Read lunyore YEREMIA 38 Bible Online

YEREMIA 38 - lunyore bible

YEREMIA 38

¹Shefatia omusiani wa Matani, Gedalia omusiani wa Pashuri, Yehukali omusiani wa Shelemia nende Pashuri omusiani wa Malikia bahul'la mbool'langa abandu mbu

²OMWAMI yali nabooye mbu, “Omundu wosi owanosikale mwitookho nafwile mwihe nohomba nafwe khulwe inzala, nohomba khulwo bulwaye. Nebutswa uyo owanotsie esioba welitookho ma nayehaane mumakhono kabasikari ba Babulonia sinayerwe tawe; nahonie obulamu bubwe.”

³Khandi bahul'la mbu mbabool'langa mbu OMWAMI aboolanga mbu, “Nzia okhura litookho mumakhono kabasikari ba Babulonia ma nabalifumile.”

⁴Ma abemeli nibatsia khumuruchi nibamubool'la mbu, “Omundu uyo okhwola yerwe. Munjila yal'lomelangamwo iyi achilanga abasikari bemwitookho nibafwa emioyo, khandi akholanga mbwo khubandu bandi bosi abasili mwitookho muno. Siatemanga okhukhonya abandu tawe; yenyanga butswa okhubasalisia.”

⁵Omuruchi Sedekia nabakalusia mbu, “Namalahi okhusila, khe, mukhol'le kosi akamwenya; sindi onyala okhumwikal'la tawe.”

⁶Kho bamala nibambukula ma nibanzisia nemikoye mubuko bwesitaho siomusiani womuruchi olangwanga Malichia esiali nisiyabwa mumukitsi kwehango homuruchi. Amaatsi sikali musitaho yisio tawe, amatohi konyene niko akalimwo, ma ndamala nindehinikha mukari muko.

⁷Nikarali, Ebedimeleki Omuetsopia, omulate owali natiyanga hango homuruchi, yahul'la mbu bafuubile mwiko liesitaho. Olwene yilwo omuruchi yali nali musiina hasilibwa sia Benjameni.

⁸Kho Ebedimeleki yamala natsiayo ma nabool'la omuruchi mbu,

⁹“Omwami woluyali, akabandu yaba bakhol'le namabi. Bamal'le okhufuuba Yeremia mwiko liamaatsi kesitaho, aha kali kololi yetsa khufwa khulwe inzala sichila ebiakhulia sibisilikhwo mwitookho tawe.”

¹⁰Ma omuruchi nalaka Ebedimeleki okhubukula abandu bataru khulwo okhukhwesa okhurula mwiko liamaatsi kesitaho nisili okhufwa.

¹¹Kho Ebedimeleki natsia nabandu yabo munzu yomuruchi musikoti siebindu bibiikhwangamwo, nibabukulamwo tsingubo tsikhulu etsia bara khumukoye ma nibesia hasi mwiko mwandali.

¹²Ebedimeleki yambool'la ree tsingubo tsikhulu yitsio mutsikwaha kho emikoye chilekhe okhusaalisia. Ndakhola mbwo,

¹³ma nibaakhwesa okhurula mwiko liamaatsi. Olunyuma lwe yaka baara mumukitsi kwahango homuruchi.

¹⁴Litukhu lindi omuruchi Sedekia yarumania, amang'ana nderwe khuye nali habwinjil'lo bwakhataru bwe Hekalu ma niyambool'la mbu, “Nzia okhureeba lireebo ne nyenyanga umbool'le akatooto.”

¹⁵Nase ningalusia mbu, “Nindakhakhubool'la akatooto, witsa khunzira, ne nindakhubool'la amachetsiyio siwitsa okhubukulakhwomwo obukono tawe.”

¹⁶Kho omuruchi Sedekia niyasubisia masilisi mbu, “Ndesuhanga khu Nyasaye mulala, Nyasaye wakhuhelesia obulamu, mbu sinakhwire kata nohomba sinakhure mumakhono kabandu benyanga okhukhwiira tawe.”

¹⁷Ma ndamala nimbool'la Sedekia mbu OMWAMI Wokhunyala Biosi, Nyasaye wa Isiraeli yali khuboola mbu, “Niwakhehaana mumakhono kabakhongo bomuruchi wa Babulonia, nohonie obulamu bubwo ne litookho lino sinalisambwe tawe. Ibe halala nabeinyumba yiyo sinabeerwe tawe.

¹⁸Nebutswa norakhehaana mumakhono kabwe, kho litookho yili nalihanwe mumakhono kabandu ba Babulonia, ma nabalisambe liosi, ne ibe sinohonokokhe mubo tawe.”

¹⁹Nebutswa omuruchi Sedekia nakalusia mbu, “Ise ndi noburi khubandu befwe abomusibala muno abelukha okhutsia Babulonia. Nyala okhureebwa mumakhono kabwe ma bakhupie esibi.”

²⁰Nase nimubool'la mbu, “Sinorebwe mumakhono kabwe tawe. Khusaayanga olonde amang'ana ko MWAMI aboolanga; ma kosi kakhaba amalahi khuibe ma obulamu bubwo bwakhahonokokha.

²¹Nebutswa OMWAMI umanyisie mumabisulo akanakekholekhe noba niwakhasuula okhwehaana mumakhono kabwe.

²²Mumabisulo yako, ndali okhulola abakhasi bosi abali nibasikala hango homuruchi wa Yuda nibayilwanga khubakhongo bomuruchi wa Babulonia. Hulila khukabali okhuboola olwa bali nibatsitsanga: ‘Abalina bomuruchi abasubilwa bali okhumukaata, bamuyembel'la netsingufu. Neluno elwebilenje bibie bieinikhile mwitohi, abalina baabe bamwilukhile.’ ”

²³Ndamala nimeeta okhuboola mbu, “Abakhasi benywe bosi halala nabaana nabahilwe khubandu ba Babulonia ne ibe omwene sinohonokokhe okhurula khubo tawe. Nofumilwe okhuba omuhambe nomuruchi wa Babulonia ne litookho yili nalisambwe liosi.”

²⁴Sedekia nakalusia mbu, “Orakhalekha omundu wosi amanyekhwo akakhul'lomelenje n'nawe tawe, kho obule okhufwa.

²⁵Abemeli nibakhahul'la mbu n'nomelenje n'nawe, betsa khwitsa okhukhureeba ibe obabool'le aka khubooyenje. Betsa okhusubisia mbu sinabakhwire tawe nikali wakhababool'la kosi akakhubooyenje.

²⁶Ibe obabool'le butswa mbu usaayilenje mbu rakhukalusiakhwo mubuhambe okhufwilamwo tawe.”

²⁷Ma abakhulundu bosi betsa ma nibareeba mbabool'le akakhubooyenje, ne ndamala nimbabool'la akomuruchi yali niyambooleye mbabool'le. Libulaho liosi eliabakhakhol'le, sichila abulaho owali nahuliye akakhwal'lomanga.

²⁸Ne ndali khubikhwa mumukitsi kwahango homuruchi okhwola litukhu lia Yerusalemu yafumilwa.