Read lunyore YEREMIA 6 Bible Online

YEREMIA 6 - lunyore bible

YEREMIA 6

¹Inywe abandu bolwibulo lwa Benjameni mwilukhe khulwo khwehonia! Mwilukhe okhurula Yerusalemu! Khupe olwika mu Tekoa ma muhambie omul'lo kwokhuchetsiyia abandu bali Betsi Hakeremu. Okhumululwa nende okhukhuywa bili ahembi okhurul'la elubeka lwesinyolu.

²Litookho lia Sayuni nelieing'ono indahi nebutswa litsa okhumululwa;

³abaruchi betsa khupa ekambi yabwe yo halala nabasikari babwe. Betsa okhukhupaho amaheema kabwe okhufumbila litookho, ne buli mundu yetsa okhwombokha liheema ahaba niyenyele.

⁴Nababoole mbu, “Mwerechekhe khulwo khuseera Yerusalemu! Mwerechekhe! Khwitsa okhuliseera m'mubasu hakari!” Nebutswa khandi nababoole mbu, “Khuchelebele okhusila, litukhu lili ahembi okhuhwa, ne ebiniini biamukolooba bimetekhanga butswa okhuba ebirambi.

⁵Khwitsa okhuseera khubutukhu; okhwola khufunake amasisi akasira litookho.”

⁶OMWAMI Wokhunyala Biosi ulakile abaruchi yaba okhurema emisaala ma bombokhe ebifuumi khulwo khufumbila Yerusalemu. Ubooye mbu, “Nzia okhuhaana esinyasio khwitookho yili sichila liaitsulamwo abandu bokhusandia abandi.

⁷Singa obwesitaho sibiikhanga amaatsi kobulamu, nimbwo Yerusalemu libikhanga tsimbi tsialio. Mbul'langa obulwani nende obwirani mwitookho; obulwaye nende amafumire nibio ebiandolanga.

⁸Abandu ba Yerusalemu, mulekhe amanyakhano yaka kabe lichetsiyio khwinywe, ne nikarali mbwo nzia okhumukhupa omukongo; nzia okhulekha litookho yili okhuba likunda, habundu homundu aramenyanga tawe.”

⁹OMWAMI Wokhunyala Biosi yambool'la mbu, “Isiraeli yitsa okhuhinibwakhwo ebindu biosi singa emisaala chiemisabibu echiakuywekhwo emisabibu chiosi. Kho okhwola ohonie omundu wosi owonyala okhuhonia olwosili nobweyangu.”

¹⁰Nase ningalusia mbu, “Niwina owitsa okhumbul'la ise nikakhaba ndakhal'loma khubo nende okhubachetsiyia? Nabesikala marwi ma basuulanga okhuhul'la amang'ana kaako; batsekhel'langa kosi ake ibe umbooleye mbabool'le.

¹¹Lirima lilio khubo khandi nase lisambanga mukari, khulwe yako sindi onyala khwefwila n'nalio tawe OMWAMI.” Ma OMWAMI niyambool'la mbu, “Sundula oburima bwanje khubaana bali khutsinjila nende khumikhung'ano tsiababuukha basiani. Abasaatsa nende abakhasi balahilwa ehale; kata abali abakhungu sinabalekhwe tawe.

¹²Tsinyumba tsiabwe natsihebwe abandi halala nemikunda chiabwe nende abakhasi babwe. Ise nzia khuhaana esinyasio khubandu bomusibala muno.

¹³Buli mundu omukali nende omuti bateemanga okhunyoola amapesa mutsinjila tsiobubehi; abaroobi nende abesaalisi bakaatanga abandu.

¹⁴Bateemanga okhulola mbu amafuumire kabandu kali butswa singa obukhwarule. Baboolanga mbu, ‘Amang'ana kosi namalahi,’ olwa amang'ana karali amalahi.

¹⁵Sibalikhwo nes'simba murwe khulwo okhukhola amang'ana amabi yaka tawe? Tawe, sibalikhwo nes'simba murwe tawe; sibamanyile kata obwokhwira tsimoni khulwes'simba murwe tawe. Khulwe yako nabakwe singa obwabandi bakwa; olwa nambahelesie esinyasio, yilwo nalube olwokhumalilikha khubo. Ise OMWAMI mal'le okhuboola.”

¹⁶OMWAMI yabool'la abandu baabe mbu, “Musinjile mumasanganjila ma muhenge. Mureebe hetsinjila tsikhulu tsili khandi homuhanda omulahi okhusila kuli. Muchende khukwo ne mulamenya mumulembe.” Nebutswa baboola mbu, “Tawe, ifwe sikhukhola mbwo tawe!”

¹⁷Ma OMWAMI niyela abalindi basaatsa okhuhuyia olwolwika lwokhubachetsiyia lukhupa. Nebutswa baboola mbu, “Ifwe sikhwitsa khuhuyia tawe.”

¹⁸Ma OMWAMI naboola mbu, “Hulile, inywe abetsimbia, ma mweke khuketsa okhwekholekha khubandu banje.

¹⁹Hulile, esibala! Nakhupie abandu bano khusibi khulwamapaalo kabwe amabi sichila basuuye okhubukula amebaalo kanje nende okhulonda amang'ana kanje.

²⁰Esichila nganakane khukobwali bwabandeer'ranga okhurula Sheba nisina nohomba khukemitalasini chirulanga musibala siehale nisina? Ise sindahuchil'la okhubukula emisango chiabwe nohomba emisango chindi chiokhusambwa tawe.

²¹Kho nzia okhubakhola abandu yaba okhwesikar'ra nende okhukwa. Abasamwana nende abasiani babwe balafwa, kata abalina nende abamenyani babwe balafwa.”

²²OMWAMI yaboola mbu, “Abandu betsanga okhurula musibala esiesinyolu; lihanga lietsingufu okhurula ehale lierechekhelanga okhulwana lihe.

²³Berechekhele okhulwana nobuhingo bwabwe nende tsinganga, ne nabandu abalulu p'pa khandi babula tsimbabasi. Bakhupanga liyoka singa inyanza eholanga olwa belusianga etsisululi tsiabwe. Berechekhele okhulwana Yerusalemu.”

²⁴Ne abandu ba Yerusalemu baboola mbu, “Khumal'le khuhul'la amang'ana kabwe ne amakhono kefwe katubukhile, khutil'lwe nende okhusaalila nokhutsunwa singa okhwomukhasi oli neinumwa yokhwibula.

²⁵Sikhwakhateemakhwo okhutsia esioba welitookho noho okhuchenda khumihanda tawe, sichila abasuku befwe bali nebilasan'nwe ne oburi obukali bukhubotokhan'ne tsimbeka tsiosi.”

²⁶OMWAMI yabool'la abandu baabe mbu, “Mwebiikhe tsingubo tsiamatasi khandi mukalakale mwikokhe. Mulakaye amasika bululu singa obwa mulakayanga omwana wenywe omusiani omutelwa nafiye, sichila uyo owitsanga okhumukhuya alamuseera bungoyingoyi.

²⁷Yeremia, teema abandu banje singa obwonyala okhuteema esibia mumul'lo ma omanyilisie singa bali.

²⁸Bosi nabesikala marwi abarafunikhanga, abatinyu singa omukasa khandi singa esibia. Bosi nab'batsa, bachendachendanga nibachiikha abasiabwe.

²⁹Amahika katukhanga nomul'lo omukali, nebutswa ebichuma bituyilwe sibisal'lukhanga ma bikwa amaatsi tawe.

³⁰Abandu yabo bakhalangwe efetsa eyasuulwa sichila ise OMWAMI mal'le okhubasuula.”