Read lunyore YEREMIA 50 Bible Online

YEREMIA 50 - lunyore bible

YEREMIA 50

¹Kano niko amang'ana ako MWAMI yambool'la okhulondokhana nende litookho lia Babulonia nende abandu balio:

²“Bool'la amahanga amang'ana kano! Okalandie! Ohaane esilolelo ma olandie amang'ana yaka! Orakakhola akamasilisi tawe! Nebutswa boola mbu, ‘Babulonia lilekelwe! Omunyasaye walio Mariduki usimbile omurwe! Ebiniini bia Babulonia bihambilwe netsisoni, ebiniini bialio bies'sinyo bitubuywe!’

³“Lihanga okhurula esinyolu litsile okhuseera Babulonia ne nalilikhole esitsiimi. Abandu nende tsinyama nabelukhe tsimbilo, ne abulaho owanomenyeyo tawe.”

⁴OMWAMI aboolanga mbu, “Olwe inyinga tsana nebe niyool'le, abandu ba Isiraeli nende aba Yuda bombi baletsa nibalakayanga ne nibakhabanga Ise Nyasaye wabwe.

⁵Nabareebe injila yokhutsia Sayuni ma nabachilonde okhwolayo. Bakhalombe indakano n'nase ne sibakhachifunake tawe.

⁶“Abandu banje bali singa amakondi aka abaayi bako bakalekha okhukor'ra mubikulu. Singa amakondi, bahutuuma okhurula khusikulu silala okhutsia khusindi, ne bayibil'la aheingo wabwe eli.

⁷Baseerwanga nende abandu bosi ababakananga n'nabo. Abasuku babwe baboolanga mbu, ‘Bo bakhol'la OMWAMI tsimbi, kho aka khubakholeye sikali amabi tawe. Abakuka babwe basubila mu MWAMI, ne nabo abene khane bakhatsililiye okhuba abasubilwa khuye.’

⁸“Abandu ba Isiraeli mwilukhe okhurula Babulonia! Rule mwihanga yili! Mube abokhuranga okhurula!

⁹Nanzuube amahanga ketsingufu okhurula esinyolu ma nangasone okhuseera Babulonia. Nakepange mubukono bwokhuseera esibala yisio ma nakasileke. Abandu yabo nabasitsa mukhuhima khandi mukhulasa tsisele nesapa.

¹⁰Emiandu chia Babulonia nachiyaakwe, ne yabo abanabachiyaake, nababukule siesindu siosi esiabenyanga. Ise OMWAMI mal'le okhuboola.”

¹¹OMWAMI aboolanga mbu, “Inywe abandu ba Babulonia mwali okhuyaaka emianduchie lihanga lianje. Muyanzanga nimusangala, nimutsilil'la butswa singa ing'ombe ehulanga obuswache nohomba singa esululi eyananga,

¹²nebutswa litookho lienywe likali nalitutuhibwe ma nalisimbibwe omurwe. Babulonia liakhabe lihanga litututu okhusila khukosi; nalikwe esilangalangwe khandi esitsiimi esirali namaatsi.

¹³Khulwe lileko liandi nalio abulaho owakhamenye mu Babulonia; nalilekhwe okhukwa likunda, ne bosi abakhabir'renje ahembi n'nalio bakhachenye nibang'ang'ala.

¹⁴“Abandu bokhulasa obuyingo, mwerechekhele lihe okhuseera Babulonia ma mulifumbile. Mulase tsisele tsienywe tsiosi khu Babulonia sichila limal'le okhukhola tsimbi imbeli wanje ise OMWAMI.

¹⁵Mukhupe ekhwisi yokhuchiaka lihe mwitookho liosi! Luno Babulonia limal'le okhuchinga amakhono. Amasisi kalio kafunakilwe ma kakwiye hasi. Runjianga es'sialia sianje khubandu ba Babulonia. Kho mubarunjie es'sialia ma mubakhol'le aka bakhol'la abandi.

