Read lunyore YEREMIA 4 Bible Online

YEREMIA 4 - lunyore bible

YEREMIA 4

¹OMWAMI aboolanga mbu, “Inywe abandu ba Isiraeli, nimwakhenya khuhunzukha, kho mukalukhe khu ise. Nimwakhahinia ebiniini ebia mwekayakayanga ebia ndasinyikhila, ma mube abasubilwa khuise,

²kakhaba habwene inywe okhwesuha nimurumikhilanga eliira lianje. Nilwo olwabandu betsimbia tsiosi bakhareeba okhubalaamila tsikhabi, ma babe abanyala okhunzitsoomia.”

³OMWAMI abool'langa abandu ba Yuda nende Yerusalemu mbu, “Mulime emikunda chienywe echisili okhulimwa; muraraka imwo yenywe mumahwa tawe.

⁴Muhesie akeindakano yenywe n'nase, ise OMWAMI wenywe, ma muhaane obulamu bwenywe khu ise, inywe abandu ba Yuda nende Yerusalemu. Nimurakhola mbwo tawe, lirima lianje litsa khuba liibi okhusila ne abulaho wosi onyala okhulisisimasia.”

⁵Mukhupe olwika musibala siosi! Muhanzukhe butinyu nimuribula bulahi! Mubool'le abandu ba Yuda nende Yerusalemu okhwilukhila mumatookho kasirwa namasisi.

⁶Manyie ependela yokhutsia Sayuni. Mwilukhileho khulwokhunyoola omulembe! Murasisil'la tawe! OMWAMI aleeranga likhupako nende okhukhuywa okhukali okhurul'la elubeka lwe Sinyolu.

⁷Singa esimba erulanga mubukono obwayebisangamwo, omundu wokhumulula tsinzibulo wol'le. Yetsanga okhumulula Yuda. Amatookho ka Yuda kalalekhwa nikasasikhile, ne sialiho owakhamenye muko khandi tawe.

⁸Mwebiikhe tsingubo tsiamatasi, ma mwekhuule nende okhulakaya, sichila lirima lio MWAMI lilulu silirul'le khusibala sia Yuda tawe.

⁹OMWAMI yaboola mbu, “Litukhu yilio abaruchi nende abemeli bakhakosie olutswoni lwabwe; ne abesaalisi bakhachenye ne abaroobi bakhahuke.”

¹⁰Nilwo olwa ndaboola mbu, “OMWAMI Nyasaye, umal'le khukaata abandu ba Yerusalemu kupu! Obooye mbu omulembe kwitsa okhubaho, nebutswa olukanga luli makosi kabwe.”

¹¹Inyinga yitsanga eyabandu ba Yerusalemu nababool'lwe mbu omuyeka okwayia pa kuhungutsanga okhurula musitsiimi nikwitsa aha bali. Sinakube omuyeka okuhungutsanga kalaha okwokhuhinia omukhuutsi tawe.

¹²Omuyeka kwo MWAMI alakanga okhwitsa kwakhabe okwetsingufu okhuyomba yikwo! OMWAMI omwene niye oribulanga obukhalachi khubandu baabe.

¹³Henge, abasuku betsanga singa amalumbesi. Amakaari kelihe kafwana singa omuyeka kwesihutsutsu, ne etsisululi tsiabwe tsilukhanga bwangu okhuyomba tsinditsu. Ifwe khukor're! Ifwe khufwiye!

¹⁴Yerusalemu, saaba tsimbi tsitsio okhurula mumwoyo kukwo, kho obe onyala okhuhona. Niluhono sina olwa nokanakanenje amapaalo ketsimbi?

¹⁵Abarumwa okhurula mwitookho lia Dani nende abarumwa okhurula mubikulu bia Efuraimu baribulanga amang'ana amabi.

¹⁶Betsele okhuchetsiyia abetsinzibulo nende okhubool'la Yerusalemu mbu abasuku betsanga okhurula musibala siehale. Abasuku yaba betsa okhukhupila amatookho ka Yuda liyoka

¹⁷ma bafumbile Yerusalemu singa abandu abalindanga omukunda, sichila abandu ba Yerusalemu bakholeye OMWAMI indiri. OMWAMI umal'le khuboola.

¹⁸Yuda, ibe omwene weleereye yaka munjila yawamenyeyenjemwo nende ebindu biawakhol'lenje. Tsimbi tsitsio nitsio etsiler're omunyakhano yiku; tsimal'le okhufumira omwoyo kukwo.

¹⁹Mako obwa nzunungwa! Sindi onyala okhwefila okhutsunwa yikhu tawe! Omwoyo kwanje! Omwoyo kwanje kwilukhanga butinyu! Sindi onyala khusiling'ana tawe; mbul'langa tsinzika nitsikhupa, khandi nende liyoka liobulwani.

²⁰Likhupako lilondanga likhupako lindi; esibala siosi sisikaye mubusasikhi. Amaheema kefwe kamuluywe matetekhana; etsipasia tsiako tsiranduywe mubitonye.

²¹Niluhono sina olwa nzia okhulola obulwani nibulul'le, nende okhuhul'la tsinzika nitsikhupanga?

²²OMWAMI aboolanga mbu, “Abandu banje nabahingwa; sibaamanyile tawe. Bafwana singa abaana abahingwa; sibali nende khumanyilisia tawe. Bamanya obwokhukhola amabi, nebutswa bakorwa okhukhola amalahi.”

²³Ndahenga esibala — siali esiomu sila esindu siosi esikhulanga; nimenga mwikulu — obulafu sibwalimwo tawe.

²⁴Nimenga khubikulu — biali nibitechelanga, khandi ebianikisio biaruumanga imbeli neinyuma.

²⁵Ndahenga nindola abandu sibaliho tawe; kata amanyonyi kali nikapulukhile okhutsia ehale.

²⁶Liloba linolu liali nilikwiye esitsiimi, amatookho kalio kali nikasasikhile khulwe lirima lio MWAMI lilulu.

²⁷OMWAMI yali okhuboola mbu, esibala siosi nasimumwe, sikwe esitsiimi, nebutswa sinasimume siosi tawe.

²⁸Esibala nasiekhuule; ne likulu nalimwame. OMWAMI umal'le okhuboola, ne sinakalukhanie amapaalo kaake tawe. Umal'le okhukhalaka lichoomo lilie, khandi sinakalukhane tawe.

²⁹Olwa nabahulile liyoka liabelusi betsisululi halala nende eliabalasi bobuhingo, buli mundu nayelukhe. Abalala nabelukhe okhutsia mumitsuru, abandi nabanine mumachina. Buli litaala nalisikale eliele sila abandu, ne abulaho owakhamenye mumataala imwo khandi tawe.

³⁰Yerusalemu, ibe ukhalachiywe okhufwa! Esichilanga niwebiikha tsingubo tsisembe nisina? Esichilanga niwebiikha ebimili nende okhubakha erangi khubisiche bietsimoni tsitsio nisina? Welombanga okhuba owelikondo lilahi sila esifune! Abasaatsa baabo bamal'le okhukhusuula ma benyanga okhukhwiira.

³¹Ndali okhuhulila okhulakaya, singa okhwomukhasi olumwanga, ekhwisi singa eyomukhasi owibulanga omwana wambeli. Khwali okhulakaya khwa Yerusalemu khwokhukamul'la emiiya, nachingulanga omukhono kukwe naboola “Wooi, fwitsanga! Betsanga khunzira!”