Read lunyore TSINDEKHUULU 4 Bible Online

TSINDEKHUULU 4 - lunyore bible

TSINDEKHUULU 4

¹Etsahabu yefwe ing'inang'inu imwamile tii; amachina ke Hekalu kasalanibwe khumihanda.

²Abasiani ababuukha ba Sayuni balinji nobukusi khu ifwe singa etsahabu, nebutswa luno bafwana neindabu eng'ayile eyalombwa khwitohi.

³Kata ebibwe binuuninjia abaana babio, nebutswa abandu banje bafwana amahuto, akarenyanga abaana bako.

⁴Balekhanga abaana abatoro khulwe inzala nende obuluho; abaana basabanga ebiakhulia, ne sialiho owakhabahelesia tawe.

⁵Abandu balitsanga ebiakhulia ebilahi, bafwilanga khumihanda khulwe inzala; yabo abakhusibwa mutsinyumba tsiobwale, luno bakhabanga ebiokhulia mumapipa kamakokha.

⁶Abandu banje banyoola esinyasio esikali okhuyomba abandu ba Sodoma, abesibala siabwe siakhuywa matetekhana nende obunyali bwa Nyasaye.

⁷Abasiani babaruchi bali abalafu okhuyomba etsaluchi, abakhomefu khandi abetsingufu nende obulamu obulahi.

⁸Luno bakonanga khumihanda nibaramanyikhan'ne tawe, m'moni mwabwe mumwamile tii olwa bafwiye, likhoba liabwe liomele singa olukhwi, ma lihande khumakumba kabwe.

⁹Yabo abafwila mwihe balikhwo bulahi okhuyomba abafwa olunyuma, yabo abafwa kalaha khulwe inzala, nibabula ebiakhulia ebichila babe mwoyo.

¹⁰Likhupako elietsa khubandu banje, lialeera amang'ana kokhuriisia; abamama bobuyanzi batekha abaana babwe khulwo khubalia.

¹¹OMWAMI yali okhuhinia oburimabwe bwosi; nahambia omul'lo khwitaala lia Sayuni ma nikusamba litaala liosi.

¹²Sialikhwoho omundu wosi kata abaruchi bebibala biebucheni, abasubilanga mbu abaseeri bakhenjil'le mubilibwa bia Yerusalemu tawe.

¹³Ne keekhol'le khulwe tsimbi tsiabaroobibe, nende obubi bwabesaalisi baabe, abali nesikha siokhwira abandu abalunji.

¹⁴Abemeli babwe bahutuuma singa ababofu khunjila, nibataban'ne amatsahi aka abandu baranyala khubatilakhwo tawe.

¹⁵Abandu bahanzukha nibaboola, “Rule hano! Muli abomusilo! Murandilakhwo tawe!” Kho beelukha nibakwa abatimatiimi, abandu nibaboola mubetsimbia mbu sibanyala okhumenya hano khandi tawe.

¹⁶OMWAMI siyabukulakhwomwo obukono tawe; omwene yali okhubasalania. Kata siyamanyia esirenda khubesaalisi befwe nende abaroobi tawe.

¹⁷Khwahenjel'la mbula khulole obukhonyi, nebutswa obukhonyi sibwalolekha tawe. Khwatsilil'la okhulinda obukhonyi okhurula khwihanga lirali n'nabwo tawe.

¹⁸Abasuku bali nibakhuhengelesianga; sikhwali abanyala khuchenda khumihanda tawe. Amatukhu kefwe kali nikahweye; esihesi siefwe siali nisiol'le.

¹⁹Abakhulondel'langa belukhanga bwangu okhuyomba tsinditsu tsiomwikulu, bakhulonda mubikulu, nibakhwekonekhela musitsiimi.

²⁰Bali khufumila obuchiachilo bwobulamu bwefwe, mbu omuruchi wo MWAMI yeela, ye owakhwali khusubila khulwo khukhusoola, okhurula khubaseeri.

²¹Tsilil'le okhutsekha inywe abandu ba Edomu nende Usi; mube abasangalu olwamunyala. Likhupako lienywe litsanga khandi; inywe khandi namuhutume esiekenye mus'simba murwe.

²²Sayuni imal'le okhurunga tsimbi tsiayo; OMWAMI sinakhumenyie mubuhambe khulwo luhono tawe. Nebutswa ibe Edomu, OMWAMI nakhuhelesie esinyasio; nabisule obubi bubwo habulafu.