Read lunyore ESEKIELI 13 Bible Online

ESEKIELI 13 - lunyore bible

ESEKIELI 13

¹OMWAMI yal'loma n'nase.

²Yaboola mbu, “Omwana womundu, l'loma nofukula abaroobi ba Isiraeli abelombelanga oburoobi bwabwe abene. Obabool'le bahulile ling'ana lio MWAMI.”

³Kano niko ako MWAMI Nyasaye aboolanga: “Woowe khubaroobi abahingwa ababoolanga akemioyo chiabwe, nibakulukunza amabisulo kabwe abene.

⁴Inywe Isiraeli abaroobi benywe bali singa ebibwe ebiranyala esindu ebimenyanga mumakunda.

⁵Sibalindanga habundu ahamasisi katikha olwande kata khandi sibombokhanga amasisi obuhia tawe. Kho khulwe yako Isiraeli sibanyala okhusoolwa olwo obulwani bubetsela khwitukhu lio MWAMI tawe.

⁶Amabisulo kabwe nakobubehi khandi oburoobi bwabwe nobwobubehi. Baboolanga mbu baribulanga amang'ana kanje ne ise sindabaruma tawe. Kata mbwo benyanga oburoobi bwabwe buhesikhe.

⁷Mbabool'langa mbu amabisulo akamulolanga nakabutswa ne oburoobi obwa muhaananga nobwobubehi. Muboolanga mbu OMWAMI aboolanga; ne simbetsanga nimbooyekhwo tawe!”

⁸Khulwe yako, OMWAMI Nyasaye aboolanga mbu: “Muboolanga amang'ana akabutswa, ne amabisulo kenywe nakobubehi. Ise mufukulanga.

⁹Ndi ahembi okhuhaana esinyasio khu inywe abaroobi abalolanga amabisulo kobubehi nibaboola oburoobi bwobubehi muliira lianje. Simulaba halala nabandu banje olwa bakhalaka omuse tawe; kata simulahandikwa mulwanzilo lwabebule ba Isiraeli tawe; kata simulachelela musibala sia Isiraeli tawe. Nilwo olwa mulamanya mbu ise nise OMWAMI Nyasaye.

¹⁰“Abaroobi basiamisie abandu banje nibaboola mbu omulembe kuliho ne omulembe nikubulaho! Abandu banje bali okhwombokha lisisi ne abaroobi nabo nibahomakhwo lilongo.

¹¹Kho bool'la abaroobi yabo mbu lisisi liabwe nalikwe. Nandeere ifula yemichel'la nende eyamachina amakali okhukwa khulio, ne omuyeka kweimbumbuyeka nakuliambule.

¹²Lola, olwe lisisi nalibe nilikwiye, abandu bosi nabamureebe mbu lilongo liamulihomelenje likhali nabukhonyi sina?”

¹³Khulwe yako kano niko ako OMWAMI Nyasaye aboolanga mbu, “Mwirima lianje namume lisisi nende omuyeka kweimbumbuyeka khandi nasundulekhwo ifula inyinji nende ifula eyamachina amakali.

¹⁴Nimbwo nandibul'le lisisi eliamwahomelekhwo lilongo, nindikoka hasi ne nindekha amachina komusinji okhuba esioba. Nalikwe ne nilimwira mwesi. Nilwo olwa abandu bosi balamanya mbu ise nise OMWAMI.

¹⁵“Nasundule oburima bwanje khwisisi tsana, nende khuyabo abali okhuhomakhwo lilongo. Nilwo olwa namubool'le mbu lisisi sililiho tawe, halala nende yabo abalihomakhwo lilongo —

¹⁶mbu abaroobi ba Isiraeli abasubisia Yerusalemu nibaboola omulembe kuliho, ne omulembe nikuraliho.” OMWAMI Nyasaye umal'le okhuboola.

¹⁷OMWAMI yambool'la mbu, “Omwana womundu, henga khubakhasi abali mubandu benywe abakulukunzanga oburoobi bwabwe abene. Obafukule,

¹⁸nobabool'la ako OMWAMI Nyasaye aboolanga khubo kano: “Woowe khubakhasi inywe! Munabanga etsiriisi khubandu bosi, nimulomba ebitambaya biokhumirwe chiabandu mbu balie ikholo yabandu bandi. Mwenyanga okhuba nobunyali khubulamu bwabandu banje, nende okhwenya okhwira abandi khulwo khwelombela eliira abene.

¹⁹Munder'ranga es'simba murwe mubandu banje khulwo khwenya okhunyoola eshayiri indititi nende ebitonye biomukaati bitititi. Mwiranga abandu abarakwan'ne okhufwa tawe, ne muhonianga abandu babe abalamu abarakwan'ne okhuba abalamu tawe. Kho muboolanga obubehi nimukaata abandu banje, nabo nibasubila amang'ana kenywe.”

²⁰Khulwe yako, kano niko ako MWAMI Nyasaye aboolanga: “Lola mbihil'lwanga etsiriisi chienywe echia murumikhilanga olwa mwenyanga okhuba nobunyali khubulamu bwabandu nende okhwira abandi. Nambarimbul'le mumakhono kenywe ma nakhole abandu aba mwali nimwalia ikholo okhuba abalakhuule.

²¹Ebitambaya bienywe nabio nambirandule ma nambinie abandu banje mumakhono kenywe, ne simulabalia ikholo khandi tawe. Nilwo olwa mulamanya mbu ise nise OMWAMI.

²²“Mwarimuye ikholo yabandu abalunji khulwo obubehi bwenywe, yabo abe ise renyanga okhubasalisia. Mwikal'langa abandi ababi mbu baralekha obubi bwabwe ma bahonie obulamu bwabwe tawe.

²³Kho luno simulaboola amang'ana kabutswa khandi tawe, kata simulahana oburoobi bwobubehi tawe. Nambinie abandu banje mumakhono kenywe; ma nenywe mulamanya mbu ise nise OMWAMI.”