Read lunyore YEREMIA 3 Bible Online

YEREMIA 3 - lunyore bible

YEREMIA 3

¹OMWAMI yaboola mbu, “Omundu niyakhakhunga omukhasi uwe, ma omukhasi uyo namulekha natesibwa nende omundu undi, omusaatsa wamukhunga uyo siakhamubukula omukhasi uyo khandi tawe. Yako kakhafwabia esibala okhusila. Nebutswa ibe Isiraeli wakhakhola obutamba nabasaatsa abenji, ne luno wenyanga okhukalukha khu ise khandi!

²Chinguula tsimonitsio ohenge khubutenje bwesikulu, alikhwoho habundu hosi ahorakhol'lakhwo obutamba? Walindil'langa abasaatsa bokhukhuyanzisia khutsindulo tsietsinjila, singa obwo Muharabu alindil'langa abokhwira musitsiimi. Wamala okhufwabia esibala nende obutamba bubwo.

³Niko akachila ifula niyikal'lwa okhukwa ne ifula yesubwe siyakwa tawe. Ibe ofwananga singa litamba, obulakhwo es'simba murwe siosi tawe.

⁴“Ne luno umbool'langa mbu, ‘Ibe oli Papa, ne wainyanza okhurula mubwana bwanje.

⁵Sinobetsenje nelirima khasotso tawe, sinobekhwo omululu khu ise khulwe inziayo tawe.’ Isiraeli, yako niko akawaboola, ma nokhola amabi kosi akonyala okhukhola.”

⁶Olwa Yosia yali nali omuruchi, OMWAMI yambool'la mbu, “Uluutsi aka Isiraeli, ofwana singa omukhasi orali omusubilwa uyo akhol'le? Isiraeli umal'le khukalukha inyuma okhurula khu ise, ma khubuli esikulu esirambi nende hasi habuli omusaala omubisi wakhol'laho obutamba.

⁷Ndapaalanga mbu olwa naabe namal'le okhukhola yaka kosi, yakhakalukhe khu ise. Nebutswa siyakalukha tawe, ne omukhaana wabwe Yuda orali omusubilwa yalola yaka kosi.

⁸Yuda khandi yalolakhwo olwa ndalekha Isiraeli singa omukhasi wanje ma nimukhunga sichila yali namal'le okhukalukha okhurula khu ise ma nakwiye litamba. Nebutswa Yuda, omukhaana wanga Isiraeli orali omusubilwa siyali noburi tawe. Ye khandi yamala nakwa litamba

⁹ne siyalikhwo nes'simba murwe siosi tawe. Yafwabia esibala nakhola obuheyi khulwo khwekayakaya amachina nende emisaala.

¹⁰Ne yaka kosi nikahweye, Yuda omukhaana wanga Isiraeli orali omusubilwa yali okhwekatia mbu ukalukhile khu ise; siyali nobwatooto tawe. Ise, OMWAMI mal'le okhuboola.”

¹¹Kho OMWAMI yamala niyambool'la mbu kata nikali Isiraeli umal'le okhurula khuye, yali namal'le okhumanyia mbu ye nomulahi okhuyomba Yuda orali omusubilwa.

¹²Yamala niyambool'la nzie okhubool'la Isiraeli mbu, “Ibe Isiraeli orali omusubilwa, kalukha khu ise. Ise ndi netsimbabasi khandi sinzia okhuhambwa nelirima tawe; sindakhabekhwo nelirima n'nawe khulwe inziayo tawe.

¹³Ohuchil'le mbu oli nesikha khandi wali okhukhol'la OMWAMI Nyasaye uwo induli. Weyame mbu buli hasi homusaala kwosi omubisi wahaana obuyanzi bubwo khubanyasaye betsimbia tsindi, ma siwalonda amalako kanje tawe. Ise OMWAMI, mal'le okhuboola.

¹⁴“Inywe abandu barali abasubilwa kalukhe khu ise; muli abandu banje. Nambukule mulala khwinywe okhurula mubuli litaala khandi babili okhurula mubuli silibwa ma namukalusie khusikulu sia Sayuni.

¹⁵Ndakhamuhelesie abaruchi abakhalonde amalako kanje, ne bakhamuruche nobuchesi nende okhumanyilisia.

¹⁶Kho olwa mwakhabe nimumetekhele musibala yisio abandu sibakhal'lomenjekhwo khuke Lisanduku lie Indakano yanje tawe. Sibakhalipaalekhwo nohomba okhulitsul'lakhwo tawe; kata sibakhalienye nohomba okhulomba elindi tawe.

¹⁷Olwe inyinga yiyo yakhole, Yerusalemu yakhalangwe ‘Oluruba lwo MWAMI’ ne abetsinzibulo bosi bakhebunjikheyo khulwo khumekayakaya OMWAMI. Sibakhatsilil'le okhukhola akemioyo chiabwe emitinyu khandi echie tsimbi chibabool'langa tawe.

¹⁸Isiraeli yakhahambane nende Yuda, ne tsiosi mbwo tsiakharule mubuhambe musibala sili elubeka wesinyolu ma balakalukhe musibala siandahelesia abakuka benywe singa omukabwa kwobulame bwabwe.”

¹⁹OMWAMI aboolanga mbu, “Isiraeli, ndenya khubukule singa omusiani wanje, ma khuhelesie liloba lilahi, esibala esilahi okhusila musibala siosi. Ndenya ibe unange Papa, ma olekhe okhurula khu ise.

²⁰Nebutswa singa omukhasi orali omusubilwa, ibe siwabeye omusubilwa khu ise tawe, Ise, OMWAMI, mal'le khuboola.”

²¹Liyoka lihul'likhanga okhurula khubutenje bwesikulu; nabandu ba Isiraeli abalakayanga nende okhusaaya, sichila bamenya mubulamu bwokhukhola tsimbi, ma bayibil'la OMWAMI Nyasaye wabwe.

²²Kalukhe mwesi inywe abali nibarula khu MWAMI, OMWAMI alimuhonia ma amukhole okhuba abasubilwa. Inywe muboolanga, “Yee ifwe khwitsanga khu MWAMI sichila niye Nyasaye wefwe.

²³Ifwe sikhukhonywanga nende obwekayakayi bwabetsimbia khubutenje bwebikulu tawe. Obukhonyi bwa Isiraeli burulanga khu MWAMI Nyasaye wefwe yenyene.

²⁴Nebutswa obwekayakayi bwa Baali, nyasaye wes'simba murwe, bwachila khwakosia amakondi kefwe halala netsing'ombe, abasiani halala nabakhaana, ebindu biosi ebia bakuka befwe batiya namakhono okhurula mumatukhu kakhale.

²⁵Khukone hasi mutsisoni ma khulekhe es'simba murwe siefwe sikhufunikhe. Ifwe nende abakuka befwe khwamenya nikhumwonelanga OMWAMI Nyasaye wefwe khasotso; khusili okhulondakhwo amalako kaake tawe.”