Read lunyore YEREMIA 44 Bible Online

YEREMIA 44 - lunyore bible

YEREMIA 44

¹OMWAMI yali okhul'loma n'nase khumang'ana ka Baisiraeli bosi abali nibamenyanga Emisiri, mumataala ka Migidoli, Tahapanihesi nende Mefisi nende elubeka wenandete wesibala sie Misiri.

²OMWAMI Wokhunyala Biosi, Nyasaye wa Isiraeli yaboola mbu, “Inywe abene mwalola amanyakhano kandaleera khu Yerusalemu halala namataala ka Yuda kandi. Kata luno kasisasikhilenje ma abulaho omenyele muko

³sichila abandu bamwo bali okhukhola tsimbi manibaakhola okhuba noburima. Bahaana emisango khubanyasaye bandi ma nibarumikhila abanyasaye aba bo nohomba aba bakuka babwe barayekayakayakhwo olundi tawe.

⁴Ndatsilil'la okhumurumila abarumikhili banje, abaroobi, abali okhumubool'la murakhola amang'ana amabi yaka tawe.

⁵Nebutswa simwahuyiakhwo nohomba okhubukula obukono muko tawe. Simwali abanyala khulekha ifwo yenywe imbi eyo okhuhaana emisango khubanyasaye bandi tawe.

⁶Kho ndamala nisundula oburima bwanje nende lileko lianje khumataala ka Yuda nende khumihanda chia Yerusalemu. Kamala nikononekha ma nikaba amabi ake tsimoni tsirakolakhwo tawe, singa obwa tsilolekhanga olwaleelo.

⁷“Khulwe yako, Ise OMWAMI Wokhunyala Biosi, Nyasaye wa Isiraeli, luno reebanga inywe mbu, busina mukholanga esindu esibi yisi khwinywe abene. Mwenyanga muleere okhumululwa khwabasaatsa nende abakhasi, abaana nende abaana basili batoro kho abulekhwoho kata mulala khubandu benywe owakhaba mwoyo?

⁸Esichilanga nimumba lirima khulwo okhwekayakaya ebiniini nende okhuhaana emisango khubanyasaye bandi bali Emisiri, ha mwetsa okhumenya nisina? Mukholanga yaka khulwo okhweira abene, kho buli lihanga musibala libe elinyala okhumutsekhel'la nende okhurumikhila eliiralienywe singa esilaamo?

⁹Inywe mwayibil'la amang'ana amabi akakholwa mumataala ka Yuda nende mumihanda chia Yerusalemu nende abakuka benywe, halala nabaruchi ba Yuda nende abakhasi babwe, nende inywe halala nabakhasi benywe?

¹⁰Okhwola litukhu lino musili okhwetutuyiakhwo inywe abene. Musili khumbelesiakhwo oluyali kata okhumenya nimulondanga amalako kosi akandamuhelesia halala nabakuka benywe.

¹¹“Khulwe yako, Ise OMWAMI Wokhunyala Biosi, Nyasaye wa Isiraeli, namukalukhane ma namulule Yuda yosi.

¹²Ne khu yabo abandu ba Yuda, abahonokokha ma balolanga okhwola batsilil'le okhumenya Emisiri, nzia okhulola mbu bosi bakhuyilwe. Bosi pe, abakhongo nende abatu bakhafwile Emisiri. Abalala bakhafwile mwihe, ne abandi inzala yakhere. Kakhabe amabi okhusila akokhurisia; abandu bakhabatsekhel'le nende okhurumikhila eliira liabwe singa esilaamo.

¹³Ndakhahaane esinyasio khu yabo abamenyele Emisiri singa esia ndahelesiakhwo Yerusalemu — mbu, lihe, inzala nende obulwaye.

¹⁴Abulakhwoho kata mulala khubandu ba Yuda abasikala ma nibatsia okhumenya Emisiri owakhahonokokhe nohomba owakhabe mwoyo tawe. Abulakhwoho kata mulala owakhakalukha musibala sia Yuda, aha bekombanga okhumenya khandi abulaho owakhakalukhe musibala sia Yuda nibarali abandu bati abelukhila musibala sindi.”

¹⁵Ma abasaatsa bosi abali nibamanya mbu abakhasi babwe bahaana emisango khubanyasaye bandi, ne abakhasi bosi abali nibasinjiye habwene yaho, nibalimwo Abaisiraeli abamenyanga enandete we Misiri — kwosi kwali omukanda omukali — nikumbool'la mbu,

¹⁶“Ifwe khusuuye okhuhul'la akokhubooleye norumikhilanga eliira lia MWAMI.

