Read lunyore TSINDEKHUULU 2 Bible Online

TSINDEKHUULU 2 - lunyore bible

TSINDEKHUULU 2

¹Mako obwo Mwami, mwilekolie afuunikhile Sayuni musiilima! Eng'oono ya Sayuni yomwikulu umal'le okhuchisasia. Khwitukhu lilie lioburima yali okhwebala kata Ehekalu yiye.

²OMWAMI yali okhumulula amataala kosi mu Yuda sila tsimbabasi, Natuya amasisi kosi akali nikabotokhana esibala. Yaleera es'simba murwe khwihanga nende abaruchi balio.

³Mwileko lilie ufunakile tsingufu tsia Isiraeli. OMWAMI yali okhusuula okhuukhukhonya olwa basuku betsa. Yali okhukhusamba singa omul'lo namululanga buli sindu.

⁴Yachomia tsisele tsitsie khu ifwe singa omusuku. Yera bosi abakhuyanzisianga nokhukhusangasia. Hano mu Yerusalemu khwali okhusaalila khulwe lirimalie likali.

⁵Singa omusuku, OMWAMI umuluye Isiraeli; umal'le okhulekha tsiminga nende tsinyumba nitsisasikhile. Umal'le okhuleer'ra abandu ba Yuda esibeela sieinziayo.

⁶Utuyile Ehekalu mubitonye, habundu ahakhumwekayakayilanga. Umal'le khuhiniaho amatukhu kemilukha nende amatukhu ke Sabato. Omuruchi nende omwesaalisi basalisibwe nelirima lilie.

⁷OMWAMI yali okhusuula olusambwa lulwe, khandi ulekhele Ehekalu yiye inzienukhu. Yali khuhuchil'la omusuku okhusamba amasisi kayo. Bali okhuhanzukha liyoka liobulechi habundu ahakhwekayakayilanga nobusangali.

⁸OMWAMI yali khuchooma mbu oluhinga lwa Sayuni okhwola lukwe. Yali okhuluchela lwosi okhulola mbu lwosi lumuluywe. Eminaara nende amasisi biosi biasasikha.

⁹Ebilibwa bikon'ne hasi nifuunikhiywe namahindi. Omuruchi nende abandu boluyali bali mubuhambe luno. Amalako sikebaalwanga luno tawe, ne abaroobi sibanyoolanga amabisulo okhurula khu MWAMI tawe.

¹⁰Abasakhulu ba Yerusalemu bekhaaye hasi, bekhaaye hasi nibasiling'an'ne tsi; bebakhile olukuukhi khumirwe chiabwe, ne nibeboha tsingubo tsiamatasi. Abakhaana ba Yerusalemu benamisie emirwe chiabwe hasi.

¹¹Tsimoni tsianje tsichonyele khulwokhulakaya; omwoyo kwanje kuli mukhutsunwa. Esibeela sinjonyisie khulwo okhumululwa khwabandu banje. Abaana basinuna nende abaana bati bahumbutsananga nibakwa munjila tsielitaala.

¹²Bareebanga abanyina mbu, “Ebiokhulia nende amaatsi bili hena?” Bakwitsanga khumihanda singa abafumirwa, ma bafwa butswa kalaha nibakon'ne khubilifu biabanyina.

¹³E Yerusalemu, ndakhaboola sina khuibe omuyanzwa Yerusalemu? Ndakhakhuhotselesia mbwena? Abulaho owasalila singa mbu. Likhupako lilio libula olwakho singa inyanza, sikhulikhwo nobunaayi bwosi tawe.

¹⁴“Abaroobibo babula akabanyala okhumbool'la mburali ob'beyi bwonyene; Amakambo kabwe kali okhumukaata sichila sikamumanyia tsimbi tsienywe tawe. Bali okhuchila nimupaala mbu kabulaho akamwakheyama.”

¹⁵Abandu ababir'ranga ahembi khwitookho, bamuhenganga nibamutsekhel'la. Basungusanga emirwe chiabwe, ma batsekhel'la okhumumwa khwa Yerusalemu. Lino nilio litookho eliabeyenje eliokhuyanzisia noho? Lino nilio litookho liesibala sielol'langakhwo noho?

¹⁶Abasuku baabo bosi bakhuseya okhusila, banyokhosia nibelumaka ebitere, nibaboola mbu, “Khumumumile! Lino nelitukhu eliakhwalindiliyenje! Leelo khulinyooye; khuliluutsi!”

¹⁷OMWAMI umal'le okhuhesia akayasubisia nakhole: umal'le okhumulula sila tsimbabasi singa obwa yali niyakhuchetsiyia okhurula khale. Yahaana obulechi khubasuku befwe, yabahelesia okhusangal'la okhulekwa khwefwe.

¹⁸Inywe abandu ba Yerusalemu, lekhe emioyo chienywe chilakayile OMWAMI! Amasika keerulukhe singa omuchela om'basu nobutukhu, mulakaye nende okhwekhuula sila okhuhuluukha!

¹⁹Obutukhu bwosi mubukhe khase na khase khulwokhulakayila OMWAMI! Mwikul'le OMWAMI Nyasaye akali mumioyo chienywe; muchinguule amakhono kenywe khuye khulwobulamu bwabaana benywe, abafwitsanga khulwe inzala khumihanda tsietsinjila!

²⁰OMWAMI, henga olole! Henga olole yabo abosandianga! Abakhasi balitsanga emibili chiabaana babayanza! Abesaalisi nabaroobi ber'rwanga mu Hekalu mwene.

²¹Ababuukha nabakhulundu bosi bakona hasi khunjila nibafwiye. Abasiani ababuukha nende abakhaana berelwe nolukanga lwabasuku. Wali okhubeera sila tsimbabasi khwitukhu eliawali noburima.

²²Walanga abasuku banje okhwitsa khwisabo liokhuriisia okhurula tsimbeka tsiosi, ne sialiho owakhahonokokhele khwitukhu lielirima lilio tawe. Beera abaana banje abati abandakhusia khandi abandayanza.