Read lunyore YEREMIA 48 Bible Online

YEREMIA 48 - lunyore bible

YEREMIA 48

¹Kano niko ako MWAMI Wokhunyala Biosi yali okhuboola khu Moabu: “Balitsiboolelwa abandu ba Nebo! Litaala liabwe limuluywe! Kiriatsaimu lifumiywe, tsiminga tsialio tsietsingufu tsilikuliywe, ne abandu balio basimbibibwe emirwe;

²oluyali lwa Moabu lukor're. Abasuku bafumiye Heshiboni, khandi baloosianga masilisi okhumuma lihanga lia Moabu. Khandi litaala lia Madimeni nalisiling'anibwe; abasikari nabatsie okhuliseera.

³Abandu ba Haronaimu bahanzukhanga nibaboola mbu, ‘Indiri! Okhumumwa!’

⁴“Moabu limal'le okhumumwa, hulile abaana balio balakayanga.

⁵Hulile amalakayo kokhutsunwa khumuhanda okutsitsanga Luhitsi, amalakayo kesibi khunjila ekongomanga Horonaimu.

⁶Baboolanga mbu, ‘Yilukhe bwangu muhonie obulamu bwenywe! Mwilukhe singa epunda yomusitsiimi!’

⁷“Moabu, ibe wasubila mbu tsingufutsio, nende obuhindabwo nabikhuhonie, nebutswa luno ibe nolekwe; omunyasaye uwo Kemoshi natsie mubuhambe, halala nabaamibe nende abesaalisibe.

⁸Omwiri wokhumuma nayetse khusielitaala, ne libulaho litaala kata elala elianalihonokokhekhwo tawe; Libanda nalimumwe khandi esibala esihelanu nasimumwe. Ise OMWAMI mal'le okhuboola.

⁹Yombokhela Moabu esilindwa; lili ahembi okhumumwa. Amataala kalio nakalekhwe nikasasikha, ne omundu wosi sinamenyekhwomwo khandi tawe.”

¹⁰Esilaamo sibe khumundu orakholanga omulimo kwo MWAMI nesinani, khandi esilaamo sibe khuyo uyo orakhuyanga niyeera nolukanga.

¹¹OMWAMI yaboola mbu, “Moabu limenyanga mumulembe amatukhu kosi ne lisili okhuhilwakhwo mubuhambe tawe. Moabu lifwana singa ewaini eyarenjekhwa habundu sila okhusunguswakhwo khandi esili okhutsukhwakhwo okhurula muchupa okhutsia muchupa yindi tawe. Esinosi siayo sisiatsinzibakhwo tawe ne esitsanzo siayo nesibuulu singa khasotso.

¹²“Kho luno, inyinga yitsanga olwa narume abandu okhusundula Moabu hasi singa ewaini esundulwanga. Nabahinie ewaini mutsichupa ma nabatsiarake.

¹³Ma nilwo olwa Abamoabu nabasimbibwe emirwe nomunysaye wabwe Kemoshi, singa butswa obwa Abaisiraeli basimbibwe emirwe nende Betseli, omunyasaye owa bali okhusubilamwo.

¹⁴“Abasaatsa ba Moabu, nisina esichilanga nimuboola mbu muli etsichekhe, khandi singa abasikari abalulu abalwanakhwo mwihe?

¹⁵Moabu halala namatookho kalio kamuluywe, abasaatsa babwe abakosi basinzilwe. Ise nise omuruchi OMWAMI Wokhunyala Biosi, ne mal'le okhuboola.

¹⁶Esihesi sia Moabu sitsanga; okhumululwa khwalio khuli ahembi okhwola.

¹⁷“Mwekhuule khulwe lihanga yilio, inywe abamenyele ahembi khulio, nende inywe mwesi abamanyile oluyali lwalio. Boole mbu, ‘Obwami bwalio obukufu bumal'le okhufunakwa; obukongo bwalio nende tsingufu tsialio sitsisiliho tawe.’

¹⁸Inywe abamenyanga mu Diboni, mwikhe hasi murule habundu henywe aholuyali, ma mwikhale hasi mulukuukhi; Owokhumuma Moabu ali hano, ne ulekhele tsiminga tsialio okhukwa amakunda.

¹⁹Inywe abamenyanga mu Aroeri, sinjile khumihanda ma mulindil'le; murebe yabo abelukhanga, murebelesie okhurula khubo akaba nikekhol'le.

²⁰Nabo balamukalusia mbu, ‘Moabu likwiye, kho mulilakaye; lihambilwe netsisoni. Mukalandie khumuchela kwa Arinoni mbu Moabu limuluywe!’

²¹“Amatookho kesibala esihelanu kakhalachiywe esiina. Nako ni Holoni, Yahasi, Mefatsi,

²²Diboni, Nebo, Betsi Dibulatsaimu,

²³Kiriatsaimu, Betsigamuli, Betsimeoni,

²⁴Keriotsi, nende Bosira halala nende amatookho ka Moabu kosi akali ehale nende ahembi.

²⁵Tsingufu tsia Moabu tsitubuywe; obunyali bwalio bumumilwe. Ise, OMWAMI mal'le okhuboola.”

