Read lunyore YEREMIA 36 Bible Online

YEREMIA 36 - lunyore bible

YEREMIA 36

¹Mumuhika kwakhane okwoburuchi bwa Yehoyakimu omusiani wa Yosia omuruchi wa Yuda, OMWAMI yambool'la mbu,

²“Bukula akhatapu khafumba ma ohandiikekhwo amang'ana kosi akakhubooleye khu Isiraeli nende Yuda nende khutsimbia tsiosi. Ohandike ebindu biosi ebia ndakhubool'la okhurula litukhu liokhuranga elia ndal'loma n'nawe, olwa Yosia yali omuruchi okhwola khunyinga yino.

³Haundi olwabandu ba Yuda nabahul'le khumanyakhano kosi akampaalanga khuleera khubo, bakhalekha okhukhola amang'ana amabi. Ma ndakhabalekhela amasiamu kabwe halala netsimbi tsiabwe.”

⁴Kho ndamala ndalanga Baruki omusiani wa Neria ma nimubool'la amang'ana kosi ako MWAMI yali niyambool'la. Ma Baruki nakahandika kosi musitapu.

⁵Ndamala nimbelesia Baruki amalako kano: “Luno simbuchil'lwanga okhutsia mu Hekalu tawe.

⁶Nebutswa nyenganga ibe notsie mu Hekalu olwabandu nababe nibahonga okhulia. Nobasomele akahandichilwe musitapu esifumba nomwoyo omukali kho babe abanyala khuhul'la kosi ako MWAMI yambooleye ma nase nikhubool'la. Nokhole kano habundu homundu wosi anyala okhuhulila ibe, nibalimwo abandu ba Yuda abetsele okhurula mumataala kabwe.

⁷Haundi betsa okhusaaya khu MWAMI ma balekhe okhukhola amang'ana kabwe amabi sichila OMWAMI wabatechesia nelirima lilie likali nende obululu bubwe.”

⁸Kho Baruki yasoma amang'ana ko MWAMI mu Hekalu habwene singa obwa ndali nimbooleye akhole.

⁹Mumwesi kwakharano nakhane mumuhika kwakharano okwa Yehoyakimu yali niyamihanga Yuda, abandu bali okhuhonga okhulia kho bamuyanzisie OMWAMI. Okhuhonga okhulia yikhu khwali okhukholwa nende bosi abali nibamenyele Yerusalemu nende yabo bosi abali nibetsele Yerusalemu okhurula mumataala ka Yuda.

¹⁰Ne olwa abandu bosi bali nibahuyianga, Baruki yasoma okhurula musitapu esifumba ebindu biosi ebia ndali nimbooye. Yasomanga nali mu Hekalu musikoti sia Gemaria omusiani wa Safani, omuhandichi wesiina. Esikoti sisie siali mukorofa ahembi mubwinjil'lo bwesilibwa Esiyia sie Hekalu.

¹¹Mikaya omusiani wa Gemaria, omwitsukhulu wa Safani yahul'la Baruki nasomanga okhurula musitapu esifumba ako MWAMI yali nabooye.

¹²Ma yamala natsia hango homuruchi, musikoti siomuhandichi wesiina, habakhulundu bosi bali nibahuyianga emise. Elishama, omuhandichi wesiina, Delaya omusiani wa Shemaya, Elinatsani omusiani wa Akibori, Gemaria omusiani wa Safani, Sedekia omusiani wa Hanania nende abakhulundu bandi bosi baliho.

¹³Mikaya yababool'la kosi aka yali nahuliye Baruki nasomelanga abandu.

¹⁴Ma abakhulundu nibaruma Yehudi (omusiani wa Netsania, omwitsukhulu wa Shelemia, ma es'soni sia Kushi) okhubool'la Baruki aleere esitapu esifumba esia yali nasomeyenje abandu. Baruki yamala nabaleer'ra esitapu esifumba tsana.

¹⁵Bamala nibamubool'la “Ikhala hasi ma okhusomele esitapu esifumba yisio.” Kho Baruki nakhola mbwo.

