Read lunyore YEREMIA 52 Bible Online

YEREMIA 52 - lunyore bible

YEREMIA 52

¹Sedekia yali nemihika amakhumi kabili namulala olwa yakholwa omuruchi wa Yuda, ne yaruka emihika likhumi namulala nali Yerusalemu. Eliira lia mama uwe liali Hamutali, omukhaana wa Yeremia owamenyanga mwitookho lia Libuna.

²Omuruchi Sedekia yali okhukhola tsimbi imbeli wo OMWAMI, singa obwomuruchi Yehoyakimu yali okhukhola.

³OMWAMI yamala nahambila abandu ba Yerusalemu nende Yuda lirima likali okhwola olwa yabakhunga okhurula mutsimoni tsitsie. Sedekia yakhol'la omuruchi Nebukadinesa wa Babulonia indiri.

⁴Khulwe yako Nebukadinesa yetsa nabasikari baabe bosi ma naseera Yerusalemu mwitukhu lielikhumi, mumwesi kwelikhumi, mumuhika kwakharano nakhane kwoburuchi bwa Sedekia. Bakhupa ekambi esioba welitookho, ma nibombokha amasisi kokhulifumbila tsimbeka tsiosi,

⁵ma nibatsilil'la okhulifumbila okhwola omuhika kwelikhumi nal'lala kwoburuchi bwa Sedekia.

⁶Litukhu liakharano nakhane liomwesi kwakhane omuhika kwene yikwo, olwe inzala yali inyinji okhusila ma kata abandu sibalikhwo nende esiakhulia siosi esiasikala khulwokhulibwa tawe,

⁷amasisi kelitookho kali okhufunakwa. Kata nikali mbu abasikari ba Babulonia bali nibabotokhan'ne litookho, abasikari ba Yuda bosi bebisa ma nibarula esioba mubutukhu. Barul'la munjila ebir'ranga m'mukunda kwomuruchi, ma nibabir'ra musilibwa sihambanianga amasisi kabili ma nibelukhila khunjila etsitsanga mwibanda lia Yorodani.

⁸Nebutswa abasikari ba Babulonia balondel'la omuruchi Sedekia ma nibamufumilila musipaapi esili ahembi Yeriko, ne abasikari baabe bosi bamwilukha.

⁹Sedekia yahilwa khumuruchi Nebukadinesa, owali nali mwitookho lia Ribula mulusoma lwa Hamatsi, ma yaho Nebukadinesa nakhalachila Sedekia esiina.

¹⁰Habundu halangwa Ribula Nebukadinesa yera abasiani ba Sedekia olwa Sedekia mwene yali nareyekhwo imoni khandi yalaka mbu abemeli ba Yuda berwe.

¹¹Olunyuma lwe yako, yalaka tsimoni tsia Sedekia tsihinibwa ma nalola ureeywe khuminyololo ma nahilwa Babulonia. Sedekia yamenya mubuhambe mu Babulonia okhwola khwitukhu elia yafwilakhwo.

¹²Khwitukhu lielikhumi khumwesi kwakharano mumuhika kwelikhumi nakharano nakhane kwoburuchi bwa Nebukadinesa omuruchi wa Babulonia, Nebusaradani, omuchetsiyi womuruchi, khandi etswoni wabasikari bomuruchi yenjila mu Yerusalemu.

¹³Yasamba Ehekalu yosi, inyumba yomuruchi halala netsinyumba etsiabandu abakhongo tsiosi mu Yerusalemu;

¹⁴ne abasikari baabe nibafunaka lisisi eliabotokhana litookho.

¹⁵Ma Nebusaradani nabukula abandu bosi abali nibasikaye mwitookho, halala nabandu abasitsa abali nibasikaye, nende yabo bosi abali nibelukhiye mubandu ba Babulonia ma nabahila mubuhambe Babulonia.

¹⁶Nebutswa yalekha mu Yuda abandu balala abali abatakha okhusila, abaralikhwo nemianduchiosi tawe nabahelesia emikunda chiemisabibu nende emikunda chindi okhutiyamwo.

¹⁷Abababulonia batonyania tsinguso tsiomukasa nende amakaari akali nikalekhelwe mu Hekalu, halala nelitanji likali liomukasa ma nibabukula omukasa kwosi nibakuhila Babulonia.

¹⁸Khandi babukula ebitiyo nende tsindabu tsiokhuramwo likokhe ebiarumikhanga khulwo okhusaaba olusambwa, khandi ebindu biarumikhanga khutsitaya, etsipakuuli tsiarumikhanga khulwo khubukul'lakhwo amatsahi okhurula khumisango echiali nichihan'nwe, etsipakuuli tsiarumikhanga okhusamba obwali nende ebindu bindi biosi ebiomukasa ebiarumikhanga khumilimo tsiomu Hekalu.

