Read lunyore YEREMIA 51 Bible Online

YEREMIA 51 - lunyore bible

YEREMIA 51

¹OMWAMI yaboola mbu, “Nderanga omuyeka kwokhumuma Babulonia nende abandu bamwo.

²Narume abandu bebibala bindi okhumuma Babulonia singa obusindu obuhutsanga omukhuutsi. Olwe inyinga yokhumuma tsana nebe niyol'le, nabaseere Babulonia okhurula mutsimbeka tsiosi ma nabalekhe esibala nisili esikhaya sila omundu.

³Murahelesia abasikari ba Babulonia obweyangu okhulasa tsisele nohomba kata okhwebiikha ebiesingo tawe. Murabelel'la ababuukha tawe. Mumume abasikari bosi!

⁴Nabafumirwe ma nabafwile mumihanda tsiamatookho kabwe.

⁵Ise, OMWAMI Nyasaye Wokhunyala Biosi sili okhwibil'lakhwo abandu ba Isiraeli nende Yuda, kata olwabo bamal'le okhwona imbeli wanje, ise Omutsienukhu wa Isiraeli.

⁶Mwilukhe okhurula Babulonia! Muhonie obulamu bwenywe! Murerwa khulwe tsimbi tsia Babulonia tawe. Luno runjianga es'sialia sianje khu Babulonia khandi ndihelesianga esinyasio esialikwan'ne okhunyoola.

⁷Babulonia liali singa esikombe siefetsa mumukhono kwanje, esiakholanga, esibala siosi okhukholwa namalwa. Amahanga kosi kanywa ewaini ma nikalalukha.

⁸Babulonia lilekelwe matetekhana ma limumilwe! Muliekhuule! Mulinyool'le indesi yamafumire kaalio, haundi nalihona.

⁹Abarende abamenyeleyo bali okhuboola mbu, ‘Khwateema okhukhonya Babulonia nebutswa inyinga yali nehweye. Chende khulekhe Babulonia khukalukhe ingo. Nyasaye uheye Babulonia esinyasio nobunyali bubwe bwosi ma khandi ulimumile liosi pe.’ ”

¹⁰OMWAMI aboolanga mbu, “Abandu banje bahanzukhanga nibaboola, ‘OMWAMI umanyisie mbu khuli habwene. Chende khutsie okhubool'la abandu abali mu Yerusalemu ako MWAMI Nyasaye wefwe akhol'le.’ ”

¹¹OMWAMI ubusisie abaruchi ba Media, sichila yenyanga okhumuma Babulonia. Nimbwo narunjie Babulonia es'sialia khulwo khwononia Ehekalu. Abasikari bokhuseera balaka mbu, “Hiakale tsisele tsienywe! Rechekhe ebikhumba bienywe!

¹²Muchinge ependela okhusima betse okhuseera amasisi ka Babulonia. Mumeete abasikari bokhulinda! Murume abokhuseera! Murechekhe abandu bokhwekonekha?” OMWAMI ukhol'le aka yaboola nakhol'le abandu ba Babulonia.

¹³Lihanga yilio lili nemichela eminji nende amabiikhilo kobuhinda, nebutswa, inyinga yalio yokhufwa imal'le okhwola.

¹⁴OMWAMI Wokhunyala Biosi wesuhile mbu naleere abandu abenji okhuseera Babulonia singa omusinga kwetsisiche, ne bakhakhupe liyoka liobulechi.

¹⁵OMWAMI yalomba esibala nobunyali bubwe, mubuchesibwe yalonga esialo, ma nabambula likulu.

¹⁶Olwa yalaka, amaatsi ikulu welikulu nikahoola; aleranga amalumbesi okhurula khutsindulo tsiesibala. Achilanga olweni nilwanukha mufula, ma aruma obusindu okhurula mwibiikhilolie.

¹⁷Mukhulola yaka, abandu bakwitsanga abahingwa khandi abasilu; yabo abalombanga ebiniini basimbile emirwe, sichila abanyasaye aba balombanga nabobubehi khandi babula obulamu.

¹⁸Nababutswa ne bakhoya okhuchaaywa; bakhamumwe olwo MWAMI yakhetse okhubahiinia.

¹⁹OMWAMI Nyasaye wa Isiraeli sali singa bo tawe; ye niye owalomba ebindu biosi, ne wayela Isiraeli okhuba abandu baabe omwene. OMWAMI Wokhunyala Biosi nilio eliira lilie.

²⁰OMWAMI yaboola mbu, “Babulonia, ibe oli inyundo yanje, khandi esikhupan'nwe sianje sielihe. Ndali okhukhurumikhila okhutubula amahanga nende obwami bwosi.

