Read lunyore YEREMIA 33 Bible Online

YEREMIA 33 - lunyore bible

YEREMIA 33

¹Olwa ndali nisili mububohe mumukitsi kwehango homuruchi OMWAMI yal'loma n'nase khandi.

²OMWAMI, owalomba esibala ma nasira mubukono bwasio, yal'loma n'nase. Ye oweliira lilie ni OMWAMI yaboola mbu,

³“Unange ise, nase ndakhukalusia; nakhubool'le amang'ana kokhuchenya nende okhuhuka akosili okhumanyakhwo tawe.

⁴Ise, OMWAMI, Nyasaye wa Isiraeli mboolanga mbu tsinyumba tsia Yerusalemu nende tsinyumba tsiabaruchi ba Yuda natsisambulwe inyuma wokhufumilwa nende okhuseerwa khwa Yuda nende Yerusalemu.

⁵Abandi nabalwane nende abasikari ba Babulonia ne Abababulonia nabetsusie litookho nende emilambo chiabandu banzia okhwir'ra mwileko nende muburima bwanje. Ise ndamala okhukhupa litookho yili omukongo khulwe tsimbi tsiabandu bamwo bakhola.

⁶Nebutswa nzia okhuhonia litookho yili nende abandu bamwo ma mbakalusisie obulamu bwabwe. Nzia okhubahelesia omulembe omukali nende obulindi obukali.

⁷Nambelesie Yuda nende Isiraeli obuhinda, ma khandi nambombokhe obuhia singa obwa balinji olwokhuranga.

⁸Nambatsienule, okhurula khutsimbi tsia bali khukhol'la, khandi ndibalekhela tsimbi tsiabwe halala neinduli yabalomba khu ise.

⁹Yerusalemu nebe obuchiakilo bwobusangali, oluyali nende omwekhoyo khu ise; ne buli lihanga musibala nalibe noburi nende okhutechela olwa nabahul'le khukebindu ebilahi ebia khol'langa abandu ba Yerusalemu nende khukobuhinda bwa nderanga khwitookho.”

¹⁰OMWAMI naboola mbu, “Abandu baboolanga mbu habundu hano hafwana esitsiimi, mbu abandu nohomba emiruko sibamenyangamwo tawe. Ne bali habwene okhuboola mbwo; amataala komu Yuda nende emihanda chiomu Yerusalemu nameele; abandu nohomba emiruko sibamenyele mwo tawe. Nebutswa omwene yimu nohul'le, abandu nibakhupanga

¹¹liyoka liobuyanzi nende obusangali khandi liyoka liobusangali liomumasabo kebisel'lo. Nohul'le abandu nibembanga olwa nababe nibaleeranga emisango chiokhukhupa embwo mu Hekalu yanje; nababoole mbu, ‘Mukhupile OMWAMI Wokhunyala Biosi embwo sichila nomulahi, khandi obuyanzi bubwe nobweinziayo.’ Nzia okhukhola esibala sino okhuba nobuhinda singa obwalinjimwo. Ise, OMWAMI mal'le okhuboola.”

¹²OMWAMI Wokhunyala Biosi yaboola mbu, “Musibala yisi esifwana esitsiimi khandi habandu nohomba emiruko baramenyanga tawe, khwakhabemwo nobunyasi khandi abaayi bakhaleremwo amakondi.

¹³Mumataala kali mubikulu, nende akali khundulo khwebikulu, nende akali enandete wa Yuda, mulusoma lwa Benjameni, nomumataala akali ahembi Yerusalemu, nende akali mu Yuda, abaayi bamakondi bakhachiake okhubasia amakondi kabwe khandi. Ise, OMWAMI mal'le okhuboola.”

¹⁴OMWAMI yaboola mbu, “Inyinga yitsanga eya nambesie lisubisio elia ndalaka abandu ba Isiraeli nende Yuda.

¹⁵Olwene yilwo ndakhahule omundu omulunji owomulwibulo lwa Daudi okhuba omuruchi. Omuruchi uyo yakhakhole akali akatooto, amalunji khandi akahabwene musibala siosi.

¹⁶Abandu ba Yuda nende Yerusalemu bakhasoolwe ma balameye mumulembe. Litookho liakhalangwe, ‘OMWAMI Obuhonia Bwefwe.’

¹⁷Ise, OMWAMI, musubisianga mbu nakhubetsenje namulala khubolwibulo lwa Daudi owanobetsenje omuruchi wa Isiraeli amatukhu kosi.

¹⁸Khandi nakhubetsenje nabesaalisi okhurula mulwibulo lwa Lawi khulwo okhuurumikhila nende okhuhaana emisango emisambe, nende emisango chiobuswache, nende emisango chindi chiosi.”

¹⁹OMWAMI niyambool'la mbu,

²⁰“Mal'le okhulomba indakano nende om'basu halala nobutukhu, mbu bibe ebinyala okhwitsanga khasotso munyinga yabio, ma indakano iyo erakhafunakwa tawe.

²¹Munjila indelwa iyo ndalomba indakano nende omurumikhili wanje Daudi mbu okhwola nabetsenje nende omundu womulwibulo lulwe okhuba omuruchi, khandi ndalomba indakano nende abesaalisi okhurula mulwibulo lwa Lawi mbu nabarumikhilenje khasotso; ne tsindakano yitsio sitsili etsinyala okhufunakwa tawe.

²²Nambakhole abolwibulo lwa Daudi omurumikhili wanje nabenjihe, khandi abesaalisi okhurula mulwibulo lwa Lawi nabenjihe, kho nababe abenji abaranyala okhubasibwa singa tsinyininyini tsiomwikulu nohomba singa tsinzalu tsiomuyekhe okuli khuluchinga lwe inyanza.”

²³OMWAMI niyambool'la mbu,

²⁴“Ibe omanyilisianga singa abandu baboolanga mbu ise ndasuula Isiraeli nende Yuda, abetsinyumba tsibili etsia ndahula? Khulwe yako bachaayanga abandu banje, ma sibabalanga singa lihanga tawe.

²⁵Nebutswa Ise, OMWAMI ndi neindakano nom'basu halala nobutukhu ma ndalomba amalako kokhulinda esibala nelikulu.

²⁶Singa siahene ndakhola yaka, nimbwo naninde indakano yanje nende abolwibulo lwa Yakobo halala nomurumikhili wanje Daudi. Ndakhahule mulala khubolwibulo lwa Daudi okhwamiha khubetsukhulu ba Aburahamu, Isaka, nende Yakobo. Ndakhabeele abandu banje tsimbabasi ma ndabakhole okhuba abahinda khandi.”