Read lunyore YEREMIA 32 Bible Online

YEREMIA 32 - lunyore bible

YEREMIA 32

¹OMWAMI yal'loma n'nase mumuhika kwelikhumi okwa Sedekia yali nali omuruchi wa Yuda, ne ikwo kwali omuhika kwelikhumi namunane muburuchi bwa Nebukadinesa wa Babulonia.

²Olwene yilwo abasikari bomuruchi wa Babulonia bali nibafumbilanga Yerusalemu, ne ise Yeremia ndali ninzikaliywe m'mukitsi kwehango homuruchi.

³Omuruchi Sedekia wa Yuda, yali niyambohela ebwene yiyo ma yali niyasitakile ndali nimbooye mbu OMWAMI yali okhuboola mbu, “Nzitsanga okhulekha omuruchi wa Babulonia okhufumila litookho yili,

⁴ne omuruchi Sedekia sinahonokokhe tawe. Nahaanwe mumakhono komuruchi wa Babulonia; namulole moni namoni, khandi nal'lome khuye omwene nomwene.

⁵Sedekia nahilwe Babulonia ma namenyeyo okhwola olwa namukhol'le akanyenyanga. Kata niyakhalwana nende abandu ba Babulonia, sinabaleke tawe. Ise, OMWAMI mal'le okhuboola.”

⁶OMWAMI yambool'la

⁷mbu Hanameli, omusiani wa Papa wanje wakhabili Shalumu, yetsa khwitsa khu ise khulwo okhureeba mbu ngule omukunda kukwe kuli Anatsotsi mulusoma lwabolwibulo lwa Benjameni sichila khandi nise omwikho uwe awahembi nise okhoyele okhukula omukunda yikwo kube okwanje.

⁸Ma olwo MWAMI yali niyakhamala okhuboola, Hanameli yetsa khu ise nindi mumukitsi kwehango homuruchi, ma niyareeba ngule omukunda yikwo. Kho ndali khumanyilisia sichila OMWAMI yali niyambooleye.

⁹Ndakula omukunda okhurula khu Hanameli, nimuchel'la amapesa komukunda ne, obukusi bwakwo bwali ebitonye biefetsa likhumi nabine nabitaru.

¹⁰Ndara eseyi khubarwa yomukunda yikwo ma nerebwakhwo omuhuri imbeli wabakobokheli ma ninjela amapesa khuratili.

¹¹Ma nimbukula etsikopi tsibili tsiebarwa yandakul'la omukunda — ebarwa eyarebwakhwo omuhuri eyamanyianga amang'ana kosi akobukusi ne eyindi yali ebarwa eralikhwo omuhuri tawe —

¹²ma nimbelesia Baruki omusiani wa Neria, omwitsukhulu wa Maaseya. Ndamuhelesia imbeli wa Hanameli halala nabakobokheli abali nibareye eseyi khubarwa yokhukulana nende abasaatsa bali nibekhaye mumukitsi.

¹³Imbeli wabwe bosi ndabool'la Baruki mbu,

¹⁴“OMWAMI Wokhunyala Biosi, Nyasaye wa Isiraeli akhulakanga obukule etsibarwa tsiobukulani bwomukunda, tsiombi tsibili ebarwa eyarebwakhwo omuhuri nende ebarwa eralikhwo omuhuri tawe ma otsire musongo eyalombwa khwitoyi kho tsibe etsiranyala okhwononekha khulwemihika eminji chitsanga.

¹⁵OMWAMI Wokhunyala Biosi, Nyasaye wa Isiraeli uboola mbu tsinyumba, emikunda, nende emikunda chiemisabibu tsiakhakusiebwe khandi musibala yisi.”

¹⁶Olwa ndali nimal'le okhuhelesia Baruki ebarwa yobukulani bwomukunda, ndasaaya mbu,

¹⁷“E OMWAMI Nyasaye, ibe walomba esibala nende likulu norumikhilanga obunyali bubwo obukhongo nende tsingufu tsitsio tsingali; sibulaho esili esitinyu khuibe.

¹⁸Wamanyia obuyanzibwo oburalilu khubandu etsielefu, nebutswa ibe khandi wahaana esinyasio khubandu khulwe tsimbi tsiabasamwana. Ibe oli Nyasaye Omukhongo khandi owobunyali: Oli OMWAMI Wokhunyala Biosi.

¹⁹Akoloosianga nakobuchesi ma okhola ebindu ebikali; ololanga ebindu biosi ebiabandu bakholanga, ma obahelesia amatani okhulondokhana nebikholwa biabwe.

²⁰Mumatukhu kakhale wali okhukhola akamangalimwa nende akokhuchenya Emisiri, ma watsilil'la okhukakhola okhwola luno, musibala sia Isiraeli nende mubetsimbia, ma kachila wamanyikha habundu hosi.

²¹Warumikhila akamangalimwa nende akokhuchenyia akali okhuriisia abasuku befwe, warumikhila obunyali bubwo nende tsingufu tsitsio khulwo okhuhiinia abandu baabo ba Isiraeli Emisiri.

²²Wabahelesia esibala siobuhinda nende liloba linolu singa wali niwasubisia abakuka babwe.

