Read lunyore ESEKIELI 10 Bible Online

ESEKIELI 10 - lunyore bible

ESEKIELI 10

¹Ndahenga nindola ikulu wesilama tsana esiali ikulu wemirwe chiamakerubi, esindu sialolekhaho esifwana oluruba olwalombwa okhurula khwichina liesafira.

²Ne Nyasaye nabool'la omundu owali niyebikhile tsingubo tsiekatani mbu, “Tsia hakari wamakurutumu akali hasi wamakerubi, ofumbare amanda komul'lo okhurula hakari wamakerubi namakhono kosi, ma okasalaanie khwitookho liosi.” Nase nindola natsitsanga.

³Ne olwomundu tsana yenjila, amakerubi kali nikasinjiye elubeka womukhono musaatsa enandete we Hekalu; ne lilumbesi lietsula m'mukitsi kwomukari.

⁴Ne obulafu obukhongo obumanyianga okhubaho khwo MWAMI niburula khumakerubi, nibutsia habwinjil'lo bwe Hekalu. Ehekalu yosi niyitsulamwo lilumbesi, ne omukitsi nikwitsula okhwakha khwobulafu bwo MWAMI.

⁵Amayoosi ketsimbaha tsiamakerubi nikahul'likhila mumuchitsi kwesioba, singa omwoyo kwa Nyasaye Wokhunyala Biosi.

⁶Ma olwa Nyasaye yalaka omundu owali niyebikhile tsingubo tsiekatani, mbu abukulekhwo omul'lo hakari wamakurutumu, akali hakari wamakerubi, yenjilamwo ma nasinjila ahembi nende likurudumu elala.

⁷Likerubi elala nilinyiila omukhono kwalio mumul'lo okwali nikuli hakari wamakerubi nilifumbarakhwo amanda ma nilikara mumakhono komundu owali niyebikhile tsingubo tsiekatani; naye nakabukula ma narulamwo.

⁸Ne ndalola esindu esifwana omukhono kwomundu isi wetsimbaha tsiabuli likerubi.

⁹Khandi ndahenga nindola amakurutumu kane ahembi nende amakerubi, mbu buli likurudumu elala halikerubi elala. Amakurutumu tsana kafwana singa amachina kobukusi.

¹⁰Ne amakurutumu kosi kane kali nokhufwana khulala. Buli likurudumu elala liafwana singa elili nelikurudumu lindi hakari walio.

¹¹Olwa katsia katsitsanga khulubeka lwosi lwosi sila okhusukhana. Kosi katsitsanga halala mumbeka mwosi omwa kachoomanga okhutsia sila okhusukhanakhwo tawe.

¹²Emibili chiako chiosi, nemikongo chiako, namakhono kachio, netsimbaha tsiako, namakurutumu tsana, bialikhwo tsimoni tsinyinji tsimbeka tsiosi.

¹³Ndahul'la omwoyo nikuboola sanganga amakurutumu yako mbu, “Amakurutumu kesihutsutsu.”

¹⁴Buli mulala khumakerubi yali nende obweni bune. Obweni bwokhuranga bwali singa obwechulukhi; obweni bwakhabili bwali singa bwomundu, obweni bwakhataru bwali singa obwesimba, ne obweni bwakhane bwali singa obweinditsu.

¹⁵Amakerubi nikapulukha. Nako niko ebili mwoyo tsana ebiandalola nindi hamuchela kwa Kebari.

¹⁶Olwa amakerubi yako katsia, amakurutumu nako katsia halala n'nako. Olwa amakerubi kachinguula tsimbaha okhupulukha okhurula khwiloba, amakurutumu sikasukhanakhwo tawe, nebutswa katsia butswa n'nako.

¹⁷Olwa kasinjila, amakurutumu nako nikasinjila; khandi olwa kapulukha, nako khandi nikapulukha halala n'nako, sichila amakerubi kali nobunyali khumakurudumu.

¹⁸Ma obulafu obukhongo obumanyianga okhubaho khwo MWAMI niburula ahabwali habwinjil'lo bwe Hekalu ma nibutsia okhuba ikulu wamakerubi.

¹⁹Ne amakerubi nikachinguula tsimbaha tsiako, nikapulukha nikarula khusibala nindolanga, ne amakurutumu katsia halala n'nako. Katsia nibasinjila hamuliango kwesilibwa siebukwe esie Hekalu yo MWAMI, ne obulafu obukhongo obumanyianga okhubaho khwa Nyasaye wa Isiraeli nibuba ikulu wako.

²⁰Yibio nibio ebili mwoyo tsana ebia ndalola hasi wa Nyasaye wa Isiraeli hamuchela kwa Kebari; ma nimanya mbu namakerubi.

²¹Buli elala liali nende obweni bune, nende tsimbaha tsine; ne esindu esifwana omukhono kwomundu siali hasi wetsimbaha tsiabuli likerubi.

²²Obweni bwako bwali singa obwandali nindutsi hamuchela kwa Kebari. Buli likerubi liatsia nilihengele imbeli bulunji.