Read lunyore TSINDEKHUULU 3 Bible Online

TSINDEKHUULU 3 - lunyore bible

TSINDEKHUULU 3

¹Ise nise omanyile esiakaboolanga okhuhebwa esinyasio na Nyasaye.

²Yanzemel'la okhutsia mukari musiilima.

³Khandi yali okhundiaba khase na khase, sila khumbeleel'lakhwo.

⁴Ulekhele amakhwaku khumubili nikatikhile nikasili okhuhona, khandi ufunakile amakumba kanje.

⁵Unzikaliye musibohelo sieminyakhano nende okhutsunwa.

⁶Umbakisie okhumenya musiilima siolufu esirahwetsanga.

⁷Waimboha neminyol'lo. Ise ndi omubohe orakhanyala okhwilukha tawe.

⁸Ndakayanga butinyu khulwokhwenya obukhonyi, nebutswa Nyasaye asuulanga okhumbuyia.

⁹Yekaaye tsinjila tsianje namachina amabaatse, ukhol'le tsinjila tsianje okhuba tsingotsobanu.

¹⁰Yali okhunindil'la singa eliaka; yarumilekhwo singa esimba.

¹¹Yali okhuukhunga okhurula khumuhanda, niyarandulania mubitonye, ma niyandekha oranyala esindu.

¹²Yakhwesa obuyingo bubwe, ma nachomia tsisele tsitsie khuise.

¹³Alasile tsisele tsitsie mukari mwomubili kwanje.

¹⁴Abandu banzekhel'langa om'basu kwosi; Ise ndi inzekhelesi khubosi.

¹⁵Umbakisie okhumil'la amaatsi amalulu mulumil'lo, khandi unzitsusisiemwo nebiakhulia ebilulu nende amaatsi amalulu.

¹⁶Ubakhile obweni bwanje nelitohi, khandi olekhele ameno kanje okhulia amachina.

¹⁷Sinyala okhwitsul'la obulamu nende omulembe kata obusangali nisina tawe.

¹⁸Sisili namatukhu amenji kokhuba mwoyo tawe; sisili nobunaayi mu MWAMI tawe.

¹⁹Amapaalo khumunyakhano kwanje, nende okhubula obumenyo, nesumu khuise.

²⁰Mpaalanga khuko khase na khase, ne omwoyo kwanje kwesikoka.

²¹Nebutswa obunaayi bukalukhanga olwa nzitsul'langa ling'ana elala yili:

²²Obuyanzi bwo MWAMI nende tsimbabasi tsitsie ebirasimanga, bitsilil'la okhubaho.

²³Bibetsanga ebiyia buli mukamba, obusubilwabwo nobukhongo po.

²⁴OMWAMI niye owandi n'naye yenyene, kho retsanga obunaayi bwanje muye.

²⁵OMWAMI nomulahi khuyabo abasubilanga muye; khu uyo oumukhabanga.

²⁶Nobulahi omundu atsilil'le okhulindil'la OMWAMI khulwokhunyoola obuhonia.

²⁷Nobulahi omundu okhweka okhwesimilisia nasili omubuukha.

²⁸Yeekhale yenyene naholel'le, sichila OMWAMI niye omureeye mulio.

²⁹Khwiname mukhwetutuyia, haundi obunaayi bwakhaba nibusiliho.

³⁰Kata khube nikhutiabilwe nende okhunyekwa, okhwola khuhuchil'le kosi.

³¹OMWAMI nowetsimbabasi, sialakhusuula khulwe inziayo tawe.

³²Nonyala okhukhuler'ra esibeela, nebutswa obuyanzibwe khu ifwe nobwetsingufu khandi obwatooto.

³³Sichila sayanzisibwanga okhuleera amanyakhano, nohomba esibeela khubandu tawe.

³⁴OMWAMI wamanya olwe emioyo chiefwe chituyilwe mububohe.

³⁵OMWAMI umanyile olwa khubulanga okhukhol'lwa akarakwanile;

³⁶umanyile olwa akahabwene kasiamibwanga musiina.

³⁷Niwina owakhaboola kekhole ma kekhole OMWAMI narabooye kekhole?

³⁸Amalahi nende amabi kosi karulanga m'munwa kukwe.

³⁹Busina khwekane olwa khuhebwanga esinyasio khulwe tsimbi tsiefwe?

⁴⁰Khuhengelesie tsinjila tsiefwe, ma khumukalukhile OMWAMI.

⁴¹Khwikule emioyo chiefwe khu Nyasaye oli mwikulu ma khusaaye mbu,

⁴²“Khwayona nende okhukhufukula, ma ibe OMWAMI, osili okhukhubeela.

⁴³“Wakhulondel'la ma nokhwira, tsimbabasi tsitsio tsiabiswa nelirima lilio.

⁴⁴Wafumila lilumbesi, kho okhusaaya khwosi khulekhe okhubira khwole owa oli tawe.

⁴⁵Ukhukhol'le butswa amakhokoro namakokha hakari wetsimbia tsiabandu.

⁴⁶“Abasuku befwe bosi bakhunyekanga nende okhukhutsekhel'la.

⁴⁷Khwabiriye mumakhupako nende okhusaalila; khwamenya musibi nende muburi.

⁴⁸Tsimoni tsianje tsibisianga amasika singa omuchela, sichila abandu banje bamuluywe.

⁴⁹“Ndatsilil'la okhubisia amasika oburalekha tawe.

⁵⁰Okhwola olwa OMWAMI ahenga hasi, niyandola, okhurula owaali mwikulu.

⁵¹Omwoyo kwanje kubelelanga olwa ndolanga akekholekha khubakhaana bomwitookho.

⁵²“Ndatiilwa mumubero singa linyonyi nende abasuku barali nesifune sichila baasinyikhile.

⁵³Bafuuba mubuko nisili omulamu, ma nibafuunikha khwiko tsana lichina.

⁵⁴Amaatsi nikamila okhwola khwikosi, nimpaala mbu okhufwa khunzoleye.

⁵⁵“Nindi hasi mubuko, E OMWAMI ndakhulakayila.

⁵⁶Ne olwa ndakhureeba noyanza ohul'le okhulakaya khwanje, wahuyia.

⁵⁷Wali khungalusia ma niumbool'la raria tawe.

⁵⁸“Wetsa okhusoola, OMWAMI ma nohonia obulamu bwanje.

⁵⁹E OMWAMI, uluutsi amabi akakholelwanga, umbeele tsimbabasi olwokhalakanga esiina.

⁶⁰Wamanya singa abasuku banje basinyikhila, khandi singa basiemananga ise.

⁶¹“Ibe uhuliye nibanyekanga ise, E OMWAMI; wamanya obuloosie bwabwe bwokhusiemana.

⁶²Bamonyanga ise om'basu kwosi, ne nibaloosia akokhukhola.

⁶³Banzekhel'langa okhurula mukamba tsuli okhwola butukhu.

⁶⁴“E OMWAMI, obahelesie esinyasio khukabakhola.

⁶⁵Lama khubo esilaamo, obetsusie nende esihenda mwoyo!

⁶⁶Obakhabe hosi hababa nibali, ma obakhuye bosi okhurula khusibala!”