Read lunyore TSINDEKHUULU 1 Bible Online

TSINDEKHUULU 1 - lunyore bible

TSINDEKHUULU 1

¹Mako, obwa Yerusalemu lisikaye es'soma, litookho elialinjimwo abandu abenji! Lialinji niliahebwa oluyali nesibala, ne luno lifwana omukhasi mulekhwa; Litookho lioluyali okhusila mukosi, likhol'lwe omuhambe wa kandi.

²Yerusalemu alakayanga obutukhu bwosi; amasikake karulanga nikalondola tsindama, sialikhwoho kata mulala khubalinji abalina babe omuhotselesianga tawe. Abalina babe bamusieman'ne, ma bosi bakwiye abasuku babe.

³Abandu ba Yuda nabahambe abaranyala siosi, bakhungilwe okhurula mungo mwabwe. Bamenyele mubibala bindi; mumaloba kabaranyala okhuboola nakabwe; Bafumbiywe nabasuku, ne habulaho ahabanyala okhwilukhila.

⁴Abulaho otsitsanga mu Hekalu luno okhwekayakaya amatukhu kemilukha. Abakhaana abembangaho basalilanga, ne abesaalisi babindanga butswa, Ebilibwa bielitookho bibulamwo abandu, ne Sayuni etsunungwa.

⁵Abasuku babe nibo abamurukanga, bali nobunyali khuye sichila OMWAMI umukhol'le okhusaalila khulwe tsimbi tsitsie tsinyinji; Abaanabe bafumiywe ma bahil'lwe mubuhambe ehale.

⁶Eng'oono yelitookho lia Yerusalemu lialinji n'nayo siesiliho tawe. Abemeli bamwo bafwana tsimongo etsihweye tsingufu, sichila tsili neinzala. Tsingufu tsiatsio tsihweye sichila tsilukhanga okhurula khubahitsi.

⁷Yerusalemu eliasasikha luno, litsul'langa amatukhu kakhale ekeing'ono yalio. Olwa liaseerwa nabasuku, sialiho owalikhonya tawe; Abasuku balio batsekhel'langa okhulekwa khwalio.

⁸Oluyali lwalio lwakora; lili esiekenye ne lichaaywanga. Yerusalemu elibindanga nende okhubisa obweni bwalio khulwe es'simba murwe. Yerusalemu yali okhwefwabia khulwo khukhola tsimbi tsies'sinyo.

⁹Tsimbi tsitsie tsialolekha habulafu, nebutswa siyapaala khukanakekhole khuye tawe; okhulekwakhwe khwali okhubi okhusila; ne sialiho owamuhotselesia tawe. Abasuku baabe bamulekele ne alakayilanga OMWAMI amubeele tsimbabasi.

¹⁰Abasuku baabe bayaakile emianduchie chiosi. Yalola olwa benjila mu Hekalu omwo MWAMI yali niyakaya Abetsimbia balekhe khwinjilamwo.

¹¹Abandu baabe babindanga olwa basikhaba esiokhulia; basilanianga emiandu chiabwe khulwokhunyoola ebiokhulia ebichila babe mwoyo. Litookho lilakaya niliboola mbu, “Mengakhwo OMWAMI, lola esibi siandimwo.”

¹²Yalakayila buli mundu owabiranga naboola mbu, “Mengekhwo mulole! Abulakhwoho owanyoola obutsune singa ise. Obutsunwe bwo MWAMI yander'ra nali nelirima.

¹³“Yaruma omul'lo okhurula ikulu okwali okhusamba mukari. Yali okhurekela omubero ma niyandeera khwiloba. Ma niyafuuba niyandekha ninzunwangwa khasotso.

¹⁴“Yalola tsimbi tsianje tsiosi ma natsiboha halala. Yachisunga mwikosi mwanje, ma obusiro bwachio nibuukhola okhuba omutekhele. OMWAMI yambana khubasuku banje, ne sindali nende esiandakhanyala imbeli wabwe tawe.

¹⁵“OMWAMI yakhola inzekhelesi khubasikari banje bosi betsingufu; Naruma abasikari okhwira ababuukha banje bosi. Yatubula abandu banje singa emisabibu tsitubuliywe musinu.

¹⁶“Yako niko akachilanga tsimoni tsianje tsirulangamo amasika amenji. Abulaho onyala okhumbotselesia; abulaho onyala okhundinyilisia. Omusuku umal'le okhundeka; abandu babulakhwo esiabalekheywe.

¹⁷“Nginganga emikhono chianje ikulu, nebutswa sialiho owitsanga okhukhonya tawe. OMWAMI ulangile abasuku okhuuseera tsimbeka tsiosi; Bakhol'langa singa esindu siabola.

¹⁸“OMWAMI akholanga habwene, sichila ise ndali okhumufukula. Yanze mumbulile, inywe abandu mwesi, mungolekhwo singa nzunwanga. Abasiani banje ababuukha nende abakhaana bahil'lwe mubuhambe.

¹⁹“Ndalanga khubayanzwa banje ne basuula okhukhonya. Abesaalisi nende abemeli bafwila mumihanda chielitookho, nibakhabanga ebiokhulia ebichila babe mwoyo.

²⁰“E OMWAMI henga khubutsunwi bwanje, henga khukhusalila khwomwoyo kwanje, omwoyo kwanje kwesikokele musibeela khulwe tsimbi tsianje, obwirani buli mumihanda; kata okhufwa khuli mutsinyumba.

²¹“Huyia khukhubinda khwanje; sialiho owokhunemia omwoyo tawe. Abasuku banje bosi basangal'le sichila undereye likhupako. Leera litukhu eliawasubisia, ma obakhole abasuku banje basalile singa salilanga.

²²“Obakhalachile khulwobubi bwabwe bwosi; obahelesie esinyasio singa wali khumbelesia esinyasio khulwe tsimbi tsianje. Mbindanga musibeela, ma omwoyo kwanje nomusalilu.”