Read lunyore YEREMIA 30 Bible Online

YEREMIA 30 - lunyore bible

YEREMIA 30

¹OMWAMI, Nyasaye wa Isiraeli,

²yambool'la mbu, “Handika musitapu ebindu biosi ebia khubooleye,

³sichila inyinga yitsanga olwa nambinie abandu banje ba Isiraeli nende Yuda mubuhambe. Nambakalusie musibala sia ndali khuhelesia abakuka babwe, ne nabasibukule okhuba esibala siabwe khandi. Ise OMWAMI mal'le okhuboola.”

⁴OMWAMI abool'langa abandu ba Isiraeli nende Yuda mbu,

⁵“Mbuliye okhulakaya khwoburi obukali, Okhulakaya khwoburi tawe okhwomulembe.

⁶Luno sinjila ma opaale! Omundu musaatsa yakhebula omwana? Ne busina ndolanga buli musaatsa natil'le amakhono mundamwe singa omukhasi oli neinumwa? Busina buli mundu ufwililiye?

⁷Litukhu liibi okhusila litsanga; libulaho litukhu lindi eliawakhafwanania khu yili; inyinga yokhutsunwa khubandu banje, nebutswa balahona.”

⁸OMWAMI Wokhunyala Biosi aboolanga, “Olwelitukhu yilio liakhoole ndakhafunake likokolo lili mumakosi kabwe, khandi ndahinie eminyololo chiabwe, ma sibakhabe khandi abasumba babandu bemubibala bindi tawe.

⁹Musilenje yisio bakhabe abarumikhili banje, ise OMWAMI Nyasaye wabwe, nende uyo owolwibulo lwa Daudi owandakheele okhuba Omuruchi.

¹⁰“Abandu banje, muraria tawe, abandu ba Isiraeli, murabba noburi obukali tawe. Ndakhamusoole okhurula khusibala siehale sila, esibala siamulimwo abasumba. Mwakhakalukhe ingo wenywe ma mwakhamenye mumulembe, mwakhabe nomulembe ne abulaho owakhamurisie tawe.

¹¹Ndakheetse khwinywe ma ndamusoole, Ndakhamume abetsimbia bosi ahandali okhumusalania, nebutswa inywe sindakhamukhuye tawe. Sindakhalekhe mutsie sila okhumuha esinyasio tawe. Nebutswa olwa ndakhamuhelesia esinyasio ndakhabe netsimbabasi. Ise, OMWAMI mal'le khuboola.”

¹²OMWAMI yaboola khubandu mbu, “Amafumire kenywe sikali akanyala khuhona tawe, okhusaalila khwenywe sikhuli okhunyala khuhona tawe.

¹³Abulaho onyala khumuhendela, obulesi bwamakhwaku kenywe sibuliho tawe. Obunaayi bwokhuhona khwenywe sibuliho tawe.

¹⁴Abayanzwa benywe bosi bamal'le khumwibil'la; sibasimuhendela inywe tawe. Ise muser're singa abasuku; esinyasio siamuheye nesikali, sichila tsimbi tsienywe netsinyinji, ne obusiamu bwenywe nobukali.

¹⁵Murekaana khandi khukobusalili bwenywe tawe, indesi yokhumuhonia sieliho tawe. Ndali khumuhelesia esinyasio singa yisi, sichila tsimbi tsienywe netsinyinji, ne obusiamu bwenywe nobukali.

¹⁶Nebutswa luno, bosi abam'muma nabo betsa okhumumwa, khandi abasuku benywe bosi betsa okhuhilwa mubuhambe. Bosi abakhusandianga nabo betsa okhusandibwa, ne yabo bosi abakhuyaakanga nabo betsa okhuyaakwa.

¹⁷Nzia okhumukhola okhuba abalamu khandi; Nzia khuhonia amakhwaku kenywe, kata nikali abasuku benywe baboolanga ‘Sayuni yalaamwa; abulaho ohendelanga Sayuni.’ Ise, OMWAMI, mal'le okhuboola.”

¹⁸OMWAMI yaboola mbu, “Nzia okhukalusia abandu banje mumaloba kabwe khandi, ma nambeele tsimbabasi buli sieinyumba; Yerusalemu, nende khandi inyumba yoburuchi nabiombokhwe obuhia.

¹⁹Abandu abamenyelemwo nabembe tsinyembo tsiokhwitsoomia; nabakhupe liyoka liobusangali. Khulwo okhubalaamila tsikhabi, nabametekhe mubwinji; Tsikhabi tsianje natsibaleer're oluyali.

²⁰Nangalusisie lihanga obunyali obwa lialinji n'nabwo khale, ma ndisinjisie libe elinyala okhuba netsingufu khandi; nambaane esinyasio khu bosi ababasandianga.

²¹Omwemeli wabwe narule mulwibulo lwabwe, omuruchi wabwe narule mubandu babwe abene. Namuleere ahembi khu ise naye nayesunde khu ise, okhuba niwina owakhehaana omwene okhwitsa khu ise naralangilwe?

²²Bakhabe abandu banje, nase ndakhabe Nyasaye wabwe. Ise, OMWAMI, mal'le okhuboola.”

²³Lirima lio MWAMI lifwana ikhumaatsi, nende imbumbuyeka ingali ekhupakanga khumirwe chiabandu ababi.

²⁴Lirima lio MWAMI likali sinalihwe okhwola olwa nalibe nilihesisie akomwoyo kwenyanga tawe. Mumatukhu ketsanga abandu baabe bakhamanyilisie akene yaka bulahi.