Read lunyore YEREMIA 31 Bible Online

YEREMIA 31 - lunyore bible

YEREMIA 31

¹OMWAMI yababoola mbu, “Inyinga yitsanga olwa nambe Nyasaye wetsinzibulo tsiosi tsia Isiraeli, ne nabo bakhabe abandu banje.

²Ndali okhumanyia aketsimbabasi khu yabo abahonokokha okhufwa mwihe olwa bali musitsiimi. Olwabandu ba Isiraeli bekomba okhuhuluukha,

³ndalolekha khubo okhurula ehale. Inywe abandu ba Isiraeli, Ise ndamuyanza amatukhu kosi, ne nanzilil'la khumumanyia obuyanzi oburalilu.

⁴Nzia okhumwombokha obuhia. Khandi namubukule obukhana bwenywe namuchiake khusina nobusangali.

⁵Khandi namuraake mumikunda chienywe chiemisabibu echili khubikulu bia Samaria, ne yabo abetsa okhuraaka nabalie emisabibu chiamatunde kanakaame.

⁶Yee, inyinga yitsanga olwa abalindi bakhalange nibali khubikulu bia Efuraimu mbu, ‘Chende khutsie okhwola Sayuni, khu MWAMI Nyasaye Wefwe.’ ”

⁷OMWAMI aboolanga mbu, “Mwembele Isiraeli nobusangali, lihanga likhongo mumahanga kosi. Mwembe tsinyembo tsiokhwitsoomia, ‘OMWAMI umal'le okhusoola abandu baabe; umal'le okhusoola yabo bosi abahonokokha.’

⁸Nambalere okhurula esinyolu, ma nambabunjelesie okhurula khusihesi siesibala. Ababofu nende abalema bakhetse halala n'nabo, kata abakhasi bali netsinda nende yabo abali ahembi okhwibula. Bakhakalukhe singa lihanga likhongo.

⁹Abandu banje bakhakalukhe nimbekhulanga, nende okhusaaya nase nibemeleye okhukalukha. Ndakhabemel'le okhutsia khumichela chiamaatsi, nokhumihanda chiralikhwo amachinjili habaranyala khwesikar'ra tawe. Ise ndi singa papa khu Isiraeli, ne Efuraimu nomusiani wanje omukhulundu.”

¹⁰OMWAMI yaboola mbu, “Abamahanga, hulile akamboolanga, ma mulandie amang'ana kanje ehale khundulo khwe inyanza. Ndali khusalania abandu banje, nebutswa ndababunjelesia ma mbalinde singa omwayi alindanga amakondi kaake.

¹¹Ndamala okhuhaana obulakhuule khubandu ba Isiraeli, ma ndabanunula okhurula khubunyali bwelihanga lietsingufu.

¹²Nabetse khwemba nobusangali khusikulu sia Sayuni, ma basangal'le ebihanwa bianje, ebihanwa biobuswache, ewaini nende omuseituni, ebihanwa biamakondi netsing'ombe. Bakhafwane singa omukunda kwatsukhilwamwo amaatsi; bakhanyoole siesindu esia bakhenye.

¹³Ma abakhaana nabasiebe nende okhusangala, ne abasaatsa ababuukha nende abakhulundu nabasangale. Ise nambahotselesie ma nangalukhanie okhwekhuula khwabwe okhuba obusangali, okhubeelela khwabwe okhuba obusangali.

¹⁴Nambelesie abesaalisi ebiakhulia ebinji, ma mbahelesie abandu banje biosi ebiabatakhanga. Ise, OMWAMI mal'le khuboola.”

¹⁵OMWAMI yaboola, “Ekhwisi ehul'likhanga okhurula Rama, neekhwisi yokhwekhuula okhululu. Raeli yekhuulanga abaana baabe sichila bafwiye, usuuye okhuhotselesibwa.

¹⁶Lekha okhwekhuula ma weye amasika kaako. Kosi akawakhol'la abaana baabo, sinakabire sila okhunyoola omukabwa tawe; nabakalukhe okhurula musibala siabasuku.

¹⁷Amatukhu ketsanga olanyoola amalahi; abaana baabo nabakalukhe hango. Ise, OMWAMI, mal'le khuboola.

¹⁸“Mbulilanga abandu ba Isiraeli nibaboola nibabeeleye mbu, ‘OMWAMI, ifwe khwali singa tsinyama nabulimo; nebutswa wakhwekesia okhulonda amalako; khukalusie khuibe; khwerechekhele okhukalukha khuibe, sichila niwe OMWAMI, Nyasaye Wefwe.

¹⁹Khwali okhukhukhupa omukongo, nebutswa khubwangu khwenya okhukalukha khuibe. Olwa wali nomal'le okhukhuhelesia esinyasio, khwenamia emirwe chiefwe khulwesibeela. Khwali netsisoni khandi nikhusimba emirwe, sichila khwali khwona nikhusili ababuukha.’

