Read lunyore YEREMIA 35 Bible Online

YEREMIA 35 - lunyore bible

YEREMIA 35

¹Mumatukhu ka Yehoyakimu omusiani wa Yosia yali nali omuruchi wa Yuda, OMWAMI yambool'la mbu,

²“Tsia khubeinyumba ya Rekabu ma ol'lome n'nabo. Ma obaleere mubikoti biomu Hekalu ma obahelesie ewaini.”

³Kho ndamala nimbukula abeinyumba ya Rekabu bosi — Yaasania Omusiani womundu undi olangwa Yeremia owali omusiani wa Habasinia halala nabasiani babwe bosi nende abaana babwe —

⁴nimbaleera mu Hekalu. Ndali khubahila musikoti siabechi bomuroobi Hanai omusiani wa Igidalia. Esikoti yisi siali mukorofa ikulu wesikoti sia Maaseya omusiani wa Shalumu, omundu wali nomulimo omukali mu Hekalu. Esikoti sisie siali ahembi nebikoti bindi ebiabakholi.

⁵Ma nirenjekhela abeinyumba ya Rekabu ebikombe nende etsibakuli tsitsuuyemwo ewaini ma nimbabool'la mbu, “Munywe ewaini.”

⁶Nebutswa nibakalusia mbu, “Ifwe sikhunywetsangakhwo ewaini tawe. Kuka Wefwe Yonadabu Omusiani wa Rekabu yakhubool'la mbu, ifwe nohomba abolwibulo lwefwe barakhanywakhwo ewaini yosi tawe.

⁷Khandi yakhubool'la khurakhombokhakhwo tsinyumba tsiosi tawe nohomba okhulima emikunda nohomba okhulima emikunda nohomba okhuraaka emisabibu mumikunda, nohomba kata okhukula emikunda chiemisabibu tawe. Yakhulaka mbu khasotso khosi nakhumenyenje mumaheema, kho khube abanyala khutsilil'la okhuba musibala yisi esiakhumenyangamwo singa abacheni.

⁸Ifwe khwalonda amalako yaka kosi aka Yonadabu yakhuhelesia. Ifwe abene sikhunywetsanga ewaini tawe, kata abakhasi befwe sibanywetsanga ewaini tawe, kata abasiani befwe nende abakhaana befwe sibanywetsanga tawe.

⁹Ifwe sikhwombokhanga tsinyumba tsiokhumenyamwo tawe kata khandi sikhulikhwo nemikunda chiemisabibu kata emikunda chindi nohomba ebiraakwa tawe.

¹⁰Ifwe khumenyanga mumaheema khandi khulondanga amalako kosi akakhwahebwa na kuka wefwe Yonadabu.

¹¹Nebutswa olwomuruchi Nebukadinesa yaseera esibala siefwe, khwamala nikhulola mbu khwitse Yerusalemu khulwo khwilukha okhurula khubasikari ba Babulonia nende abasikari ba Siria. Yaka niko akachilanga nikhumenyele Yerusalemu.”

¹²OMWAMI Wokhunyala Biosi, Nyasaye wa Isiraeli yambool'la nzie mbool'le abandu ba Yuda nende Yerusalemu mbu,

¹³“Ise, OMWAMI mureebanga esichilanga nimusuula okhumbulila nende okhulonda amalako kanje nisina?

¹⁴Abolwibulo lwa Yonadabu balonda amalako kaake khulwo khubula okhunywa ewaini ma okhwola litukhu lino abulaho onywetsanga ewaini. Ne Ise ndal'loma khu inywe ali akhenji ne simwalonda amalako kanje tawe.

¹⁵Ise ndatsilil'la okhumurumila abarumikhili banje abaroobi, ne bamubool'la okhulekha tsinjila tsienywe tsimbi ma mukhole akali amalahi. Bamukaya mulekhe okhwekayakaya abanyasaye bandi nende okhubarumikhila kho mube abanyala okhutsilil'la okhumenya musibala yisi esia ndali okhumuhelesia halala nabakuka benywe. Nebutswa inywe simwali okhumbulila nohomba okhubukula obukono mu ise, tawe.

¹⁶Abolwibulo lwa Yonadabu balonda lilako liabakuka babwe babahelesia, nebutswa inywe simwalonda amalako kanje tawe.

¹⁷Khulwa lunondi, ise OMWAMI Wokhunyala Biosi, Nyasaye wa Isiraeli, nzia okhuleera amanyakhano kosi amabi khu inywe abandu ba Yuda nende Yerusalemu akandamusubisia. Nzia okhukhola mbwo sichila simwali okhumbulila olwa ndal'loma khu inywe tawe, khandi simwakalusia olwa ndamulanga tawe.”

¹⁸Ma ndamala nimbool'la abeinyumba ya Rekabu mbu OMWAMI Wokhunyala Biosi, Nyasaye wa Isiraeli yali khuboola mbu, “Mwali okhulonda amalako aka mwahebwa nakuka wenywe Yonadabu, mwalonda amalako kosi, ma mwakhola buli esindu esiayamulaka.

¹⁹Khulwe yako ise, OMWAMI Wokhunyala Biosi Nyasaye wa Isiraeli musubisianga mbu Yonadabu omusiani wa Rekabu yakhabetsenje nomwitsukhulu wes'siani wokhuruumikhila amatukhu kosi.”