Read lunyore YEREMIA 49 Bible Online

YEREMIA 49 - lunyore bible

YEREMIA 49

¹Kano niko ako MWAMI yaboola khu Amoni: “Abasaatsa ba Isiraeli bali hena? Sialikhwoho kata mulala onyala okhusoola esibala siabwe tawe? Busina balekha abandu bekayakayanga Moleki okhubukula esibala siolwibulo lwa Gadi nende okhumenyamwo?

²Nebutswa inyinga yitsanga olwa nakhole abandu belitookho lia Rabba okhuhul'la liyoka liobulwani ma nabalilekhe niliasasibwa ne amataala kalio kasambwe kosi. Nilwo olwabandu ba Isiraeli nabakalusie liloba liabwe okhurula khu yabo abali nibalibukula okhurula khubo.

³Abandu ba Heshiboni lakaye butinyu! Litaala lia Ai lisasibwe! Abakhasi ba Rabba chiake okhwekhuula! Mwebiikhe tsingubo tsiamatasi ma mwekhuule. Mwilukhane nimukoyana. Nyasaye wenywe Moleki nahilwe mubuhambe halala nabesaalisi baabe nende abasiani bomuruchi.

⁴Nisina esichilanga inywe abandu abarali abasubilwa nimwekhonya? Tsingufu tsienywe tsihwetsekhel'langa. Esichilanga nimusubila mubunyali bwenywe ma muboola mbu abulaho owanokhuseere nisina?

⁵Nandeere okhuriisia okhukali okhurula tsimbeka tsiosi. Inywe mwesi namwilukhe. Buli mundu nayelukhenje khulwo okhuhonia obulamu bubwe, ne sikhwakhabekhwoho nende wosi owakhabunjikhe abasikari benywe halala khandi tawe.

⁶“Nebutswa olunyuma nakhole Amoni okhuhindihala khandi. Ise OMWAMI mal'le khuboola.”

⁷Kano niko ako MWAMI Wokhunyala Biosi yaboola khu Edomu: “Abandu ba Edomu sibasili nobuchesi tawe? Abandu bokhubachetsiyia sibasibabool'la akokhukhola tawe?

⁸Abandu ba Dedani, Sukhane ma mwilukhe! Mwebise! Nzia okhumuma abolwibulo lwa Esau sichila inyinga yakhoola khulwe ise okhubahelesia esinyasio.

⁹Olwabandu banokanga emisabibu, balekhangakhwo mititi khumusaala kwomusabibu ne olwa abanuuli betsanga butukhu, babukulanga yibio ebiabakhaba nibenyele bionyene.

¹⁰Nebutswa Ise mal'le okhubukula ebindu biosi khubolwibulo lwa Esau, ma fuunuye habundu habebisanga kho babe abaranyala okhwebisa khandi. Abandu ba Edomu bosi bamumilwe. Abulakhwoho kata mulala osikaye tawe.

¹¹Lekha abaana benywe ababisandu khu ise, ne nzia okhubatenda. Abakhasi abalekhwa balanyoola obukhonyi okhurula khu ise.

¹²“Kata nikali yabo abarakhoyanga okhuhebwa esinyasio bali okhunywa khusikombe siesinyasio, busina nenywe mubule okhuhebwa esinyasio? Tawe, okhwola munywe khusikombe siesinyasio yisio!

¹³Ise omwene ndamala okhwesuha mbu litookho lia Bosira liakhabe eliokhurisia okhukali khandi liakhakwe esitsiimi; abandu bakhalitsekhel'le nende okhurumikhila eliira lialio singa esilaamo. Amataala kali ahembi n'nalio kakhasasikhe khulwe inziayo. Ise OMWAMI mal'le okhuboola.”

¹⁴Nase nimboola mbu, “Edomu, mal'le khunyoola ling'ana okhurula khu MWAMI. Ye urumile omurumwa okhubool'la amahanga okhubunjikha abasikari babwe ma berechekhe okhukhuseera.

¹⁵OMWAMI yetsa okhukhukhola omutofu, ma sialiho owanokhuhelesie oluyali tawe.

¹⁶Esunga yiyo imal'le okhukhukaata. Abulaho okhuritsanga singa obwe ibe opaalanga baliho abakhuritsanga. Wamenya khumachina amarambi, akali ikulu khubutenje bwesikulu; nebutswa kata nikali wamenya ikulu singa inditsu, OMWAMI nakhwisie hasi. OMWAMI umal'le okhuboola.”

¹⁷OMWAMI naboola mbu, “Okhumumwa khwanakhwitse khu Edomu, nakhube okhubi okhusila ma wosi owanobir'renje ahembi n'nalio, nachenye ma khandi nabe noburi obukali.

¹⁸Akanakekholekhe khu Edomu niko akali okhwekholekha khu Sodoma nende Komora, olwako nende amataala kali ahembi n'nako kali okhumumwa. Abulaho owakhamenye musibala yisio khandi. Ise OMWAMI mal'le okhuboola.