²⁰“Isiraeli ibe oli omusiani wanje wandayanza okhusila, omwana wandayanza okhusila. Lwosi olwa ralangakhwo eliira lilio, khupaalangakhwo nobuyanzi. Omwoyo kwanje kwitsanga khuibe; ndakhabe netsimbabasi.

²¹Musinjisie ebimanyilo bieinjila ma mulombe omwandu; murune hamwakor'ra okhurula khunjila. Ma mukalukhe khandi, inywe abandu ba Isiraeli, kalukhe ingo mumataala kamwarulamwo.

²²Mulahayahayia okhwola lina, inywe abandu babula obusubili? Ndalomba esindu esiyia khandi esiabukhan'ne khubindi, esiabukhan'ne singa omukhasi asoolanga omusaatsa.”

²³OMWAMI Wokhunyala Biosi, Nyasaye wa Isiraeli yaboola mbu, “Olwa ndakhakalusie abandu musibala siabwe, bakhaboole khandi nibali musibala sia Yuda halala nomumataala kasio mbu, ‘OMWAMI nayanza alaame tsikhabi khusikulu esitsienukhu sia Yerusalemu, habundu hatsienukhu aho MWAMI amenyanga.’

²⁴Abandu bakhamenye musibala sia Yuda halala nomumataala kasio, ne bakhabemwo abalimi halala nabayi bamakondi.

²⁵Ndakhahulusie yabo bosi abaliba nibachonyele ne ndakhekusie buli mundu nebiakhulia oliba natohele khulwe inzala.

²⁶Khulwe yako, abandu baliboola mbu, ‘Ndabeye okhukona ma nimbukha nindehul'langa bulahi.’

²⁷“Ise, OMWAMI, mboolanga mbu inyinga yitsanga olwa ndakhetsusie abandu nende emiruko musibala sia Yuda.

²⁸Singa obwa ndabukula obweyangu okhubeha nemisi, nende okhubakoka hasi, nokhukalukhania obwami, nokhubamuma nende okhubasambula, nimbwo nambukule obweyangu okhubasimikha nende okhubombokha.

²⁹Olweinyinga yiyo nayoole, abandu khandi sinababoolenje mbu, ‘Abebuli balia emisabibu emilulu, nebutswa abaana nibo abahul'la obululu bwatsio tawe.’

³⁰Nikarali omundu wosi owakhalia emisabibu emilulu yakhanyoola ameno kaake nikafwiye; ne buli mundu yakhafwe khulwe tsimbi tsitsie omwene.”

³¹OMWAMI yaboola mbu, “Inyinga yitsanga olwa ndakhalombe indakano imbia nabandu ba Isiraeli nende abandu ba Yuda.

³²Siyakhafwanane nende indakano ikhulu eyandali khulomba nabakuka babwe olwa ndali khubabukula nomukhono ma nimbemel'la okhurula Emisiri tawe. Kata nikali ndali singa omusaatsa khubo; sibaali okhulinda amalako ke indakano tawe.

³³Indakano imbia eya nzia khulomba nabandu ba Isiraeli eliuba singa mbu: Ndakhare Amalako kanje mubo mukari ma ndakhakahandike khumioyo chiabwe. Ise ndakhabe Nyasaye wabwe nabo bakhabe abandu banje.

³⁴Abulaho mulala khubo owakhekesie owasie nohomba omwana wabwe okhumanya OMWAMI sichila bosi bakhaamanye okhurula khumutu okhwola khumukhongo. Ise ndakhabalekhele tsimbi tsiabwe ne sindakhatsilil'le okhwitsusia amabi kabwe tawe. Ise, OMWAMI mal'le okhuboola.”

³⁵OMWAMI ahelesianga eliuba obulafu okhwakha m'mbasu, ne omwesi nende tsinyininyini tsiakha butukhu. Atubuulanga inyanza ma achila nehoola; eliira lilie ni OMWAMI Wokhunyala Biosi.

³⁶Akhusubisianga mbu oluhono lwebindu bimenya mubukono bwabio, nimbwo Isiraeli elatsilil'la khuba lihanga.

³⁷Nikakhaba litukhu elala liakhanyala okhupimwa, khandi omusinji kwesibala okhukolwa, kho yilwo nilwo olwa ndakhasuula abandu ba Isiraeli, khulwe yako kosi akabaliba nibakhola. OMWAMI umal'le okhuboola.

³⁸OMWAMI yaboola mbu, “Inyinga yitsanga olwa Yerusalemu yosi eliombokhwa obuhia singa litookho lianje, okhurula khumunaara kwa Hananeli kuli ebukwe okhwola Musilibwa sio Mukona.

³⁹Ne olwakho lwokhwabukhania litookho luchiakila habwene yaho nilihengele ebukwe khusikulu sia Garebu ma lulabotokhane okhwola Goa.

⁴⁰Olubanda lwosi lwabandu bafwa bayabilwangamwo nende okhufuubwamwo amakokha, nende esikuuri siosi esili hekulu homuchela kwa Kidironi okhwola khusilibwa sie Tsisululi esili ebukwe siakhabe habundu hanje hatsienukhu. Litookho siliakhasambulwekhwo khandi nohomba okhumumwa tawe.”