Read lunyore YEREMIA 9 Bible Online

YEREMIA 9 - lunyore bible

YEREMIA 9

¹Makano omurwe kwanje kulabakhwo liyabo liamaatsi, netsimoni tsianje tsilaba esitaho siamasika, kho ndaba onyala okhwekhuula om'basu nobutukhu, khulwabandu banje abamal'le okhwirwa.

²Makano ndabakhwo nende habundu hokhubutsila musitsiimi, handakhabeye ehale khubandu banje. Bosi sibali abasubilwa tawe, nomukanda kwabasiemani.

³Bayerechekha okhuboola obubehi, obukaati musilenje siobusubilwa nibwo oburukanga esibala. OMWAMI yaboola mbu, “Abandu banje bakholanga tsimbi nibalondokhania, ne sibambuchil'langa ise singa Nyasaye wabwe.”

⁴Buli mundu okhwola abe omuchesi khumulina uwe, khandi omundu wosi arasubila omusiani wabwe tawe; Sichila buli musiani alabukula obukono bwowasie, khandi buli omundu akaatanga abalinabe.

⁵Omulina akaatanga omulina wasie, ne abulaho oboolanga akatooto, bayekia tsinimi tsiabwe okhuboola obubehi. Bekhunguyianga abene khulwokhukhola tsimbi.

⁶Bamenya mukhuboola obubehi, ne mubukaati bwabwe sibambuchil'langa tawe. Ise OMWAMI mal'le okhuboola.

⁷Khulwa akene yako OMWAMI Wokhunyala Biosi aboolanga mbu, “Nzia khutsienula abandu banje singa esibia sisiywanga m'mul'lo ma mbateeme. Abandu banje bakhola tsimbi — nisina esindi sianyala okhubakhol'la?

⁸Tsinimi tsiabwe tsifwana tsisele etsilikhwo esumu yokhwira; bamenya nibaboolanga obubehi. Buli mundu wamenya nal'lomanga amang'ana kokhusangasia khuwasie, nebutswa mukatooto arekanga omubero kwokhumutiila.

⁹Ndakhabula okhubahelesia esinyasio khulwamang'ana yaka? Ndakhabula okhubanza es'sialia khwihanga singa yili? Ise OMWAMI mal'le okhuboola.”

¹⁰Nase nimboola mbu, “Nzia okhwekhuula ebikulu, nende okhulakaya khulwo obwayilo, sichila bimal'le okhwoma k'ka, ne sialiho onyala okhubir'ra mubio tawe. Tsing'ombe sitsihul'likhakhwo nitsiana tawe. Amanyonyi nende tsinyama nabulimo tsiayilukha okhurulamwo.”

¹¹OMWAMI yaboola mbu, “Nzia okhukhola Yerusalemu okhuba esifuumi siamahindi, khandi habundu hebibwe okhumenya; amatookho ka Yuda kalakwa esitsiimi, habundu homundu aranyala okhumenya tawe.”

¹²Nase nireeba mbu, “OMWAMI, esichilanga esibala nisimululwamwo ebindu khandi nisioma singa esitsiimi, ma kho omundu sianyala okhubir'ramwo tawe nisina? Niwina omuchesi onyala okhumanyilisia yaka? Niwina owe ibe wainosisie yaka, kho abe onyala khubool'lakhwo abandi?”

¹³OMWAMI nakalusia mbu, “Kano kali okhwekholekha sichila abandu banje balekha okhulonda amebaalo akandabekesia. Sibalonda amalako kanje kata okhukhola akandababool'la tawe.

¹⁴Musilenje yisio abandu banje bali abesikala marwi ma bayekayakaya ebiniini bia Baali singa obwa bapapa babwe babekesia okhukhola.

¹⁵Khulwe yako, hulile khuke ise, OMWAMI Wokhunyala Biosi, Nyasaye wa Isiraeli nzia okhukhola: Nzia okhuhelesia abandu banje amatanya amalulu okhulia nende esumu okhunywa.

¹⁶Nzia okhubasalania mubetsimbia tsindi aba bo nohomba kata ababakuka babwe barahul'lakhwo tawe; khandi nzia okhuruma abasikari okhubalwana okhwola olwa babamuma bosi pe.”

¹⁷OMWAMI Wokhunyala Biosi yaboola mbu, “Mupaale khukekholekhanga! Lange abakhasi bokhwekhuula betse, nende abakhasi abembanga tsinyembo tsiesibeela.”

¹⁸Abandu nibaboola mbu, “Babool'le betse bwangu bakhwembele tsinyembo tsiesibeela, okhwola olwetsimoni tsiefwe tsiitsulamwo amasika, ma ebikwochi bitsinzibe khulwo okhulakaya.”

¹⁹Hulile liyoka liokhulakaya elili Sayuni, “Ifwe khutibile! Khuli nes'simba murwe esikali! Okhwola khurule musibala siefwe; amataala kefwe kasambuywe.”

²⁰Nase nimboola mbu, “Huyie ako MWAMI yaboola, abakhasi inywe, ma mumanyilisie amang'ana kaake. Mwekie abakhaana benywe obwokhwekhuula, ne abalina benywe obwokhwemba tsinyembo tsiesibeela.

²¹Olufu lwinjiliye mumadilisa kefwe, ma lwinjiye mutsinyumba tsiefwe tsioburuchi, lumal'le okhwira abaana befwe abali mumihanda, nende abasiani ababuukha abali mubiiro.

²²Emilambo tsisalan'ne siahabundu, singa ebibunjikha bieimbolela mumikunda, khandi singa amabele akacheselwe ma akalekhelwe munyuma nende abachesanga, amabele akomundu arabunjikhanga tawe. Kano niko ako MWAMI abooye mubool'le.”

²³OMWAMI yaboola mbu, “Abandu abalwenyukhu barekhonya khulwobuchesi bwabwe tawe, kata abandu abetsingufu barekhonya khulwe tsingufu tsiabwe tawe kata abandu bahinda barekhonyela obuhinda bwabwe tawe.

²⁴Omundu wosi niyakhenya okhwepaaka, yepaakwe mbu waimanya khandi amanyilisianga liba lianje, sichila tsimbabasi tsianje netsiralilu, khandi kholanga akali akahabwene khandi akatooto. Yibi nibio ebindu ebinyanzisianga. Ise, OMWAMI mal'le okhuboola.”

²⁵OMWAMI yaboola mbu, “Inyinga yitsanga olwa ndakhahaane esinyasio khubandu abasebwa ne nibaralonda indakano yokhusebwa.

²⁶Nabo nabandu ba Misiri, Edomu, Amoni, Moabu nende yabo bosi abanyele musitsiimi siehale ababekanga liswi liabwe. Okhuba abandu yabo bosi sibasebwa tawe kata Abaisiraeli bosi sibarumikhilanga amalako ke Indakano yokhusebwa tawe.”