Read lunyore YEREMIA 7 Bible Online

YEREMIA 7 - lunyore bible

YEREMIA 7

¹Kano niko ako MWAMI yabool'la Yeremia.

²“Sinjila musilibwa sie Hekalu ya Nyasaye ma okambe amang'ana kano: “Hulile ako MWAMI aboolanga inywe abandu ba Yuda bosi ababir'ranga mubilibwa bino khulwo khwekayakaya OMWAMI.”

³Kano niko ako MWAMI Wokhunyala Biosi, Nyasaye wa Isiraeli aboolanga: “Mukalukhanie ifwo ya mumenyelanga nende ebindu biamukholanga ne nzia khulekha mutsilil'le okhumenya hano.

⁴Mulekhe okhusubila mumang'ana kobubehi nimuboola mbu, ‘Yino ne Hekalu yo MWAMI, yino ne Hekalu yo MWAMI, yino ne Hekalu yo MWAMI!’

⁵“Mukalukhanie ifwo yamumenyelanga khandi mulekhe okhukhola ebindu biamukholanga. Mukholenje akahabwene buli mulala khuwasie.

⁶Mulekhe okhubakhol'la obubi sichila nabarende nohomba nabisandu nohomba nabakhasi balekhwa. Mulekhe okhwira abandu ababula esikha musibala muno. Mulekhe okhwekayakaya abanyasaye bandi sichila yako kanyala okhumumuma.

⁷Nimuba nimwakhekalukhania, nzia khulekha mutsilil'le okhumenya hano musibala siandali khuhelesia abakuka benywe singa omukabwa kwobulame bwabwe.

⁸“Henge, mwali okhura obusubili bwenywe mumang'ana kobubehi.

⁹Inywe mwibanga, mwiranga, muheyanga, muboolanga obubehi mukhwesuha, muhaananga emisango khu Baali, khandi mwekayakayanga abanyasaye abamuramanyakhwo olundi tawe.

¹⁰Inywe mukholanga ebindu ebiaasinya, ma khandi mwitsa khusinjila imbeli wanje, mu Hekalu yanje ma muboola mbu, ‘Khuli nomulembe.’

¹¹Mupaalanga Ehekalu yanje nahabundu habanuuli okhwebisa? Mal'le okhulola akamukholanga.

¹²Mutsie Shilo[1], habundu hokhuranga ahandela khulwo khwekayakayilwaho, ma mulole singa aka ndali okhukholayo khulwe tsimbi tsiabandu banje ba Isiraeli.

¹³“Inywe mwakhola tsimbi yitsi tsiosi, kata nikali mbu ndal'loma khu inywe ali akhenji, ne mwasuula khuhulila. Inywe simwakalusia olwa ndamulanga tawe.

¹⁴Kho akandakhola khu Shilo nakhole mbwo khu Hekalu yanje yiyi, eyamusubilangamwo. Hano musibala esiandahelesia abakuka benywe halala n'nenywe, nakhole esindu esitelwa esia ndakhola khu Shilo.

¹⁵Namukhunge okhurula mutsimoni tsianje singa obwa ndali khwilusia abaana benywe, abandu ba Isiraeli. Ise, OMWAMI, mal'le khuboola.”

¹⁶OMWAMI yaboola mbu, “Yeremia, orasaayila abandu yaba tawe. Oralakaya kata okhusaaya khulwabo tawe; orabareebela tsimbabasi okhurula khu ise tawe sichila sinzia khuhul'la akoboolanga tawe.

¹⁷Ibe siololanga akabakholanga mumatookho ka Yuda nende mumihanda tsia Yerusalemu tawe?

¹⁸Abaana barenyanga tsikhwi, ne abasaatsa balombanga ebitioli ne abakhasi batubulanga obufu khulwo khutekha etsikeki tsiokhuhelesia nyasaye mukhasi olangwanga Omukhaye womwami wo Mwikulu. Khandi basundulanga omusango kwewaini khubanyasaye bandi kho babe abanyala okhuusalisia ise.

