Read lunyore YEREMIA 8 Bible Online

YEREMIA 8 - lunyore bible

YEREMIA 8

¹“Munyinga yene yiyo, amakumba kabaruchi nende akabemeli ba Yuda, kata nende amakumba kabesaalisi, nakabaroobi nende akabandu bandi bamenyele Yerusalemu, kakhahinibwe mubilindwa biako.

²Musilenje siokhukabunjelesia nende okhukayabila, amakumba kabwe kakhabe singa imbolela elekhelwe hasi khumaloba. Kakhabakalwe imbeli weliuba, nomwesi, nende imbeli wetsinyininyini ebili ebindu ebiabandu yaba bayanza, nende okhubirumikhila, khandi okhurunilisia khubio amang'ana nende okhubiekayakaya.

³Khandi abandu bomwihanga lietsimbi yili abakhahonokokha ma nibamenya habundu hosi ahandali okhubusalania bakhekombe okhufwa okhuyomba okhutsilil'la okhuba mwoyo. Ise OMWAMI Wokhunyala Biosi mal'le okhuboola.”

⁴OMWAMI yambool'la reebe abandu baabe mbu, “Olwomundu akwitsanga hasi, siamalanga abuukha tawe? Omundu naba nakorwa injila, siamalanga akalukha inyuma?

⁵Nenywe abandu banje, esichilanga nimurula khu ise oburakalukha khandi nisina? Muhandanga khubiniini bienywe ma musuula okhukalukha khu ise.

⁶Ndali okhuhuyia bulahi, nebutswa simwaboola akatooto tawe. Abulakhwoho kata mulala khwinywe obeleeye khulwamabi kakholanga; khandi abulakhwoho khwinywe oreebele mbu, ‘Nisina esiakhol'le esibi?’ Buli mundu atsitsachil'langa okhukhola ako uwe, singa esululi yilukhanga okhutsia mubulwani.

⁷Kata etsikhonye tsiamanya olwa tsienyekhanga tsikalukhe; ebituka, amasoko, nende etsiminyi, bimanyile amatukhu kokhupulukha khutsia musibala sindi. Nebutswa inywe abandu banje, simumanyile amalako karumikhilanga okhumuruka tawe.

⁸Mwakhaboola mbwena muli abachesi, khandi mwamanya amalako kanje? Lole amalako kakalukhanibwa nende abebaali ba Malako abarali abasubilwa.

⁹Abasaatsa abachesi mwinywe basimbibwanga emirwe; bakoyananga nende okhutil'lwa mumibero. Bamala okhusuula amang'ana kanje; nibuchesi sina obwa bali n'nabwo?

¹⁰Kho nambelesie emikunda chiabwe abandu bandi abahia ne abakhasi babwe nambahaana khubasaatsa bandi. Buli mundu, omukali nomuti ateemanga okhunyoola amapesa munjila yobubatsa. Kata abaroobi nende abesaalisi bakaatanga abandu.

¹¹Balolanga amafumire kabandu banje singa obukhwarule. Ma baboola mbu, ‘Amang'ana kosi kali namalahi’ olwamang'ana karali amalahi.

¹²Abandu banje, mwali okhusimba emirwe sichila mwakhola ebindu bies'sinyo? Tawe, simwali khusimbakhwo emirwe kata nahati, simumanyile kata obwokhwira tsimoni khulwe es'simba murwe tawe! Khulwe yako mulakwa singa obwabandi bakwa; olwa nzia okhumuhelesia esinyasio simulihul'likhakhwo khandi tawe. Ise, OMWAMI mal'le okhuboola.

¹³“Ndenya okhubunjikha abandu banje singa omundu abunjikhanga amacheseke; nebutswa bafwana singa omusaala kwomusabibu okubulakhwo tsinzabibu, khandi singa omukhuyu okubulakhwo amakhuyu, kata amasafu kakwo kayoma; khulwe yako mal'le okhuhuchila abandu bandi okhubukula emikunda chiabwe.”

¹⁴Abandu ba Nyasaye bareeba mbu, “Esichilanga nikhusikhaye nikhurefwokoyakhwo nisina? Yitse ino, ifwe khulelukhila mumatookho kasirwa namasisi, ma khufwilemwo. OMWAMI Nyasaye wefwe wakhukhalachila okhufwa; wakhuhelesia esumu khunywe, sichila khwamala okhumwonela.

¹⁵Khwekombanga okhuba nomulembe nende inyinga yokhuhon'namwo, nebutswa yako kosi kali butswa; oburi obukali bwakhwitsila musilenje siako.

¹⁶Abasuku befwe, bamal'le okhwola mwitookho lia Dani; khuhul'langa okhuhelaana okhukali khwetsisululi. Esibala siosi sitechelanga olwe tsisululi tsiananga. Abasuku befwe betsele okhumuma esibala siefwe nende ebindu biosi ebilimwo, litookho liefwe nende abandu bosi abalimwo.”

¹⁷OMWAMI aboolanga mbu, “Lole! Rumanga tsinzokha mwinywe, tsinzokha etsili nobusungu etsiranyala okhupoyibwa neindesi, ne tsitsa okhumulumaka.”

¹⁸Esibeela sianje sisinyala okhuhotselesibwa tawe; Omwoyo kwanje kulwal'le.

¹⁹Hulila! Mbul'langa abandu banje nibalakaya musibala siosi. Balakayanga nibaboola mbu, “OMWAMI siasili Sayuni tawe? Omuruchi wa Sayuni sasiliyo tawe?” OMWAMI, ouli omuruchi wabwe naye nakalusia mbu, “Esichil'le nimumbelesia lirima khulwokhwekayakaya ebiniini bienywe, nende khulwo khwinamila abanyasaye benywe betsinzibulo ababula obukhala nisina?”

²⁰Abandu nibalakaya nibaboola mbu, “Erotso yihweye, okhuchesa khuhweye, nebutswa khusili okhuhonibwa tawe.”

²¹Omwoyo kwanje kusaliye, sichila abandu banje basalisibwe! Ndekhuulanga; amakani kanje kosi kafwiye.

²²Indesi sielikhwo Gileadi tawe? Abalesi sibalikhwoyo tawe? Khe nikali mbwo busina abandu banje barahonibwe tawe?