Read lunyore YEREMIA 41 Bible Online

YEREMIA 41 - lunyore bible

YEREMIA 41

¹Mumwesi kwakhane nakhataru omuhika yikwo, Ishimaeli, omusiani wa Netsania, omwitsukhulu wa Elishama, mulala khubeinyumba yoburuchi khandi mulala khubakhulundu abakhongo bomuruchi, yatsia Misipa nabandu likhumi okhulola Gedalia. Olwa bali nibalitsanga esiakhulia bosi,

²Ishimaeli nende abandu likhumi aba yali n'nabo bahiinia tsinganga ma nibeera Gedalia.

³Ishimaeli khandi naye yera Abaisiraeli bosi abali nibali nende Gedalia ha Misipa halala nabasikari ba Babulonia abali nibali habwene yaho.

⁴Litukhu elialondakhwo, omundu wosi nasili okhumanya akokhwirwa khwa Gedalia,

⁵abandu amakhumi munane betsa okhurula Shekemu, Shilo nende Samaria. Bali nibabekele tsindefu tsiabwe, nibaranduye tsingubo tsiabwe khandi nibefumir're abene. Bali mbayilanga obuswache nende manemane khulwokhuhaana omusango Muhekalu.

⁶Kho Ishimaeli yarula Misipa natsia okhubabukan'na, niyekhuulanga olwa yali natsitsanga. Olwa yoola khubo yababool'la mbu, “Yanze mwinjile mulole Gedalia.”

⁷Olwa bali nibakhenjila mwitookho, Ishimaeli nende abandu babe babeera ma nibafuba emibili chiabwe mubuko bwamaatsi kesitaho.

⁸Nebutswa balikhwo abandi likhumi khumukanda ikwo ababool'la Ishimaeli mbu, “Noyanza orakhwira tawe! Khuli nende ingano, eshairi namafura komuseituni nende obuukhi bwakhubisile mubulimo.” Kho siyamala abere tawe.

⁹Obuko bwesitaho siamaatsi esia Ishimaeli yafuubamwo emibili chiabandu basaatsa ba yali niyeer're nisio esiali esikali esiomuruchi Asa yali okhuyaba olwa yali naserwanga nomuruchi Baasha wa Isiraeli. Ishimaeli yetsusiamwo emilambo chiabandu.

¹⁰Ma Ishimaeli nabara mubuhambe abakhaana bomuruchi halala nabandu bandi bosi abali Misipa aba Nebusaradani, omukhongo wabasikari yali niyara mubulindi bwa Gedalia. Ishimaeli nabakhola khuba ababohe ma natsia n'nabo khunjila ehengele musibala sia Amoni.

¹¹Yohanani halala nabemeli bosi babasikari bayali n'nabo bahul'la amang'ana amabi yako aka Ishimaeli yali nakhol'le.

¹²Kho bamala nibamulondel'la halala nabandu baabe ma nibabanyool'la ahembi nelitubango likali liamaatsi elili Gibeoni.

¹³Olwa ababohe ba Ishimaeli balola Yohanani nende abemeli babasikari nibali n'naye, basangala,

¹⁴ma nibasukhana nebelukha okhutsia khubo.

¹⁵Nebutswa Ishimaeli halala nabandu baabe munane barula khu Yohanani ma nibelukha okhutsia musibala sia Amoni.

¹⁶Ma Yohanani nende abemeli babasikari ba yali n'nabo nibabukula omulimo kwokhubalinda abandu bosi aba Ishimaeli yali nafumiye singa ababohe okhurula Misipa olwa yali namal'le okhwira Gedalia — abasikari, abakhasi, abaana nende abalate.

¹⁷Batsilil'la noluchendo ma nibasinjila habundu halangwa Gerutsi Kimuhamu ahembi Betselehemu nibali khuluchendo lwokhutsia Emisiri,

¹⁸khulwo khwilukha Abababulonia. Bali noburi sichila Ishimaeli omusiani wa Netsania yali niyeer're Gedalia omusiani wa Ahikamu owomuruchi wa Babulonia yali niyemekha okhuba omukafuna wesibala yisio.