¹⁹Babukula ebindu biosi ebialombwa khufetsa nende khutsahabu! Orupakuuli orutititi, etsisahani tsiarumikhanga okhukinga amanda akang'alaye, etsipakuuli tsiabikhwangakhwo amatsahi akarul'le khumisango, tsindabu tsielikokhe, ebihani ebietsitaya, etsipakuuli etsiarumikhanga khubwali, nende etsipakuuli tsiarumikhanga okhusundula omusango kwewaini.

²⁰Ebindu biomukasa ebiomuruchi Solomoni yalomba okhurumikha mu Hekalu — etsisiilo tsibili, amakaari, litanji likali, nende etsichulukhi likhumi natsibili etsia liarenjekhwangakhwo — biali ebisiro ebiranyala okhuchelwa obusiro bwabio.

²¹Etsisiilo tsibili tsila tsiali tsifwanani; oburambi bwesiilo ndali bwali etsimiita munane ne okhuchibotokhana yosi yali etsimiita tsirano netsisentimita tsitaru. Etsisiilo yitsio tsiali tsinzalamu ne tsialombelwa omukasa kwobubambukhu obuhela etsimilimita amakhumi kane nakataru natsirano.

²²Ikulu wa buli esiilo khwali nekofia yomukasa eyali noburambi okhutsia ikuli etsimiita tsibili netsisentimita tsibili; esing'enge siomukasa nende amakomamango komukasa kali ikulu wekofia okhuchibotokhana. Esiilo yakhabili yali butswa singa eyokhuranga mukhulombwa khwayo.

²³Khubuli sing'enge eyabotokhana esiilo khwali namatunde komukasa akahela emiandala, ne amakhumi karano nakane na kasasaba kali akanyala khulolekha okhurula hasi.

²⁴Okhumeeta khubiabukulwa, Nebusaradani, etswoni wa basikari, yafumila Seraya, Omwesaalisi Omukhongo, nende Sefania omulondi wo Omwesaalisi Omukhongo uyo, nende abemeli bandi bataru abomulimo omukali mu Hekalu ma nabahila bosi mubuhambe.

²⁵Okhurula mwitookho, Nebusaradani yafumila omusikari owali niyemeleye abasikari bandi, abachetsiyi bomuruchi bane nabataru abali nibasikaye mwitookho, omulondi wetswoni yabasikari owalindanga ebitapu biabasikari, nende abandu abakhongo amakhumi kasasaba.

²⁶Nebusaradani yabahila khumuruchi wa Babulonia owali nali mwitookho lia Ribula,

²⁷elili mulusoma lwa Hamatsi. Ebwene yiyo omuruchi yabasandia ma nabeera. Kho abandu ba Yuda bahilwa mubuhambe.

²⁸Kano niko amabalo kabandu ba Nebukadinesa yahila mubuhambe: Mumuhika kwoburuchibwe okwakhane nakhataru yahila mubuhambe etsielefu tsitaru namakhumi kabili nabataru.

²⁹Mumuhika kukwe kwamunane yahila mubuhambe abandu tsimia munane namakhumi kataru nababili okhurula Yerusalemu.

³⁰Ne mumuhika kukwe okwamakhumi kabili nachitaru, yahila abandu tsimia tsine natsitaru namakhumi kane nabarano — ababukulwa nende Nebusaradani. Abandu bosi halala aba yahila mubuhambe bali etsielefu tsine netsimia tsisasaba.

³¹Mumuhika kwa Ewilimerodaki yakholwa omuruchi wa Babulonia, yamanyia omuruchi Yehoyakini wa Yuda tsimbabasi khulwo khumulakhula okhurula mubuhambe. Yaka kekholekha litukhu liamakhumi kabili nakarano mumwesi kwelikhumi nakhabili mumuhika kwamakhumi kataru nakhane nachitaru okhurula Yehoyakini naarebwa mubuhambe.

³²Ewilimerodaki yamukhol'la aketsimbabasi ma namuhelesia obukono bwoluyali okhuyomba abaruchi bandi abayali n'nabo mubuhambe mu Babulonia.

³³Ma Yehoyakini yahuchil'lwa okhuhinia tsingubo tsitsie tsiobubohe ma niyebiikha tsingubo tsindi. Khandi yahuchil'lwa okhulia khumesa yomuruchi khumatukhu kaake kosi aka yali nasili mwoyo.

³⁴Buli litukhu liosi elia yali nasili mwoyo, yahebwa esitonye siamapesa kanyala okhurumikhila khubuha bubwe omwene.