²⁶OMWAMI yaboola mbu, “Nywesie Moabu amalwa likholwe, sichila liabeye okhuukhol'la indiri. Moabu nalikalakale mumasale kalio eliene, ne abandu nabatitsekhel'le.

²⁷Moabu, witsul'langa obwa wanyokhosia abandu ba Isiraeli? Wabakhol'la singa abali nibaliil'lwe nomukanda kwabanuuli.

²⁸“Inywe abandu abamenyanga mu Moabu, murule mumataala kenywe! Tsie mumenye mumachina! Mube singa likhuulwi eliombokhanga esitsu sialio khundulo khwoluchengulukho.

²⁹Moabu ali nomwekhonyo okhusila! Mal'le okhuhul'la singa obwa abandu bamwo bali nende esunga, neinjinia nende okhwechinjil'la, khandi bepaalanga obene.

³⁰Ise, OMWAMI, manyile injinia yabwe. Obwepachi bwabwe nobwa butswa, ne amang'ana aka bakholanga sinakahindile tawe.

³¹Ma khulwako nandekhuule abandu abali Moabu bosi nende abandu ba Kiri Heresi.

³²Nandakayile abandu ba Sibima, kata okhuyombakhwo obwa nandekhuule khulwa abandu ba Yaseri. Ibe litookho lia Sibima, oli singa omusabibu okwetsisaka tsiakwo tsiolanga khu Inyanza ye Chumbi khandi etsiabambukha okhwola Yaseri. Nebutswa luno amatunde kaako akomumubasu nende tsinzabibu tsitsio tsimal'le okhumumwa.

³³Obuyanzi nende obusangali sibisili mumikunda eminolu chiesibala sia Moabu tawe. Nzikaliye ewaini elekhe okhurula musinu siokhumin'nwamwo; abulaho wosi onyala okhulomba ewaini ma akhupe liyoka liobusangali.

³⁴“Abandu ba Heshiboni nende Eleale balakayanga ne okhulakaya khwabwe khunyala okhuhul'likha kata okhwola Yahasi; khunyala okhuhulilwa nabandu abali mu Soari; khandi khuhulilwanga kata okhwola Horonaimu nende Ekilatsi Shelishiya. Kata Esitaho sia Nimurimu sikhamile.

³⁵Nanzikal'le abandu ba Moabu okhuhaana emisango emisambe habundu habwe hokhwekayakayila nende okhuhaana emisango khubanyasaye babwe. Ise OMWAMI mal'le okhuboola.

³⁶“Kho omwoyo kwanje kulakayilanga Moabu nende abandu ba Kiri Heresi, singa omundu owembanga olwembo lwamasika nakhupa lilele, sichila siesindu esia balinji n'nasio siakora.

³⁷Abandu yabo bosi babekele emirwe chiabwe ma babekele tsindefu tsiabwe. Bosi bekhalachile amakhono kabwe, khandi siamulala khubo wabiikhile tsingubo tsiamatasi.

³⁸Khubisuli biosi ebietsinyumba tsia Moabu nende mubikuuri biosi ebiaho, sibulaho esihul'likhanga nekhurali okhwekhuula, sichila mal'le okhwaraka Moabu singa echupa eyomundu arekomba tawe.

³⁹Moabu limal'le okhumululwa! Lakaya butinyu! Moabu Lihambilwe netsisoni. Likwiye likunda, ne amahanga kosi akali ahembi khulio kalitsekhel'langa. Ise OMWAMI mal'le okhuboola.”

⁴⁰OMWAMI wesuhile mbu, lihanga liletsumba Moabu singa inditsu ebambuye tsimbaha tsiayo,

⁴¹ne lilafumila amataala nende tsiminga tsia Moabu. Khwitukhu yilwo, abasikari ba Moabu balaba noburi singa omukhasi oli neinumwa yokhwibula.

⁴²Moabu lilamumwa ne sililaba lihanga khandi tawe sichila liali okhukhol'la indiri.

⁴³Ebirisio, amako nende emibero bilindil'langa abandu ba Moabu. OMWAMI umal'le okhuboola.

⁴⁴Wosi owakhateema okhwilukha ebirisio alakwa mubuko, ne wosi owakhanina okhurula mumako alahambwa nemibero sichila OMWAMI umal'le okhurechekha inyinga yokhumumwa khwa Moabu.

⁴⁵Abatimi bateemanga okhuruna obusooli mu Heshiboni, litookho liomuruchi wa Sihoni yamihanga khale, nebutswa lili mukhuyia. Omul'lo kusambile obweni bwa Moabu nende ikulu webikulu biabandu ba Moabu abayanza obulwani.

⁴⁶Mubelel'le abandu ba Moabu! Abandu abali okhwekayakaya Kemoshi bamal'le okhumumwa ne abasiani babwe nende abakhaana bahil'lwe mubuhambe singa ababohe.

⁴⁷Nebutswa mumatukhu aketsanga, OMWAMI nahindihasia Moabu khandi. Yaka kosi niko ako MWAMI yali okhuboola mbu nakekholekhe khu Moabu.