¹⁶Olwa Baruki yali namal'le okhusoma, basukhana nibahengana muburi, ma nibabool'la Baruki mbu, “Okhwola khubool'le omuruchi amang'ana yaka kosi.”

¹⁷Ma nibamureeba mbu, “Khubool'le luno, wakhola mbwena kho nohandika amang'ana yaka kosi? Yeremia niye owali okhukhusomela?”

¹⁸Baruki nabakalusia mbu, “Yeremia yali okhuusomela sielingana ne nase nimandiika nobwino musitapu esifumba yisi.”

¹⁹Bamala nibamubool'la mbu, “Ibe nende Yeremia okhwola mutsie okhwebisa. Murakhalekha abandu bamanyekhwo ha muli tawe.”

²⁰Abakhulundu babiikha esitapu musikoti sia Elishama, omuhandichi wesiina ma nibatsia munyumba yomuruchi musiina aha bali khubool'la omuruchi kosi akali nikasomelwe.

²¹Ma omuruchi naruma Yehudi okhuleera esitapu. Yasibukula okhurula musikoti sia Elishama ma nasisomela omuruchi halala nabakhulundu abali nibasinjiye homuruchi yali nali.

²²Kali amatukhu kobusindu ne omuruchi yali niyekhaye imbeli womul'lo munyumba ya yamenyangamwo amatukhu kobusindu.

²³Olwa Yehudi yali niyakhamala okhusoma amakaratasi kataru nohomba kane, omuruchi yakhalaka amakaratasi yako nombano mutititi ma nafuba mumul'lo. Yatsilil'la okhukhalaka buli esitonye esiamang'ana kalikhwo okhwola olwe esitapu esifumba siosi siasambwa.

²⁴Nebutswa olwe yaka kosi kekholekha, omuruchi kata abakhulundu baabe abahul'la amang'ana yaka sibalikhwo noburi nohomba okhumanyiakhwo esibeela khuko tawe.

²⁵Kata mbwo Elinatsani, Delaya nende Gemaria bahomba omuruchi alekhe okhusamba esitapu esifumba, ne omuruchi siyabukulakhwo obukono khubo tawe.

²⁶Ma omuruchi nalaka Yerahimeli omusiani womuruchi, halala nende Seraya omusiani wa Asirieli nende Shelemia omusiani wa Abudeli okhuufumila halala nomuhandichi wanje Baruki, nebutswa OMWAMI yali namal'le okhukhubisa.

²⁷Omuruchi Yehoyakimu namal'le okhusamba esitapu esifumba esia ndali nimbooleye Baruki naye nahandika, OMWAMI yambool'la

²⁸mbukule esitapu esifumba sindi ma mandiikekhwo amang'ana kosi akali nikahandichilwe khusiokhuranga.

²⁹OMWAMI niyambool'la mbu mbool'le omuruchi mbu, “Ibe umal'le okhusamba esitapu esifumba, ma khandi ureebele Yeremia esiachila nahandika mbu omuruchi wa Babulonia nayetse okhumulula esibala sino ma yeere abandu nende emiruko.

³⁰Kho luno, Ise, OMWAMI mboolanga khuibe, omuruchi Yehoyakimu mbu sialibakhwoho wosi owolwibulo lulwo owakhamihe khwihanga lia Daudi tawe. Omubili kukwo nakufuubwe esioba aha nakubakalwe khuliuba mumubasu ne khubarafu mubutukhu.

³¹Nakhuhelesie esinyasio, ibe halala nabetsukhulu baabo nende abakhulundu baabo khulwe tsimbi tsienywe mwesi. Ibe nohomba abandu ba Yerusalemu nende Yuda simwabukulakhwo obukono mumachetsiyio kanje tawe, kho nandeere khwinywe mwesi amanyakhano akandaboola nandeere.”

³²Kho ndamala nimbukula esitapu sindi ma nimbelesia omuhandichi wanje Baruki ma nahandika kosi akandali okhumubool'la. Yahandika siesindu siosi esiali khusitapu esiokhuranga halala namang'ana amafwanani akandali nimusomeye ahandike.