¹⁶Muralekha imwo erakwe mwihanga yilio nohomba kata ebichese okhufunwamwo tawe. Siomucheni owamenyamwo narisibwe nabasikari abaseeranga ne bosi nabakalukhe tsingo tsiabwe.”

¹⁷OMWAMI yaboola mbu, “Abandu ba Isiraeli bali singa amakondi akalondel'lwanga nikasalanibwa nende etsisimba. Olwokhuranga bali okhuseerwa nende omuruchi wa Asiria, ma khandi Nebukadinesa omuruchi wa Babulonia yafunaka amakumba kabwe.

¹⁸Khulwe yaka, Ise OMWAMI Wokhunyala Biosi, Nyasaye wa Isiraeli, nambaane esinyasio khu Nebukadinesa nende khulihanga lilie singa butswa ndahaana esinyasio khumuruchi wa Siria.

¹⁹Ise nanjelesie abandu ba Isiraeli musibala siabwe. Bakhalie ebiokhulia ebimelanga khusikulu sia Karimeli nende musibala sia Bashani, ne nabalie siosi esia nabenye khubiraakwa ebikhulanga mutsisoma tsia Efuraimu nende Gileadi.

²⁰Olwe inyinga tsana nebe niyool'le, tsimbi sinatsinyoolekhekhwo mu Isiraeli tawe kata obusiamu bwosi sinabunyoolekhekhwo mu Yuda tawe, sichila nambeele tsimbi tsiabandu yabo abobulamu bwabwe buramalwa. Ise, OMWAMI mal'le okhuboola.”

²¹OMWAMI yaboola mbu, “Museere abandu ba Meratsaimu nende Pekodi. Mubeere ma mubamume. Mukhole kosi ake ise mal'le okhumulaka. Ise, OMWAMI mal'le okhuboola.

²²Liyoka liobulwani lihul'likhanga musibala, ne khuliho nokhumuma okhukali.

²³Babulonia yatuya esibala siosi mubitonye ne luno inyundo iy'yo imal'le okhufunakwa! Amahanga kosi kachenyele khukamal'le okhwekhola khwihanga yilio.

²⁴Babulonia, wali okhunwana, ne uhambilwe mumubero akwa ndakhurechekhela, kata nikali ibe siomanyile tawe.

²⁵Mal'le okhwikula habundu hebilasan'nwe biabiikhwa, ne muburima bwanje mbihinisie esioba, sichila Ise, OMWAMI Wokhunyala Biosi ndi nomulimo kwokhukhola mu Babulonia.

²⁶Muliseere okhurula mutsimbeka tsiosi ma mufunake habundu hobuswache bwabiikhwa! Mubunjikhe ebia muyaakile singa ebifuumi biobuswache! Mumume lihanga yilio ne muralekhakhwo sindu siosi tawe!

²⁷Mwire abasikari balio bosi! Mubasinze! Abandu ba Babulonia batibile! Inyinga yabwe yokhuhebwa esinyasio imal'le okhwola!

²⁸“Hulile! Abatimi belukha okhurula musibala sia Babulonia betsanga Yerusalemu, ne baboolanga singa obwe ise, OMWAMI Nyasaye wenywe yarungia es'sialia khuka Abababulonia bali okhukhol'la Ehekalu yanje.

²⁹“Bool'la abandu abalasanga obuyingo baseere Babulonia. Murume abandu bosi abamanya okhulasa obuyingo nende tsisele. Mufumbile litookho ne muralekha omundu wosi ahonokokhe tawe. Murujgie es'sialia khu kosi aka liakhol'le, ma mulikhol'le singa obwa liakhol'la abandi, sichila liali okhukhol'la Ise Omutsienukhu wa Isiraeli esunga.

³⁰Kho, ababuukha balio baler'rwa mumihanda chiomwitookho, ne abasikari balio bosi balamumwa khwitukhu yilio. Ise OMWAMI mal'le okhuboola.