²¹Okhutonyania etsisululi nende abachendelangakhwo, okhutonyania amakaari nende abakelusianga,

²²okhwira abasaatsa nabakhasi, okhwira abasakhulu nende ababuukha, okhwira abasiani nende abakhaana,

²³okhusinza abayi nende ebiayo biabwe, okhusinza abalimi nende etsisululi tsiabwe, okhumulula Abaami nende abemeli abakhongo.”

²⁴OMWAMI yaboola mbu, “Namulole nirunjianga es'sialia khu Babulonia nende abandu balio khulwo obubi obwa bakhol'la Yerusalemu.

²⁵Babulonia, Ibe oli singa esikulu esirambi esimumanga esibala siosi, nebutswa Ise OMWAMI ndi omusuku uwo. Nakhufumile, nakhwisie hasi, ma nakhulekhe mwikokhe.

²⁶Libulaho kata elala khumachina akokhubusasikhi bubwo akanakombokhelwe. Khandi wakhabe singa esitsiimi inziayo. Ise OMWAMI mal'le okhuboola.

²⁷“Muchinge ependela okhulanga abandu okhwitsa okhuseera! Murechekhe amahanga khulwokhulwana Babulonia! Mubool'le abamahanga ka Ararati, Mini nende Ashikenasi ketse okhuseera. Mwele omwemeli wokhwemel'la obulwani. Mulere etsisululi tsinyinji singa emisinga chiechisiche.

²⁸Murechekhe amahanga okhulwana Babulonia. Murumanie abaruchi ba Media betse, halala nabemeli babwe, nabakhongo babwe, nende abasikari bamahe kamahanga kosi akali hasi woburuchi bwabwe.

²⁹Esibala sitechelanga nisirenga sichila OMWAMI ahesianga obuloosie bubwe okhukhola Babulonia okhuba esitsiimi, ahomundu aramenyele.

³⁰Abasikari ba Babulonia balekhele okhulwana ne bahand'e mutsiminga tsiabwe. Barimukhilwe ikholo ma bakwiye singa abakhasi. Ebilibwa bielitookho bifunachilwe netsinyumba tsihambile omul'lo.

³¹Abarume bosi belukhanga nibatsia okhubool'la omuruchi wa Babulonia mbu litookho lilie lifunachilwe okhurula tsimbeka tsiosi.

³²Abasuku babukuye obwambukhilo bwomuchela ne bahambisie omul'lo mutsiminga. Abasikari ba Babulonia batecheye.

³³Abasuku bali ahembi okhubaremaka ma babasen'ne hasi singa obuswache obuli halutse. Ise, OMWAMI Wokhunyala Biosi, Nyasaye wa Isiraeli mal'le okhuboola.”

³⁴Omuruchi wa Babulonia yaremaka Yerusalemu ma nalimuma. Yalekha litookho eliele singa ehari ebulamwo esindu, singa isuche ingali yali okhulimila ma nalasa abandi ehale.

³⁵Lekha abandu ba Sayuni baboole mbu, “Lekha Babulonia lirunjibwe khulwobulwani bwakhwakhol'lwa!” Lekha abandu ba Yerusalemu baboole mbu, “Lekha Babulonia lirunjibwe khulwesibi esia khwanyoola!”

³⁶Ma nilwo olwo MWAMI yabool'la abandu ba Yerusalemu mbu, “Nare amang'ana kenywe mumakhono kanje ma nanjile abasuku benywe nabarunge aka bamukhol'la. Nakhamie imoni yamaatsi ka Babulonia ma nakachile emichela chialio chiosi nachikhame.

³⁷Lihanga yilio nalikwe ebifuumi bielikunda ahetsisolo tsiomubulimo natsimenyenje. Hakhabe habundu hokhurisia okhusila, ne abulaho owanomenyeho ne bosi abanabalilole nabahambwe noburi.

³⁸Abababulonia bosi bakhaasanga singa etsisimba nibahuma singa abaana betsisimba.

³⁹Bo nabekhotseli noho? Nambalombele lisabo ma nambakhole nabakholwe namalwa khandi nabasangale. Nabatsie okhukona nebutswa sinababuukhe tawe.

⁴⁰Nambahile nabatsie okhusinzwa singa ebimeme biamakondi, nende tsimbusi. Ise, OMWAMI mal'le okhuboola.”

⁴¹OMWAMI aboolanga khu Babulonia mbu: “Litookho liesibala siosi siafumia limal'le okhufumilwa! Babulonia likwiye habundu hokhurisia okhukali khumahanga!

⁴²Inyanza isundukhile khu Babulonia ma lifunikhile nebikubuli biayo.

⁴³Amataala kakwiye habundu hokhurisia ma kafwan'ne singa esilangalangwe, ahomundu aramenyele nohomba ahomundu arachendanga.

⁴⁴Nambane esinyasio khu Beli, omunyasaye wa Babulonia, ma namukhole alakhuule ebindu ebia yali okhwiba; amahanga sinakatsilil'le okhumwekayakaya tawe. “Amasisi ka Babulonia kakwiye.

