Read lunyore TSINDEKHUULU 5 Bible Online

TSINDEKHUULU 5 - lunyore bible

TSINDEKHUULU 5

¹E OMWAMI, wetsulile akene yako akakhukwiliye, khuhenge ma olole es'simba murwe siefwe.

²Obulaame bwefwe bukaluchisibwe abasuku, ne abarende bamenyanga mutsinyumba tsiefwe.

³Abapapa befwe bayirwa nabasuku, ne luno abamama befwe nabalekhwa.

⁴Khunyweetsanga amaatsi akakulwa amapesa; okhwola khukule tsikhwi tsiokhutekhela.

⁵Khwilusibwanga butinyu singa etsisikhile nohomba tsingamia; khuchonyele, nebutswa sikhuhuchil'lwanga okhuhuluukha tawe.

⁶Khwabareeba Abaamisiri nende Abasiria ebiakhulia bikhuhela khulwo khuba mwoyo.

⁷Abakuka befwe bakhola tsimbi, ne babulaho, nefwe khusalilanga khulwe tsimbi tsiabwe.

⁸Abasumba bakhuruka, abulaho owakhusoola okhurula mumakhono kabwe.

⁹Abeeri bachendachendanga musibala siosi, khuretsanga obulamu bwefwe musibi olwakhukhabanga esiokhulia.

¹⁰Inzala ichil'le omurengo kukhusambile okhwola olwe likhoba liyiye pa singa lichiko.

¹¹Abakhasi befwe bakholeywe bubi musikulu sia Sayuni, abakhaana nabomumataala ka Yuda.

¹²Abakhulundu bafumiywe ma basungilwe; abasakhulu befwe sibahebwanga oluyali tawe.

¹³Abasiani befwe ababuukha basetsanga khutsinjina, nabo abaana basiani bakwil'lananga netsikhwi tsibasitoheye.

¹⁴Abandu bakhulundu sibasikhala khuluyia tawe, ne ababuukha sibasikhupa obukhana tawe.

¹⁵Obusangali sibusili mubulamu bwefwe tawe; okhusina khwefwe khukwiye okhwekhuula.

¹⁶Olusimbi lukwiye okhurula khumurwe kwefwe, Woowe! Okhuba khwakhola tsimbi.

¹⁷Khulweyako emioyo chiefwe chitekhelan'ne, khulwa amang'ana yako tsimoni tsiefwe tsilimile.

¹⁸Khulwa esikulu sia Sayuni siasikala likunda khandi abandu bailukhamwo, ebibwe bionyene nibio ebichendangamwo.

¹⁹Nawe, OMWAMI, obeetsangaho omuruchi inziayo, olurubalwo lubeetsangaho inziayo.

²⁰Busina okhwibil'langa obusia nobusia, nokhulekha oluhono olurambi mbwo?

²¹Okhukalusie khu iwe E OMWAMI! Okhukalusie khu iwe! Okhukalusisie obukhongo bwefwe bwali bwakhale.

²²Nohomba wakhusul'la elala? Oburima bubwo bubulakhwo esihakamo noho?