¹⁹Ne nise tooto owabasalisianga? Tawe, besaalisianga butswa abene nende okhweler'ra es'simba murwe.

²⁰Khulwe yako, Ise OMWAMI Nyasaye nzia okhusundula lirima lianje lilulu khu Hekalu ino. Nzia okhusundula lirima lianje khubandu halala nemiruko kata nokhumisaala nende khubiraakwa. Lirima lianje nalifwane omul'lo kwomundu aranyala okhusimia.

²¹“Abandu banje, emisango milala musambilanga khulusambwa nichili emichima, ne echindi mwahuchil'lwa okhulia. Nebutswa ise, OMWAMI luno mboolanga munyala okhutsilia tsiosi.

²²Sindahaanakhwo lilako khubakuka benywe eliemisango chiokhusambwa nohomba emisango chindi chiosi, olwa ndabahinia okhurula Emisiri tawe.

²³Nebutswa ndabalaka okhulonda amalako kanje, kho mbe Nyasaye wabwe nabo babe abandu banje. Ne ndababool'la bamenye singa obwa ndabalaka kho amang'ana kosi kabe amalahi khubo.

²⁴Nebutswa sibaalonda amalako kanje kata okhubukulamwo obuha tawe. Nikarali bakhola esiemioyo chiabwe emitinyu khandi echieimbotokha chiababool'la okhukhola, ma bamala nibaba ababi musilenje siokhuba abalahi.

²⁵Okhurula litukhu liabakuka benywe barula Emisiri okhwola litukhu lino, ndatsilil'la okhuruma abarumwa banje, abaroobi khwinywe.

²⁶Ne sialiho owahul'la akababoola tawe kata owabukula muko obukono tawe. Nikarali mwatsilil'la okhuba abesikala marwi nende abeindiri okhuyomba abakuka benywe.

²⁷“Kho Yeremia ibe witsa khul'loma amang'ana yaka khubandu banje, nebutswa sinabakhuhul'le tawe; nobalange, nebutswa abulaho owanokhukalusie.

²⁸Nobabool'le mbu lihanga liabwe sililondanga amalako kanje, ise OMWAMI Nyasaye wabwe, nohomba sibekangakhwo esindu siosi okhurula khukhuhebwa esinyasio tawe. Obusubilwa bwafwa mubo. Sialiho ol'lomanga khukobusubilwa tawe.

²⁹“Mwekhule inywe, abandu ba Yerusalemu; mubeke amaswi kenywe ma mukafube ehale. Mwembe tsinyembo tsiamasika nimuli khubutenje bwesikulu, sichila ise, OMWAMI ndi nelirima, ma mal'le okhusuula abandu banje.

³⁰“Abandu ba Yuda bakhol'le esindu sietsimbi. Bamal'le okhura ebiniini ebiaasinya mu Hekalu yanje ma bachifwabisie.

³¹Mwibanda lia Hinomu bombokhele olusambwa olulangwa Tofetsi, kho babe abanyala okhuhaana abasiani babwe halala nabakhaana babwe singa emisango chiokhusambwa m'mul'lo. Ise sindali okhubalaka okhukhola yaka tawe — sikalikhwo kata mumapaalo kanje tawe.

³²Khulwe yako, inyinga yitsanga olwolusambwa yilwo lurakhalangwe Tofetsi tawe nohomba Libanda lia Hinomu tawe, nebutswa liakhalangwe Libanda lio Bwiri. Bakhayabileho abandu sichila sihalikhwoho habundu handi ahokhubayabila tawe.

³³Emilambo chiabwe tsiakhabe esiakhulia siamanyonyi nende esietsinyama nabulimo, ne sialiho owakhatsikhunge okhurulaho tawe.

³⁴Esibala siakhakwe esitsiimi. Mumatookho ka Yuda nende khumihanda etsili Yerusalemu ndakhekal'le amayoosi kobuyanzi nende akobusangali, kata nende amayoosi akobusangali bwamasabo kebisel'lo.”