje. Ise sindabaruma tawe. Ise OMWAMI mal'le khuboola.’

¹⁰“OMWAMI yaboola mbu, ‘Emihika amakhumi kane nakataru chia Bababulonia nichihweye, namumanyie obwa ndamuyanza ma nambesie indakano yanje khulwo khumukalusia ingo.

¹¹Ise sienyene ndamanya akobuloosie bwanje khu inywe, ndaloosia okhumuhelesia emiandu, tawe okhumukhuya, ndaloosia okhuhesia kosi akamunaayanga khuba n'nako.

¹²Ma inywe mwakhalakaye khu ise. Mwakhetse okhusaaya khu ise ne nase ndakhamukalusie.

¹³Mwakhaarune, ne mwakhanyoole sichila mwakharune nende omwoyo kwosi.

¹⁴Yee, mboolanga mwakhaanyoole ne nase ndakhamukabusie mwiloba lienywe. Ndakhamubunjelesie okhurula mu buli sibala siosi nende okhurula habundu hosi handali khumusalania ma ndamukalusie musibala siandali okhumuhiniamwo nimutsia mubuhambe. Ise, OMWAMI mal'le okhuboola.’

¹⁵“Inywe muboolanga OMWAMI wamuhelesia abaroobi mu Babulonia.

¹⁶Hulile ako MWAMI aboolanga khu kabaruchi barukanga lihanga elia Daudi yarukanga nende khu kabandu be mwitookho yili, yako nokhuboola, aka bekho benywe abarayilwa n'nenywe mubuhambe.

¹⁷OMWAMI Wokhunyala Biosi yaboola mbu, ‘Ise nderanga lihe, inzala nende obulwaye khubo ne nambakhole okhuba singa amakhuyu akabola akarakhalibwa tawe.

¹⁸Nambalondel'le nelihe, inzala nende obulwaye ma abetsimbia tsiesibala bakhachenye okhusila khukabakhalole. Habundu hosi ha mbasalania, abandu bakhahuke nende okhuchenya khukaliba nikekholekhele khubo. Abandu bakhabatsekhel'le nende okhurumikhila eliira liabwe singa esilaamo.

¹⁹Yaka kakhekholekhe khubo sichila sibalonda amang'ana ka ndabarumilanga okhubir'ra mubaroobi, abarumikhili banje tawe. Bali okhusuula khukahuyiakhwo.

²⁰Inywe mwesi abandali khuhila mubuhambe mu Babulonia, hulile aka ise, OMWAMI mboolanga.’

²¹“OMWAMI Wokhunyala Biosi, Nyasaye wa Isiraeli, wal'loma khuka Ahabu omusiani wa Kolaya nende khu Sedekia omusiani wa Maaseya abamubool'langa akobubehi nibarumikhilanga eliira lilie. OMWAMI aboolanga nabare mumakhono komuruchi Nebukadinesa wa Babulonia, owa nober're imbeli wenywe.

²²Olwa abandu bahinibwa Yerusalemu nibahilwa Babulonia mubuhambe nabenyenje okhura esilaamo khumundu wosi, nababoolenje mbu, ‘Lekha OMWAMI akhukhol'le singa yakhol'la Sedekia nende Ahabu abomuruchi wa Babulonia yasamba nibali mwoyo!’

²³Yiku nikwo okwakhabe omunyakhano kwabwe sichila bali nesikha siokhukhola tsimbi tsimbibibi okhusila khandi baheya khandi nibaboola mang'ana kobubehi meliira lio MWAMI akaye arabalaka tawe. OMWAMI wamanya akabakhola ma niye omukobokheli wamang'ana mabi yako khubo OMWAMI umal'le khul'loma.”

²⁴Bool'la Shemaya okhurula Nehelamu mbu

²⁵kano niko ako MWAMI Wokhunyala Biosi, Nyasaye wa Isiraeli aboolanga. Orumanga etsibarwa etsiahandiikwa muliira lilio omwene khubandu bosi ba Yerusalemu nende khumwesaalisi Sefania omusiani wa Maaseya halala nokhubesaalisi bandi bosi. Mubarwa yiyio, wahandikila Sefania mbu:

²⁶“Sefania OMWAMI yakhwela okhuba Omwesaalisi musilenje sia Yehoyada, ne luno niwe Omwesaalisi Omukhongo mu Hekalu. Nomulimo kukwo okhulola mbu buli omundu wosi omulalu owekaatianga okhuba omuroobi ubohelwe muminyololo chiebichuma mwikosimwe.

²⁷Busina orakhola yaka khu Yeremia wa Anatsotsi, owal'lomelenje khubandu singa omuroobi?

²⁸Okhwola akaywe sichila yabool'la abandu mu Babulonia mbu nababe abasumba ebwene yiyo khulwo luhono olurambi, kho bombokhe tsinyumba ma bamenyemwo, baraake emikunda chiabwe, ma balie ebiababa nibaraakile.”

²⁹Omwesaalisi Sefania yaasomela ebarwa iyo

³⁰ma OMWAMI niyambool'la mbu:

³¹“Rumila abandu bosi abali mubuhambe amang'ana kano mbu: ‘Kano niko ako MWAMI aboolanga khu Shemaya owomwitaala lia Nehelamu. Khulwa mbu Shemaya wamuroobela amang'ana kata nikali Ise sindamuruma tawe, ma wachila nimusubila obubehi,

³²okhwola Ise OMWAMI namuhe esinyasio halala nabolwibulo lulwe. Siyakhabekhwoho kata mulala khubolwibulo tawe. Ye sinabe mwoyo khulwo khulola ebindu ebilahi ebia nzia khukhol'la abandu banje sichila yababool'la okhuufukula ise. Ise, OMWAMI mal'le khuboola.’ ”