Read lunyore YEREMIA 5 Bible Online

YEREMIA 5 - lunyore bible

YEREMIA 5

¹Abandu ba Yerusalemu, mwilukhe mubir'ra mutsinjila tsienywe! Muhenge buli habundu! Abene mulole! Murune mubiiro! Mwakhanyala okhunyoola omundu mulala okholanga akali amalahi, khandi oteemanga okhuba omusubilwa khu Nyasaye? Nimuba nimwakhanyoola, OMWAMI yetsa okhulekhela Yerusalemu tsimbi tsitsie.

²Kata nikali muboolanga mbu mwekayakayanga OMWAMI, akamuboolanga sikali habwene tawe.

³Nakahabwene, OMWAMI akolanga obusubilwa. Yamutiaba nebutswa simwabukulamwo obukono tawe; yamuseena nimutubukha, nebutswa mwasuula okhweka. Mwali nesikala marwi, simwarula mutsimbi tsienywe tawe.

⁴Kho ndamala nimbaala mbu, “Bano nabatakha khandi nabahingwa. Ebikholwa biabwe nebioluhingwa, sibamanyilisianga injila ya Nyasaye wabwe tawe, khandi ako MWAMI yenyanga bakhole tawe.

⁵Nzia okhutsia khubandu nobunyali, ma n'nome n'nabo. Akatooto kali bamanyile esia Nyasaye yenyanga, nende ako MWAMI yenyanga bakhole.” Nebutswa bosi basuula okhulonda amalako ko MWAMI, ma basula okhumuhulila.

⁶Yako niko akachilanga etsisimba okhurula m'mutsuru tsiakhabere, ebibwe okhurula musitsiimi biakhabarandulanie mubitonye; ne tsingwe tsiakhenyole kalaha nitsibir'ra mumataala kabwe. Abandu nibakharula esioba, bakharandulwe mubitonye, sichila tsimbi tsiabwe netsinyinji, ne khase nakhase bakhupanga Nyasaye omukongo.

⁷OMWAMI yareeba mbu, “Busina ndekhele abandu banje tsimbi tsiabwe? Bamala okhukhupa omukongo, ne bayekayakaya abanyasaye barali abatooto. Ndalisia abandu banje okhwola olwabekura, nebutswa bali okhuheya, ne mubweyangu bwabwe babutsanga nabatamba.

⁸Bafwana singa etsisululi tsisaatsa etsialisibwa bulahi etsienyanga okhuruma, buli mulala niyekombanga omukhasi wowasie.

⁹Mbula bwakhaba obubi ise nimbahelesia esinyasio khulwe ebindu yibi, khandi okhubanza esialia khwihanga singa lino?

¹⁰Narume abasuku okhuremul'la hasi emikunda chiemisabibu chiabandu banje; nebutswa barachiremaka chiosi tawe. Nambabool'le nabakhalakekhwo tsisaka tsionyene, sichila tsisaka yitsio sitsili etsianje tawe.

¹¹Abandu ba Isiraeli nende Yuda bamala okhuusiemana kupu. Ise, OMWAMI, mal'le khuboola.”

¹²Abandu bo MWAMI bamwambakhana OMWAMI ma nibaboola mbu, “OMWAMI siali onyala okhukholakhwo esindu siosi tawe. Ifwe sinakhube namanyakhano tawe; sinakhube nelihe nohomba neinzala tawe.

¹³Abaroobi nomuya butswa; ling'ana lia Nyasaye silili mubo tawe; kho lekha akababoolanga kekhole khubo.”

¹⁴Khulwe yako kano niko ako MWAMI Nyasaye Wokhunyala Biosi yambool'langa: “Yeremia, sichila abandu yaba babooye amang'ana yaka, nzia okhukhola amang'ana kanje kafwane singa omul'lo mumunwa kukwo. Abandu betsa khufwana tsikhwi ne omul'lo kwitsa okhubasamba bosi.”

