Read lunyore ESEKIELI 11 Bible Online

ESEKIELI 11 - lunyore bible

ESEKIELI 11

¹Khandi omwoyo wa Nyasaye yanjinguula ikulu, niyambila hasilibwa esili ebukwe we Hekalu; ne hamuliangokwesilibwa tsana, abandu amakhumi kabili nabaraano baliho ne mubo balimwo Yaasania omusiani wa Asuru nende Pelatia omusiani wa Benaya, abali abemeli belihanga.

²Nyasaye niyambool'la mbu, “Omwana womundu, bano nibo abandu abaloosianga amang'ana amabi, khandi abahaananga amachetsiyio amabi mwitookho lino.

³Baboolanga mbu ‘Inyinga yokhwombokha tsinyumba esili okhwola; litookho lino lifwana eyamunyu, nefwe khuli singa inyama yene.’

⁴Khulweyako, ibe omwana womundu, rooba amang'ana kokhubafukula.”

⁵Ma omwoyo wo MWAMI niyanzitsila, ma OMWAMI niyambool'la mbu mbool'le abandu amang'ana kano; “Inywe abandu ba Isiraeli, ise ndamanya amang'ana akamuboolanga khandi akamuloosianga mumioyo chienywe.

⁶Mwayira abandu abenji mwitookho lino, ma kata mwayitsusia emilambo chiabafu mutsinjila tsialio.

⁷“Kho kano niko ake Ise OMWAMI Nyasaye mboola khwinywe, ‘Emilambo chie yabo aba mwer'ra hakari welitookho nibo inyama, ne litookho nalio nilio eyamunyu. Nebutswa inywe mulahinibwa hakari walio.

⁸Muriitsanga olukanga; ne nandeere abandu okhumuseera nolukanga.

⁹Namuhinie mwitookho ma namuhaane mumakhono kabasuku. Mal'le okhumukhalachila okhwira,

¹⁰ne namwir'rwe mwihe musibala sienywe abene. Nilwo olwa mwakhamanye mbu ise nise OMWAMI.

¹¹Litookho lino sililamusoola singa eyamunyu esinganga inyama elimwo tawe. Namuhelesie esinyasio hosi hosi aha mulaba nimuli musibala sia Isiraeli.

¹²Ma mwakhamanye mbu ise nise OMWAMI; ne olwa mwalinji nimulondanga amalako kamahanga akali ahembi n'nenywe, olwene yilwo mwali nimufunakanga amalako kanje ne nimusuula okhulonda amang'ana kanje.’ ”

¹³Ne olwa ndali niroobanga, Pelatia yaronya hasi nafwa. Kho nase ndakwa hasi mafung'ama, nikhupa etsikhwisi nomwoyo omukali, nimboola mbu, “E OMWAMI Nyasaye! Okhetsa okhwira Abaisiraeli abasikala yaba nohomba?”

¹⁴OMWAMI yambool'la mbu,

¹⁵“Omwana womundu, abandu bamenyanga mu Yerusalemu bal'lomanga khuibe nende khu Baisiraeli basio abali mukhwatisibwa. Baboolanga mbu ‘Abatisibwa sibanyala okhwekayakaya OMWAMI tawe sichila bali ehale okhurula khuye. OMWAMI wakhuhelesia esibala sino sibe esiefwe.’

¹⁶“Luno bool'la abatisibwa basio amang'ana ake ise mboolanga kano. Nise owabahila mubibala biehale khandi nimbasalania mumahanga kandi. Ne kata mbwo nambetsenje n'nabo mubibala biosi ebia batsiamwo.

¹⁷“Khulweyako, obabool'le ake Ise OMWAMI Nyasaye mboolanga. Nambabunjesia okhurula mutsimbia tsiabandu, nende okhurula mubibala omwa ndamusalania ne nambakalusisie esibala sia Isiraeli.

¹⁸Olwa nabetsemwo, nabahiniemwo emisilo chiosi nende ebisinyo biosi ebilimwo.

¹⁹Nase nambahelesie omwoyo omuyia, nimbaramwo amakani amayia. Nambinie omwoyo kwabwe omwomu okufwana lichina nimbahelesia omwoyo kwobuhulili.

²⁰Ma balalonda Amalako kanje nibahulila amang'ana kanje mubusubilwa. Bakhabe abandu banje, nase ndakhabe Nyasaye wabwe.

²¹Nebutswa yabo abekayakayanga ebiniini bies'sinyo ebirakwan'ne, nambahelesie esinyasio khulwebikhole biabwe.” Nimbwo OMWAMI Nyasaye aboolanga.

²²Ma amakerubi nikachinguula tsimbaha tsiako nikapulukha ne amakurutumu nako nikatsia n'nako. Obulafu obukhongo obumanyianga okhubaho khwa Nyasaye wa Isiraeli bwali ikulu wako.

²³Ne obulafu obukhongo yibwo niburula hakari welitookho nibutsia okhusinjila khusikulu esili ebukwe welitookho.

²⁴Ne mukhubisula yikhwo, omwoyo wa Nyasaye yanjinguula niyangalusia Babulonia, khuyabo abali mukhwatisibwa. Ma amabisulo yako aka ndali ninduutsi nikakhalisia,

²⁵nase ndali okhwinoosia abatisibwa tsana amang'ana kosi ako MWAMI yali niyamanyisie.