Read lunyore ESEKIELI 14 Bible Online

ESEKIELI 14 - lunyore bible

ESEKIELI 14

¹Abalala khubemeli ba Isiraeli banzitsila, ma nibaareeba mbabool'le akobulalilo bwo MWAMI.

²Ma OMWAMI nal'loma n'nase.

³Yaboola mbu, “Omwana womundu, abandu bano benjisisie ebiniini ebiabenamilanga mumioyo chiabwe, khandi bahuchiliye ebiniini okhubenjisia mutsimbi. Kho bapaalanga mbu ndakhabakalusia noho?

⁴“Kho luno ol'lome n'nabo, nobabool'la mbu kano niko ake ise OMWAMI Nyasaye mboolanga: Buli mundu khubandu ba Isiraeli owenjisiakhwo ebiniini mumwoyokwe na nabihuchil'la okhumura mutsimbi, ne nakalukha okhureeba omuroobi obulalilo bwo MWAMI, nanyoole likalusio okhurula khu ise — likalusio eliebiniini bibie ebinji bikhoyanga okhunyoola.

⁵Ebiniini ebinji yibio biasukhania abandu ba Isiraeli abenji okhurula khu ise nebutswa khulwe likalusio lianje, subile mbu nabakalukhe okhundekayakaya mubusubilwa.

⁶“Kho luno, bool'la Abaisiraeli mbu, kano niko ake ise OMWAMI Nyasaye mboolanga: mwekalukhanie ma mulekhane nende ebiniini bienywe ebies'sinyo.

⁷“Buli lwosi olwo Muisiraeli wosi nohomba omucheni owamenya mu Isiraeli wosi, yakhupanga omukongo natsia okhwekayakaya ebiniini, ma khandi atsia khumuroobi okhumureeba akobulalilo bwanje, ise OMWAMI namukalusie omwene.

⁸Ne narekhwo omwoyo okhufukula omundu uyo, nimukhola abe esilolelo khubandi. Namuhinie mumukanda kwabandu banje; kho namumanye mbu ise nise OMWAMI.

⁹“Ne omuroobi naba nakaatwa ma naboola likalusio liobubehi, nise OMWAMI oba nimukaat'te omuroobi uyo. Ne nanyiile omukhono kwanje khuye, nimuhinia mumukanda kwabandu ba Isiraeli.

¹⁰Ne esinyasio siobubi bwabwe silaba khubo, esinyasio siomuroobi nasio silafwanana nende esinyasio esie uyo omureebakhwo ling'ana.

¹¹“Nakhole yako kho nanzikal'le Abaisiraeli balekhe okhurulakhwo nende okhwefwabia khulwe tsimbi tsiabwe abene. Okhwola babetsenje abandu banje, nase nimba Nyasaye wabwe.” OMWAMI Nyasaye umal'le okhuboola.

¹²OMWAMI yal'loma n'nase.

¹³Yaboola mbu, “Omwana womundu, lihanga nalebe niliba nilikhola tsimbi imbeli wanje khandi niliba sila obusubilwa khu ise, nanyiile omukhono kwanje khulio ma nanyononie habundu habandu baba nibanyool'langa ebiokhulia. Narume inzala khulio, nende okhwira abandu nende ebiayo.

¹⁴Kata nikakhabeye mbu abandu bataru bano mbu Noa, Daneli nende Ayubu, bakhabeye nibamenyangamwo, bakhahonia butswa obulamu bwabwe bwonyene khulwo obulunji bwabwe.” OMWAMI Nyasaye aboolanga.

¹⁵“Nohomba nyala okhuruma tsinyama nabulimo mwihanga okhwira abandu, ne natsichile esibala nasibe esiokhurisia mbu omundu wosi abule okhubir'ramwo.

¹⁶Ne kata abandu bataru yaba nibakhabeeyemwo, ndesuhanga muliira lianje ise OMWAMI Nyasaye oli mwoyo mbu, sibakhahonisiekhwo abaana babwe abasiani kata abakhaana tawe; bakhehonia butswa abene bonyene, ne lihanga liakhasikala sila omundu.

¹⁷“Nohomba nyala okhuleera lihe khwihanga tsana niruma ebilasan'nwe ebiochi okhwira abandu nende ebiayo ebili mulio,

¹⁸ne kata abandu bataru yabo mbakhabeyemwo, ndesuhanga muliira lianje ise OMWAMI Nyasaye oli mwoyo mbu, sibakhahonisiekhwo abaana babwe abasiani kata abakhaana tawe; bakhehonisie butswa abene bonyene.”

¹⁹“Nohomba nyala okhuruma olumbe khwihanga, ma khulwe lirima lianje lumulule abandu abenji nende ebiayo,

²⁰ne kata Noa, Danieli nende Ayubu mbakhabeyemwo, ndesuhanga muliira lianje ise OMWAMI Nyasaye oli mwoyo, sibakhahonisiekhwo abaana babwe abasiani kata abakhaana tawe; bakhahonia butswa obulamu bwabwe bwonyene khulwo obulunji bwabwe.”

²¹Kano niko ako MWAMI Nyasaye aboolanga: “Naarume amakhupako kanje amakali kane khu Yerusalemu mbu lihe, inzala, tsinyama nabulimo, nende olumbe, ne nakamulule abandu halala nende ebiayo.

²²Nebutswa omundu wosi naba nasikalakhwo ma ahonokosie abaana baabe abasiani nende abakhaana mumuhenge olwa aba niyetsa aha muli. Mulole obwe tsinjila tsiabwe nende ebikholwa biabwe bili eb'bibibi ma namutoole okhumanya mbu ebinyasio ebianderanga khu Yerusalemu, nebiakololi.

²³Ma nilwo olwa namumanye mbu ndali nesifune esilahi okhukhola yaka kosi.” OMWAMI Nyasaye umal'le okhuboola.