⁴⁵Abandu banje Isiraeli, mwilukhe okhurula yaho! Muhonie obulamu bwenywe khwirima lianje lilulu.

⁴⁶Murakosia esinani sienywe kata murarisibwa khulwobumonyi obwa muhulilanga tawe. Buli omuhika mulala obumonyi obwabukhan'ne khubundi buboolwanga — obumonyi bobulwani musibala nende akomuruchi mulala okhulwana lihe nende oundi.

⁴⁷Khulwako inyinga yitsanga olwa nambinieho ebiniini bia Babulonia. Lihanga liosi nalisimbe omurwe, ne abandu balio bosi nabeerwe.

⁴⁸Siesindu siosi khusibala nasihanzukhe khulwo obusangali olwa Babulonia nalikwe mumakhono kabandu aba nabarule esinyolu okhulimuma.

⁴⁹Babulonia liachila abandu musibala siosi nibafwa, ne luno Babulonia nalilekwe sichila liachila Abaisiraeli abenji nibafwa. Ise OMWAMI mal'le okhuboola.”

⁵⁰OMWAMI yaboola yaka khubandu baabe abali mu Babulonia: “Muhonokokhele okhurula khulufu! Kho rule mutsie! Muralinda tawe! Kata nikali muli ehale okhurula ingo wenywe, mukanil'le khu ise, OMWAMI wenywe ma mwitsul'le Yerusalemu.

⁵¹Muboolanga mbu, ‘Khwasimbibwa emirwe khandi nikhuhebwa tsisoni; khwelolanga singa abaranyala esindu sichila abarende bakhunuula habundu hatsienukhu mu Hekalu.’

⁵²Kho nase mboolanga mbu, inyinga yitsanga olwa nambinieho ebiniini bia Babulonia, ne abamafumire nababinde musibala siosi.

⁵³Kata nikali Babulonia liakhanichiye okhutsia ikulu mumalesi okhwombokhamwo oluhinga olutinyu, ndakharumileyo abandu okhulimuma. Ise OMWAMI mal'le okhuboola.”

⁵⁴OMWAMI yaboola mbu, “Hulile etsikhwisi mu Babulonia, etsikhwisi etsiokhwekhuula khulwo okhumumwa musibala.

⁵⁵Luno retsanga Babulonia mukhumumwa, khandi ndiretsanga mukhubuna. Abasikari belukhanga nibetsamwo singa okhuhoola khwebikubuli, nibaliseera neliyoka likali.

⁵⁶Betsele okhumuma Babulonia; abasikari balio batil'lwe, ne obuyingo bwabwe bufunachilwe. Ise nise Nyasaye ohaananga esinyasio khulwo obubi, ne nakhol'le Babulonia akalikwan'ne okhunyoola.

⁵⁷Nakhole Abaami balio, abasaatsa bobuchesi, abemeli nende abasikari okhukholwa namalwa. Nabatsie okhukona ne sinababuukhe tawe. Ise omuruchi, mal'le okhuboola. Nise OMWAMI Wokhunyala Biosi.

⁵⁸Amasisi ka Babulonia amatinyu nakafuubwe hasi, ne ebilibwa bialio ebirambi nabisambwe. Emilimo chiamahanga chiosi nechia butswa; esinani siako silasambwa mumul'lo. Ise, OMWAMI Wokhunyala Biosi mal'le okhuboola.”

⁵⁹Omutendi wa Sedekia yali Seraya omusiani wa Neriya, omwitsukhulu wa Mahiseya. Mumuhika kwakhane olwa Sedekia yali omuruchi wa Yuda, Seraya yali natsitsanga Babulonia halala nende Sedekia, ne nase ndamala muhe amebaalo nalebe.

⁶⁰Ndahandika musitapu amang'ana kokhumumwa okhwa khetsele Babulonia khwosi, nende amang'ana kandi kosi akal'lomanga khu Babulonia.

⁶¹Ndabool'la Seraya mbu, “Olwa namwole Babulonia, nolole mbu usomeye abandu amang'ana kosi akahandichilwe musitapu yisi butinyu.

⁶²Ma osaaye mbu, ‘OMWAMI, ibe ubooye mbu nomume Babulonia, ma esilimwoyo siosi sinasibeho khandi tawe, kata omundu nohomba esolo sinabeho tawe. Khandi nalibe singa esitsiimi inziayo.’

⁶³Olwa nobe nomal'le okhusomela abandu esitapu yisi, nosibohe khwichina ma nosifuube mumuchela kwa Efurate,

⁶⁴ma noboole mbu, ‘Yaka niko akanakekhole khu Babulonia, nalieyinikhe ne sinalibuukhe khandi tawe, khulwo okhumumwa okhwo MWAMI nalileer're.’ ” Amang'ana ka Yeremia koolanga hano.