Read lunyore YEREMIA 40 Bible Online

YEREMIA 40 - lunyore bible

YEREMIA 40

¹OMWAMI yal'loma n'nase inyuma wa Nebusaradani, omukali wabasikari namal'le okhundakhuula nikhwol'le Rama. Ndali nindahilwayo nimbohelwe muminyololo halala nabandu bandi bosi abali okhurula Yerusalemu nende Yuda abali nibahilwa Babulonia singa abasumba.

²Omukhongo wabasikari yambila hasibeka ma naboola mbu, “OMWAMI Nyasaye uwo yalaka nakhuye esibala sino

³ne luno ukhol'le akayabooye nakhole. Yaka kosi kakholekha sichila abandu baabo bali okhwonela OMWAMI ma khandi nibasuula okhulonda amalako kaake.

⁴Luno mbinianga eminyololo yichi khumakhono kaako nende okhukhola obe omulakhuule. Niwenya khutsia n'nase Babulonia onyala okhukhola mbwo, nase nzia okhukhutenda. Nebutswa norakhenya okhutsia Babulonia, sikakhutakhanga otsie tawe. Oli nesibala yisi siosi esionyala okhwelamwo ahokhutsia ma onyala okhutsia habundu hosi hawenyele.”

⁵Olwa rakalusia ling'ana liosi, Nebusaradani naboola mbu, “Kalukha khu Gedalia, omusiani wa Ahikamu, omwitsukhulu wa Safani owomuruchi wa Babulonia yakhola okhuba omukafuna wamataala ka Yuda. Onyala okhumenya n'naye ma omenye nabandu benywe nohomba onyala okhutsia habundu hosi hopaalanga okhutsia.” Ma niyambelesia esihanwa nende ebiakhulia biokhuchinga kho mbe onyala khutsia habundu hosi.

⁶Ndatsia khumenya nende Gedalia habundu halangwa Misipa ma nimenya nende abandu abali nibalekhwa musibala yimwo.

⁷Balala khubasikari abakhongo halala nabasikari bandi ba Yuda sibaali nibehan'ne mumakhono kabasikari ba Babulonia tawe. Bahul'la mbu omuruchi wa Babulonia yali namukhol'le Gedalia okhuba omukafuna wa Yuda ma namukhol'le okhuba omulindi we yabo bosi abarahilwa Babulonia — abandu abali abatakha okhusila musibala yisio.

⁸Kho Ishimaeli omusiani wa Netsania, nende Yohanani omusiani wa Kareha, nende Seraya omusiani wa Tanihumetsi, nende abasiani ba Efai okhurula Netofa, nende Yesania okhurula Maaka batsia nabandu babwe khu Gedalia ha Misipa.

⁹Gedalia nababool'la mbu, “Muhetsanga ling'ana lianje mbu murabba noburi okhwehaana mumakhono kabandu ba Babulonia tawe. Menye musibala sino ma murumikhile omuruchi wa Babulonia, ne kosi ketsa okhuba amalahi khwinywe.

¹⁰Ise omwene nzia okhumenya Misipa ma mbe omukobokheli wenywe olwa abandu ba Babulonia betsa hano. Nebutswa munyala okhuchesa ma mubikhe mubiachi ewaini, amatunde nende amafura komuseituni, ma mumenye mumataala kamwitsa okhumenyamwo.”

¹¹Olwe yako kali nikekholekhanga, Abaisiraeli abali nibali mu Moabu, Amoni, Edomu nende mubibala bindi bahul'la mbu omuruchi wa Babulonia yali okhuhuchil'la Abaisiraeli bandi okhutsilil'la okhumenya musibala sia Yuda, ma khandi wamukhola Gedalia okhuba omukafuna wabwe.

¹²Kho bamala nibarula habundu ha bali nibasalanibwa okhutsia ma nibakalukha Yuda. Betsa khu Gedalia habundu halangwa Misipa, ne habwene yaho nibabunjelesia ewaini inyinji halala namatunde amenji.

¹³Inyuma we yako, Yohanani nende abemeli babasikari baraali nibehan'ne abene mumakhono kabandu ba Babulonia betsa khu Gedalia nali Misipa

¹⁴ma nibamubool'la mbu, “Siomanyilekhwo mbu omuruchi Baalisi wa Amoni yarumile Ishimaeli okhukhwiira tawe?” Nebutswa Gedalia siyakasubila tawe.

¹⁵Ma Yohanani namubool'la masilisi mbu, “Lekha nzie okhwira Ishimaeli, ne abulaho owanomanye omwir're. Busina ahuchil'lwe okhukhwiira? Yako ketsa okhuchila Abayahudi bosi abebunjikhile aholi basalane, khandi ketsa okhuleera omunyakhano khubandu bosi abalekhwa mu Yuda.”

¹⁶Nebutswa Gedalia nakalusia mbu, “Orakhakhola mbwo tawe! Akoboolanga khu Ishimaeli sikali akatooto tawe!”