Read lunyore ESEKIELI 12 Bible Online

ESEKIELI 12 - lunyore bible

ESEKIELI 12

¹OMWAMI yal'loma n'nase.

²Yambool'la mbu, “Omwana womundu, omenyanga hakari wabandu beinduli. Bali netsimoni tsiokhulola nebutswa sibalolanga esindu tawe; bali namarwi kokhuhulila nebutswa sibahulilanga esindu tawe, sichila nabandu beinduli.

³“Khe, luno ibe omwana womundu, obohe omukanji singa owatisibwa mubuhambe ma watikhe m'basu nibalolanga. Watikhe okhurula hangoho otsie habundu undi nibalolanga. Haundi balamanyilisia mbu bo nabandu beinduli.

⁴Olahinia omukanjikwo kwomundu owatisibwa mubuhambe om'basu nikubalanga kho babe abanyala okhukhulola ma orule nibwil'le, nabo nibalolanga singa omundu otsitsanga mubwatisibwi.

⁵Ofutule lisisi nibareyekhwo imoni ma orul'le mumuluhu tsana nomukanji kukwo.

⁶Khandi ore omukanji khwibeka nibalolanga ma orule otsie musiilima niwefuunikhe m'moni, kho olekhe okhulola ahotsitsanga. Akawitsa okhukhola nakabe lichetsiyio khubandu ba Isiraeli.”

⁷Nase ndali okhukhola ako MWAMI yandaka okhukhola. Litukhu yilio ndaboha omukanji kwanje, singa omundu owatisibwa mubuhambe, ma khubwile isi nemwamanga, ndafutula lisisi namakhono kanje, ma nirul'la mwo. Ne olwabandu bosi bali nibalolanga ndali okhura omukanji kwanje khwibeka ma nirula ninzia.

⁸Ne omukamba okwalondakhwo OMWAMI yal'loma n'nase.

⁹Yaboola mbu, “Omwana womundu, luno olwa abandu ba Isiraeli, abali abeinduli, bareebanga esiokholanga,

¹⁰babool'le mbu kano niko ake ise MWAMI Nyasaye mboolanga. Amang'ana koburoobi amasiro kano kaboolwanga khumuruchi orukanga mu Yerusalemu, nende khubandu ba Isiraeli bosi abalimwo.

¹¹Babool'le mbu esiokhol'le yisi nesilolelo esie yako akanakekhole khubo; nabatsie mubwatisibwi singa abatimi khandi nababe mububohe.

¹²Ne omuruchi obarukanga alachinjila omukanjikwe khwibeka musiilima ma arul'le mumuluhu okwa baba nibamufutuliye mwisisi. Naye alefunikha m'moni mbu aralola ahatsitsanga tawe.

¹³Nebutswa nanzale olulubi lwanje ma namuhambilemwo. Ne ndakhamuhile mwitookho lia Babulonia ahalifwila nebutswa siyakhalilolekhwo tawe.

¹⁴Ne nasalanie nimbila mutsimbeka tsiosi yabo bosi mumukitsi kukwe, nende abachetsiyi baabe, nende abasikari abamulindanga ne abandu nababarune nibenyanga okhubeera.

¹⁵“Olwa nambasalanie mutsimbia tsindi nende mumahanga kebucheni nilwo olwa nabamanye mbu ise nise OMWAMI.

¹⁶Nebutswa nandekhe abandu batititi khubo bahonokokhe mwihe yilio, nende khunzala, nende khubulwaye kho nabamanye obwebikhole biabwe biabeyenje ebies'sinyo olwa bali mutsimbia yitsio. Ne balamanya mbu ise nise OMWAMI.”

¹⁷Khandi OMWAMI yal'loma n'nase.

¹⁸Yaboola mbu, “Omwana womundu, lia ebiokhuliabio notechelanga khandi onywe amaatsi kaako notechelanga.

¹⁹Obool'le abandu besibala mbu kano niko amang'ana ako MWAMI Nyasaye aboolanga khubandu ba Yerusalemu nende yabo abasimenyele musibala sia Isiraeli. Nabalitsenje ebiokhulia biabwe nibatechelanga ne nibanywa amaatsi kabwe nibali nende oburi obukali. Esibala siabwe nasisikale butswa esiele sila esindu siosi esibetsangamwo tawe, sichila abandu bosi abamenyangamwo sibalondanga amalako tawe.

²⁰Amatookho aketsulamwo abandu nakakhuywe, esibala siosi nasibe butswa esitsiimi. Nilwo olwa nabamanye mbu ise nise OMWAMI.”

²¹OMWAMI yal'loma n'nase.

²²Yaboola mbu, “Omwana womundu, nisina esichilanga Abaisiraeli nibaboola olukano luno ne nibakalukhilamwo mbu, ‘Tsinyinga tsimeetekhanga nitsitsia ne oburoobi bufubanga?’

²³Kho babool'le mbu kano niko ake ise OMWAMI Nyasaye mboolanga. Nare esiakamo khuluchelo yilwo. Ne sinabalurumikhilenge singa oluchelo khandi tawe. Nebutswa obabool'le mbu inyinga yool'le, ne oburoobi nabuhesikhe.

²⁴“Mubandu ba Isiraeli sinakhubemwo namabisulo kobubehi kata oburoobi bwokhubakaata khandi tawe.

²⁵Ise nise OMWAMI; ne nan'nome ne ling'ana elia namboole naliekholekhe. Sinalisisil'le khandi tawe. Mumatukhu kenywe, inywe abandu beinduli, nakhole kosi akandamubool'la nakhole.” Nimbwo OMWAMI Nyasaye aboolanga.

²⁶Khandi OMWAMI niyambool'la mbu,

²⁷“Omwana womundu, lola, abandu ba Isiraeli bapaalanga mbu amabisulo kaako nende oburoobi bubwo nobwamatukhu akasili ehale.

²⁸Kho obabool'le mbu kano niko ake ise OMWAMI Nyasaye mboolanga. Libulaho ling'ana liosi eliokhumang'ana kanje elia nalisisil'le khandi tawe. Ne aka ndaboola nakekholekhe. Ise OMWAMI Nyasaye mal'le okhuboola.”