²³Nebutswa olwa betsa musibala ma nibasibukula okhuba obulaame bwabwe, sibalonda amalako kaako tawe nohomba okhumenya nibalondanga amechesio kaako, sibakholakhwo liosi elia wabalaka okhukhola tawe. Khulwe yaho wamala noleera okhumumwa yikhwo khubo.

²⁴“Abababulonia bombokhele ebifuumi okhufumbila litookho khulwo okhulifumila; ne luno baliseeranga. Lihe, inzala nende obulwaye bitsa okhuchila litookho okhukwa mumakhono kabwe. Ibe onyala okhulola mbu kosi akawaboola kamal'le khuhesikha.

²⁵Nikarali, OMWAMI Nyasaye, niwe owali okhundaka ise okhukula omukunda imbeli wabakobokheli kata nikali mbu litookho lili ahembi okhufumilwa na Bababulonia.”

²⁶Ma OMWAMI niyambool'la mbu,

²⁷“Ise nise OMWAMI, Nyasaye wabandu bosi. Sibulaho siosi esinyala okhuba esitinyu khu ise tawe.

²⁸Nzia okhuhaana litookho khumuruchi Nebukadinesa wa Babulonia halala nabasikari baabe; betsa okhulifumila

²⁹ma balihambiemwo omul'lo. Betsa okhulisamba liosi, halala netsinyumba etsiachila abandu nibaasinya sichila basambila khubilama biatsio obwali khulwo khuhana khu Baali khandi khulwo okhutsukha omusango kwewaini khubanyasaye bandi.

³⁰Okhurula mubuchiachilo bwobulamu bwabwe, abandu ba Isiraeli nende abandu ba Yuda sibainyanzisiakhwo tawe ma nibachila nimba nelirima khukabakholanga.

³¹Abandu belitookho yili bali okhuchila nimba nelirima nende okhusinyikha okhurula olwe litookho yilio liombokhwa. Mal'le okhukhalaka okhulikhuya,

³²khulwe tsimbi etsiabandu ba Yuda nende Yerusalemu bakhola, halala nabaruchi babwe, nende abemeli babwe nabesaalisi babwe nende abaroobi babwe.

³³Bali okhuukhupa emikongo; kata nikali ndatsilil'la okhubekesia, sibali abanyala okhumbulila nende okhweka tawe.

³⁴Kata bali okhura ebiniini biabwe ebies'sinyo mu Hekalu yanje eyombokhwa khulwokhundekayakaya ma bachifwabia.

³⁵Bayombokhela Baali tsisambwa Mwibanda lia Hinomu, khulwo khuhan'nakhwo abasiani babwe nende abakhaana babwe singa emisango khunyasaye olangwanga Moleki. Ise sindabalaka okhukhola amang'ana yaka tawe, khandi sikalikhwo mumapaalo kanje mbu bakhakhol'le akafwana yaka, ma bachile abandu ba Yuda bakhole tsimbi tawe.”

³⁶OMWAMI, Nyasaye wa Isiraeli yambool'la mbu, “Yeremia, abandu baboolanga mbu lihe, neinzala, nende obulwaye nabichile litookho nalikwe mumakhono komuruchi wa Babulonia. Luno, huyia khukandi akanzia okhuboola.

³⁷Nzia okhubunjelesia abandu okhurula mubibala biosi ebiandali okhubasalaniamwo olwa ndali noburima nende okhusinyikha ma nzia okhubakabusia hano ma ndekhe bamenye mumulembe.

³⁸Kho nilwo olwa balaba abandu banje, nase ndaba Nyasaye wabwe.

³⁹Nambahelesie lichoomo elala mubulamu bwabwe: nalio lili mbu nabambelesinjie oluyali tsinyinga tsiosi kho ol'lahi lube khubolwibulo lwabwe.

⁴⁰Nanombe n'nabo indakano yeinziayo. Sindakhalekhe okhubakhol'la ebindu ebilahi tawe, khandi ndakhabakhole okhumbelesia oluyali nomwoyo kwabwe kwosi, kho balabe abaranyala okhukhupa omukongo khandi tawe.

⁴¹Ndakhasangale okhubakhol'la ebindu ebilahi, khandi ndakhabahelesie esibala yisi okhuba obulaame bwabwe.

⁴²“Singa obwa ndereye abandu yaba likhupako nimbwo nambahelesie ebindu ebilahi biosi ebia ndabasubisia.

⁴³Abandu baboolanga mbu liloba yili liakhabe singa esitsiimi, habundu ahabandu nohomba tsinyama tsirakhamenya tawe. Khandi liakhahebwe abandu ba Babulonia. Nebutswa emikunda chiakhakusibwe khandi musibala yisi.

⁴⁴Abandu bakhatsikule, ne etsibarwa tsiobukusi tsiakharebwekhwo eseyi, tsilakhupwekhwo omuhuri, ma tsilakobokhelwe. Kano kakhekholekhe musibala sia Benjameni, mumataala kali ahembi Yerusalemu, no mumataala akali mubikulu nende akali khundulo khwebikulu, nende akali enandete wesibala sia Yuda. Ndakhakalusie abandu musibala siabwe. Ise OMWAMI mal'le okhuboola.”