¹⁹Singa esimba eyitsanga nerula m'mutsuru okwabohana khumuchela kwa Yorodani netsia khusibala siobwayilo obulahi, nzia okhwitsa okhukhola abandu ba Edomu okhwilukha matetekhana okhurula musibala siabwe. Ma omwemeli owa nanzele niye owanoruke lihanga. Niwina onyala okhufwananibwa n'nase? Niwina owakhateema okhunwana? Nimuruchi sina onyala okhufukula ise?

²⁰Khulwe yako hulile amang'ana akandosisie okhukhol'la Edomu nende khu akanjoomanga okhukhol'la litookho lia Temani. Kata abaana babwe nabakhweswe nibahilwa, ne abandu bosi nabatechele okhusila.

²¹Olwa Edomu nalilekwe, nakhube neliyoka likali elia nalichile esibala siosi nasitechele, ne okhulakaya khwabwe nakhuhulilikhe okhwola ehale kata okhwola khu Nyanza Inzakhanyu.

²²Abasuku nabaseere Bosira singa inditsu yikhanga okhwetsumba esindu nebambuye tsimbaha tsiayo. Khwitukhu yilio abasikari ba Edomu balaba noburi singa omukhasi oli neinumwa yokhwibula.”

²³Kano niko ako MWAMI yaboola khu Damasiko: “Abandu bomumatookho ka Hamatsi nende Aripadi batecheye khandi bali nokhunyakhana sichila bahuliye amang'ana amabi. Esihenda mwoyo sibabir'rangakhwo singa amarunda keinyanza, ma sibali abanyala okhuhuluukha tawe.

²⁴Abandu ba Damasiko sibali netsingufu tawe ma belukhile mukhutechela okhukali. Bali mukhutsunwa nende okhubeelela singa omukhasi oli neinumwa yokhwibula.

²⁵Litookho eliamanyikha okhusila elialinji nobusangali, abandu baliilukhile ma likwiye likunda.

²⁶Litukhu yilio abasiani babwe ababuukha naber'rwe khumihanda tsielitookho, khandi abasikari babwe bosi nabamumwe.

²⁷Namambie omul'lo mumasisi ka Damasiko khandi nasambe inyumba yo Muruchi Beni Hadadi. Ise OMWAMI Wokhunyala Biosi mal'le okhuboola.”

²⁸Kano niko ako MWAMI aboolanga khubolwibulo lwa Keda nende amataala akarukwanga nende Haso, akomuruchi Nebukadinesa wa Babulonia yali niyabukula: “Seere abandu ba Keda ma mumulule olwibulo lwabandu bebukwe!

²⁹Bukule amaheema kabwe nende emiruko chiabwe, etsipasia tsiamaheema kabwe, nende ebindu biosi ebili mumaheema kabwe. Bukule tsingamia tsiabwe ma mubool'le abandu, ‘Ebirisio bili khwinywe tsimbeka tsiosi!’

³⁰“Inywe abandu ba Haso, Ise, OMWAMI muchetsiyianga mbu mwilukhe mutsie okhwebisa. Omuruchi Nebukadinesa umusieman'ne ne kano niko akaboolanga,

³¹‘Mwitse! Khwitsa okhuseera abandu abapaalanga bali khumulembe khandi esindu sinasiekholekhekhwo khubo tawe! Litookho liabwe libulakhwo ebilibwa nohomba amakafuli ma libukakhwo esindu siosi esiokhulisinga tawe.’

³²“Bukule tsingamia tsiabwe halala netsing'ombe tsiabwe tsiosi! Nzia okhusalaania abandu bosi ababekanga liswi liabwe mutsimbeka tsiosi, ma nzia okhuleera obusalilu khubo okhurula tsimbeka tsiosi.

³³Haso nakholwe okhuba esitsiimi khulwe inziayo, nahabe habundu hebibwe bionyene bimenyanga. Abulakhwoho omundu wosi owakhamenyoho khandi tawe. Ise, OMWAMI, mal'le okhuboola.”

³⁴Inyuma wamatukhu matititi aka Sedekia yali niyakhaba omuruchi wa Yuda, OMWAMI Wokhunyala Biosi yal'loma n'nase khukesibala sia Elamu.

³⁵Yaboola mbu, “Nanzire abandu balwan'nanga obuhingo bosi abachilanga Elamu nisiba netsingufu tsinyinji.

³⁶Nandeere omuyeka okhurula tsimbeka tsiosi okhuhungutsa khusibala sia Elamu, ma nasalanie abandu baho habundu hosi, okhwola olwa nasibuleho esibala siabandu ba Elamu basili okhwolakhwomwo tawe.

³⁷Nakhole abandu ba Elamu okhuba noburi obukali khubasuku babwe abenyanga okhubeera. Muburima bwanje obukali namume abandu ba Elamu ma nambarumile abasikari bokhubalwana okhwola olwa nabafwe bosi pe.

³⁸Namume abaruchi babwe nende abemeli babwe ma nareho indebe yanje yoburuchi.

³⁹Olunyuma nakhole abandu ba Elamu okhuba nobuhinda khandi. Ise OMWAMI mal'le okhuboola.”