³¹“Babulonia, witsuye nende esunga, khulwako, Ise, OMWAMI Nyasaye Wokhunyala Biosi khufukulanga ibe! Inyinga imal'le okhwola olwa nakhuhe esinyasio.

³²Lihanga lilio eliesunga naliesikar're ma nalikwe, ne abulaho owanolikhonye. Namambie omul'lo mumatookho kenywe ne siesindu esili ahembi n'nawe nasisambwe.”

³³OMWAMI Wokhunyala Biosi yaboola mbu, “Abandu ba Isiraeli nende Yuda bakhol'lwa obubi. Yabo ababahamba babahenjelesianga ahembi nahembi ne sibabalekha batsie tawe.

³⁴Nebutswa uyo owa nobanunule ali netsingufu — eliira lilie ni OMWAMI Wokhunyala Biosi. Ye omwene nayehinie okhulwana ne naleere omulembe khusibala, nebutswa naleere esibi khubandu ba Babulonia.”

³⁵OMWAMI yaboola mbu, “Olufu lwitse Babulonia, Olufu lutsie khubandu baho, nokhubami, nende khubandu balio bobuchesi.

³⁶Olufu lwitse khubaroobi ababehanga; mako obwabali abahingwa okhusila! Olufu lwitse khubasikari balio; mako obwa barisibubwe okhusila!

³⁷Mumume etsisululi tsialio nende amakaari kabwe! Olufu lwitse khubasikari balio abomurungo; mako obwa bali abatofu! Mumume amabiikhilo kalio; muyaake nimunuula siesindu.

³⁸Lekhe esimi siitse khwiloba lialio, ne emichela chialio nachio chikhame. Babulonia nesibala siebiniini biokhurisia, ebiakhola abandu okhuba abahingwa.

³⁹“Ma khulwako Babulonia nalinyasibwe nebisieno nende emioyo chiesifwabwi, nende amanyonyi komusilo. Abandu sinabamenyemwo khandi khutsinyinga tsiosi etsitsanga tawe.

⁴⁰Akanakekholekhe khu Babulonia niko akali okhwekholakhwo khu Sodoma nende Komora olwa ndakamuma nende amataala kandi akali ahembi khuko. Abulaho owakhamenye musibala yisio khandi tawe. Ise, OMWAMI mal'le okhuboola.

⁴¹“Abandu betsanga okhurula khwihanga elili esinyolu, lihanga liobunyali ehale bwene; abaruchi abenji berechekhelanga lihe.

⁴²Babukuye obuyingo bwabwe nende tsinganga; nabalulu ababula tsimbabasi. Bahumanga singa inyanza eholanga, olwa belusianga etsisululi tsiabwe. Berechekhele okhulwana Babulonia.

⁴³Omuruchi wa Babulonia ahulilanga amang'ana yako, ne amakhonoke kelel'le sila obukhonyi. Ali mukhunyakhana namakani, mukhutsunwa singa okhwo omukhasi oli neinumwa yokhwibula.

⁴⁴“Singa esimba eyitsanga nerula mumutsuru okhwabohana khumuchela kwa Yorodani netsia khusibala siobwayilo obulahi, Ise, OMWAMI nanzitse ma nakhole Abababulonia okhwilukha matetekhana okhurula mwitookho liabwe. Ma omwemeli owa nanzele niye owanoruke lihanga. Niwina owakhateema okhunwana? Ni muruchi sina onyala okhuufukula Ise?

⁴⁵Khulwe yako hulile amang'ana akandosisie okhukhol'la litookho lia Babulonia nende akanjoomanga okhukhol'la abandu balio. Kata abaana babwe nabakhweswe nibahilwa, ne abandu bosi nabatechele okhusila.

⁴⁶Olwa Babulonia nalilekwe, nakhubeho neliyoka likali ma esibala siosi namahanga kandi nakatechele.”