¹⁷Ifwe khwitsa okhukhola ebindu biosi ebiakhubooye nakhukhole. Khwitsa okhuhaana omusango khunyasaye mukhasi, Omukhaye womuruchi wo Mwikulu, khandi khwitsa okhusundula omusango kwewaini khunyasaye mukhasi uyo, singa obwe ifwe nende abakuka befwe, omuruchi wefwe nende abemeli befwe bakholanga mumataala ka Yuda nende khumihanda chia Yerusalemu. Ma nikhuba nebiakhulia ebinji khandi khwanyoola emiandu eminji, ma sikhwalikhwo namanyakhano kosi tawe.

¹⁸Nebutswa okhurula nikhulekha okhuhaana omusango khu Mukhaye wo muruchi wo Mwikulu khandi nikhulekha okhusundula omusango kwewaini khuye, sikhwanyoolakhwo esindu siosi tawe, ma abandu befwe bafwila mwihe ne abandi bafwa khulwe inzala.”

¹⁹Khandi abakhasi nibameeta okhuboola mbu, “Olwa khwatekha etsikeki tsifwana esiniini siomukhaye Womuruchi wo Mwikulu, nikhuhaana khuye omusango khandi nikhusundula omusango kwewaini khuye, abasaatsa befwe bali khusanga mukakhwakholanga.”

²⁰Ma nimbool'la abasaatsa bosi nende abakhasi abali nibangalusisie munjila yiyi mbu;

²¹“Emisango chienywe nende echia abakuka benywe, halala nechiabaruchi benywe nende abemeli benywe halala nende echiabandu basibala yisio bahaana mumataala ka Yuda nende mumihanda chia Yerusalemu — mupaalanga mbu OMWAMI siyaali okhumanya tawe nohomba mupaalanga mbu yali okhwibil'la akemisango yichio?

²²Litukhu liolwaleelo lino esibala sienywe sili mubusasikhi ne abulaho omenyele musio. Silolekhanga esirayanzisianga mutsimoni ma abandu barumikhilanga eliira liasio singa esilaamo sichila OMWAMI siyali onyala okhwefiila obukholi bwenywe obubi khandi obwetsimbi tawe.

²³Likhupako lialunondi yili litsile khu inywe sichila mwahaana emisango khubanyasaye bandi ma nimumwonela OMWAMI khulwo khubula khulonda amalako kaake kosi.”

²⁴Ma Yeremia nabool'la abandu bosi halala nabakhasi mbu: “Hulile ling'ana lio MWAMI inywe abandu ba Yuda, abamenyele Emisiri.

²⁵Kano niko ako MWAMI Wokhunyala Biosi Nyasaye wa Isiraeli aboolanga: Inywe nende abakhasi benywe mwamala okhulomba esiesuho khu Mukhaye wo Muruchi wo Mwikulu nimusubisianga ebiokhumuhelesia. Mwali okhumusubisia mbu namuhanile emisango khandi nam'musundule omusango kwewaini khuye, ma mwahesia amasubisio kenywe. Tsilil'le okhuhesia lisubisio! Tsilil'le okhuhesia ebiesuho bienywe!

²⁶Nebutswa luno huyie khusiesuho sie Ise, OMWAMI ndalomba mubunyali bweliira lianje khu Baisiraeli bosi abali Emisiri. Sinambuchil'lekhwo khandi inywe okhurumikhila eliira lianje khulwo okhulomba esiesuho nimuboolanga mbu, ‘Ndesuhanga muliira lio MWAMI Nyasaye oli mwoyo!’

²⁷Nandole mbu simunyoolanga obuhinda tawe, nebutswa mulamululwa. Inywe mwesi namufwe, balala namufwile mwihe ne abandi olufu nalwire, okhwola olwa namufwe mwesi.

²⁸Nebutswa batititi khwinywe nabahonokokhe okhufwa ma nabakalukhe okhurula Emisiri nibatsia Yuda. Ma abakhabula okhufwa bakhamanyilisie mbu nimang'ana kawina akabeye katooto, akanje nohomba akabwe.

²⁹Ise, OMWAMI nzia okhuhaana esimanyilo mbu namuler're amanyakhano musibala yisi ne lisubisio lianje mbu namuler're amanyakhano lilaba eliatooto.

³⁰Nare omuruchi Hafura we Misiri mumakhono kabasuku baabe abenyanga okhumwira singa obwa ndara omuruchi Sedekia wa Yuda mumakhono komuruchi Nebukadinesa wa Babulonia owali omusuku uwe owarunanga okhumwira.”