Read lunyore YEREMIA 37 Bible Online

YEREMIA 37 - lunyore bible

YEREMIA 37

¹Omuruchi Nebukadinesa wa Babulonia yali okhwemekha Sedekia omusiani wa Yosia okhuba omuruchi wa Yuda musilenje sia Yehoyakini omusiani wa Yehoyakimu.

²Nebutswa Sedekia, nohomba abemeli baabe kata abandu sibahuchil'lakhwo amang'ana ako MWAMI yali niyambooleye tawe.

³Omuruchi Sedekia yaruma Yehukali omusiani wa Shelemia nende omwesaalisi Sefania omusiani wa Maaseya okhuureeba okhukhusaayila Lihanga khu MWAMI Nyasaye wefwe.

⁴Ndali nisili omulakhuule okhuchenda habundu hosi sichila ndali nisili okhureebwa mubuhambe.

⁵Abasikari ba Bababulonia bali nibafumbiye Yerusalemu, ne olwa bahul'la mbu abasikari be Misiri bali nibakhalanisie olwakho lwesibala siabwe, bamala nibakalukha inyuma.

⁶Ma OMWAMI Nyasaye wa Isiraeli niyambool'la

⁷mbool'le Sedekia mbu, “Abasikari be Misiri bali khunjila betsanga okhukhukhonya nebutswa betsa okhukalukha ingo.

⁸Ma abandu ba Babulonia betsa okhukalukha, baseere litookho, ne betsa okhulifumila, ma balisambe liosi.

⁹Ise, OMWAMI, muchetsiyianga mbu murekaatia abene mukhupaala mbu abandu ba Babulonia sinabakalukhe tawe, sichila nabakalukhe.

¹⁰Kata nikali mwakhaleka abasikari ba Babulonia, ma abasaatsa basaliye bonyene balekhwe nibakonanga mumaheema, abasaatsa yabo basili butswa abokhusinjila ma basambe litookho liosi p'pe.”

¹¹Abasikari ba Babulonia barula Yerusalemu sichila abasikari baba Misiri bali nibesundanga ahembi khubo.

¹²Kho ise ndachiaka okhurula Yerusalemu okhutsia mulusoma lwa Benjameni okhubukula omukabwa kwanje mubeinyumba yefwe.

¹³Nebutswa olwa ndoola musilibwa sia Benjameni omusikari omukali owali nahenganga abasikari abali nibali khumulimo habwene yaho, omundu weliiralie liali Iricha, Omusiani wa Selemia omwitsukhulu wa Hanania yali khusingisia ma naboola mbu, “Ibe webisanga okhutsia khubandu ba Babulonia!”

¹⁴Nase nimukalusia mbu, “Yako sikali mbwo tawe! Ise sinzilukhanga tawe.” Nebutswa Iricha siyali onyala okhuhul'la akamboolanga tawe, yamala yandile ma niyambila khubakhulundu.

¹⁵Bali nelirima n'nase ma nibalaka ndiabwe ma fungilwe munyumba ya Yonatsani, omuhandichi wemusiina, owe inyumba yiye yali nekhol'lwe eyokhubohelamwo abandu.

¹⁶Ndarebwa musikoti esiayabwa hasi munyumba ma nimenyamwo amatukhu amenji.

¹⁷Olunyuma omuruchi Sedekia yarumania amang'ana mbu nangwe. Olwa ndatsia munyumba yiye yoburuchi yareeba nali yenyene mbu, “Kalikhwoho amang'ana kosi okhurula khu MWAMI?” Nase ningalusia mbu, “Kaliho. Ibe norebwe mumakhono komuruchi wa Babulonia.”

¹⁸Ma ndamala nireeba mbu “Ning'ana sina liibi elia ndakhukhol'la ibe, nohomba eliandakhol'la abemeli baabo nohomba eliandakhol'la abandu yaba eliachila nimuura mubuhambe?

¹⁹Nisina esiekholekha khubaroobi baabo abakhubool'la mbu omuruchi wa Babulonia sinakhuseere ibe nohomba kata esibala sisio tawe?

²⁰Ne luno, omwami wanje yanza ohul'le aka nzia khuboola ma okhole akakhureeba. Noyanza orakhangabusia mubuhambe munyumba ya Yonatsani tawe. Niwakhangabusiamwo siahene ndakhafwilamwo.”

²¹Kho Sedekia yamala nalaka mbu mbohelwe mumukitsi kweinyumba yomuruchi. Ndamenya habwene yaho, ne buli litukhu ndahebwanga omuhayila kwomukaati okhurula munyumba yemikaati okhwola olwemikaati chiosi chiliba nichihweye mwitookho.