¹⁵Abandu ba Isiraeli, OMWAMI aleeranga lihanga okhurula ehale okhumuseera. Nelihanga lie tsingufu khandi elialiho okhurula khale; lihanga eliamuramanyile ol'limi lwabwe.

¹⁶Abalwani babwe bobuhingo nabasikari bobunyali aberanga abandu sila tsimbabasi.

¹⁷Nabalie ebiraakwa bienywe halala nebiakhulia bienywe; nabeere abasiani benywe halala nabakhaana benywe. Nabeere amakondi kenywe halala netsing'ombe tsienywe, khandi nabononie emisabibu chienywe nende emikhuyu chienywe. Amatookho kenywe akasirwa namasisi akamusubilanga sikakhakokwa tawe nakakokwe nende abasikari babwe.

¹⁸OMWAMI yaboola mbu, “Kata mumatukhu yako sindakhamume abandu banje bosi tawe.

¹⁹Olwa nabakhureebe esichil'le OMWAMI nakhola ebindu yibi biosi, obabool'le mbu, singa obwa bali okhukhupa omukongo ise ne nibarumikhila abanyasaye betsinzibulo tsindi musibala siabwe, nimbwo nabarumikhile abandu bandi musibala esirali esiabwe.”

²⁰OMWAMI yaboola mbu, “Bool'la abolwibulo lwa Yakobo, khandi obool'le abandu ba Yuda:

²¹Mureke amarwi okhuhul'la kano, inywe abandu abahingwa khandi abasilu, abali netsimoni, nebutswa sibalolanga, khandi abali namarwi, nebutswa sibanyala khuhul'la tawe.

²²Ise nise OMWAMI, busina simuritsanga tawe? Busina muratechelanga nimuli imbeli wanje? Ndali okhuraho omuyekhe singa olwakho lweinyanza oluli olwakho lweinziayo olwa inyanza eranyala okhusiilakhwo tawe. Amarunda keinyanza kanyala okhwetuyakhwo nebutswa sikanyala okhulubira tawe; amarunda kanyala okhuhoola nebutswa sikanyala okhulufunaka tawe.

²³Nebutswa abandu inywe! Muli abesikala marwi khandi abeindiri; mwahenga elubeka ma mwaindekha.

²⁴Simwaitsul'la okhumba oluyali tawe, kata nikali ndamurumila ifula yesubwe nende ifula yerotso ma nimuhelesia amatukhu kokhuchesa buli muhika.

²⁵Musilenje siako, tsimbi tsienywe tsiayikal'la ebindu ebilahi yibi okhwitsa khwinywe.

²⁶“Abandu ababi bamenyanga mubandu banje; bahichilanga singa yabo abarekanga khulwokhutiila amanyonyi, nebutswa bareka emireko chiabwe khulwokhutiila abandu.

²⁷Singa omuhitsi yetsusianga amanyonyi mwisanduku lialombwa khulwo khubikhamwo amanyonyi; bayitsusia tsinyumba tsiabwe nebindu ebia bayaaka. Niko akachilanga bali netsingufu nende obuhinda,

²⁸nabakhomefu khandi balitsanga bulahi. Sibalikhwo nende esiakamo khumabi kabakholanga tawe. Sibakhonyanga ababisandu nende abatakha okhunyoola obukhalachi bwahabwene tawe. Sibakhonyanga ebikhoyele okhuhebwa ababisandu tawe.

²⁹“Nebutswa Ise OMWAMI ndakhahane esinyasio khubo khulwebindu biabakholanga yibi; ndakharunge es'sialia khwihanga yili.

³⁰Likhuwa liibi okhusila khandi eliokhuchenyia liekholekhele musibala:

³¹abaroobi bal'lomanga amang'ana kobubehi konyene; abesaalisi barukanga olwabaroobi balakanga akekhola, ne abandu banje sibafukulangakhwo tawe. Nebutswa bakhakhole mbwena olwe esihesi siakhoole.”