Read lunyore YEREMIA 42 Bible Online

YEREMIA 42 - lunyore bible

YEREMIA 42

¹Ma abemeli babasikari bosi, nibalimwo Yohanani omusiani wa Kareha nende Asaria omusiani wa Heshaya, betsa nabandu okhurula mumikhoosi chiosi

²ma nibambool'la mbu, “Noyanza okhole akakhwitsa okhukhulaka! Okhureebele amasaayo khu MWAMI Nyasaye wefwe. Okhusaayila ifwe fwesi, abamal'le okhuhonokokha. Amatukhu kabir're khwali abandu abenji; nebutswa luno nibatititi khuifwe abasili mwoyo, singa obwonyala okhulola omwene.

³Osaaye mbu OMWAMI Nyasaye wefwe nakhumanyie injila yakhunyala khulondakhwo nende ake ifwe khunyala okhukhola.”

⁴Nase ningalusia mbu, “Namalahi okhusila, kho nzia okhusaaya khu MWAMI Nyasaye wefwe singa muureebele, ne kosi akayetsa okhuboola, nzia okhumubool'la ne sinzia okhumubisakhwo ling'ana liosi eliambool'lwa tawe.”

⁵Ma nibambool'la mbu, “OMWAMI akhoyele okhuba omukobokheli watooto khandi omusubilwa khu ifwe nikali sikhwakhalonde amalako ko MWAMI Nyasaye wefwe akhuhelesia ibe khulwe ifwe okhulonda.

⁶Kata kabe akokhuyanzisia nohomba akabula okhuyanzisia, ifwe khwitsa okhulonda amalako ko MWAMI Nyasaye wefwe, owe ifwe khureebanga ibe okhusaaya. Kosi ketsa okhuba amalahi khu ifwe nikhwakhalonda amalako kaake.”

⁷Amatukhu likhumi nikabir're OMWAMI yal'loma n'nase;

⁸kho ndalanga Yohanani halala nabemeli babasikari bosi aba yali n'nabo, nende abandu bandi bosi.

⁹Nimbabool'la mbu, “OMWAMI Nyasaye wa Isiraeli owa mwali okhurumakhwo mbu musaaye abooye mbu;

¹⁰‘Nikali mwakhahuchil'la okhutsilil'la okhumenya musibala yisi, kho ndakhamwombokha, ne sinamusambul'le tawe; namusimikhe ne sinamwihe tawe. Esibi esiandali okhumuleer'ra siaimbelesia esibeela.

¹¹Mulekhe okhutsilil'la okhuba noburi khumuruchi wa Babulonia. Ise ndi n'nenywe khandi namusoole okhurula mumakhono kaake.

¹²Sichila ise ndi netsimbabasi namukhole naye nabe netsimbabasi khwinywe ma amulekhe mukalukhe ingo wenywe. Ise OMWAMI mal'le okhuboola.’

¹³“Nebutswa nimwakhaboola mbu, ‘Ifwe sinakhumenye musibala yisi ma mubule okhuhulila OMWAMI Nyasaye wenywe,’

¹⁴khandi nimwakhaboola mbu, ‘Ifwe nakhutsie okhumenya Emisiri hanakhubule okhulolakhwo lihe nohomba hanakhubule okhuhul'lakhwo omulango kwobulwani nohomba aheinzala nebule okhukhuluma.’

¹⁵Nikali inywe abasikala musibala sia Yuda mwakhaboola yaka, kho muhul'le ako MWAMI Wokhunyala Biosi, Nyasaye wenywe aboolanga: ‘Nikali mulol'le mbu okhwola mutsie okhumenya Emisiri,

¹⁶khe lihe liamuteemanga okhuria nalimunyoole ebwene yiyo neinzala yamuritsanga nemulonde ebwene yiyo ma namufwile Emisiri bwene yiyo.

¹⁷Abandu bosi abalolanga mbu okhwola batsie okhumenya Emisiri, bakhafwile mwihe nohomba bafwe khulwe inzala, nohomba bakhafwe khulwo obulwaye. Abulakhwoho khubo kata mulala owakhahonokokhe, abulakhwoho kata mulala owakhabule okhunyoola likhupako elianzia okhuleera khubo.’

¹⁸“OMWAMI Nyasaye wa Isiraeli aboolanga mbu, ‘Singa obwelirima lianje nende obululu bwanje bwasundulwa khubandu ba Yerusalemu, nimbwo obululu bwanje nabusundulwe khuinywe nimuba nimwakhatsia Emisiri. Mwakhabe ababi okhusila mutsimoni tsiabandu, abandu bakhamukhol'lekhwo inzekhelesi ma barumikhile eliiralienywe singa esilaamo. Simwakhalolekhwo habundu hano khandi tawe.’ ”

¹⁹Ma ninzilil'la okhuboola mbu, “OMWAMI umubooleye inywe abandu basikala musibala sia Yuda mbu mulekhe okhutsia Emisiri. Kho muchetsiyianga luno

²⁰sichila mukholanga ling'ana liibi. Mwali okhuureeba mbu musaayile khu MWAMI Nyasaye wefwe ma nimuusubisia mbu mwitsa okhukhola kosi ako MWAMI yetsa okhumulaka okhukhola.

²¹Ne luno mal'le okhumubool'la, nebutswa mufukulanga siesindu sio MWAMI Nyasaye wefwe yarumile mubool'le.

²²Khulwe yako mwetsul'le kano: namufwile mwihe nohomba inzala nemwire nohomba obulwaye nabumwir're musibala siamwenya okhutsia okhumenyamwo.”