Read lunyore ESEKIELI 16 Bible Online

ESEKIELI 16 - lunyore bible

ESEKIELI 16

²Yaboola mbu, “Omwana womundu, manyia abandu ba Yerusalemu ebisinyo biabwe singa obwabili.

³Obabool'le mbu kano niko ako MWAMI Nyasaye abool'langa Yerusalemu mbu, “Webul'lwa musibala sia Kanaani. Papawo yali Omuamori, ne mamawo yali Omuhiti.

⁴Ne khwitukhu elia webul'lwakhwo siwakhalakwa ol'lela kata okhusaabwa mumaatsi mbu olabe kata okhusabilwabwakhwo echumbi nohomba okhufumbilwa mutsingubo tawe.

⁵Siyaliho omundu wosi owakhubelel'la mbu akhukhol'le amang'ana yako kosi tawe. Olwa webulwa abulaho owakhuyanza kata mulala. Wali okhufuubwa esioba musikuuri.

⁶“Ne nilwo olwa ndabir'ra ahawali ma nindola nokalakalanga mumatsahi kaako omwene. Amatsahi, kali nikakhufuunikhile nebutswa sindakhulekha ofwe tawe.

⁷Ndakhukhusia singa omumela kwom'mukunda. Wakhula norambiha, nokufuhala mutsingufu ma nofwana omukhaana. Tsimbeele tsitsio tsiakaliha, khandi liswilio nilirambiya. Nebutswa wali nosili butswa esihekenye.

⁸“Khandi olwa ndabir'ra ahawali nooli ndalola mbu wali nohel'le omukhaana wokhuyanzwa. Ndafuunikha esihechenye sisio nelikoti lianje ma nikhusubisia mbu nakhuyanze. Ndalomba indakano yokhutesania n'nawe ma noba owanje.” Yaka niko ako MWAMI Nyasaye aboolanga.

⁹“Ma ndamala nimbukula amaatsi nikhusinga okhukhuhiniakhwo amatsahi akali nikali khuibe. Ndamala nikhubakha amafura.

¹⁰Khandi ndakhubiikha tsingubo etsianabwakhwo amahwa nende ebilaaro bieliseelo lilahi mubilenje bibio, khandi nikhuboha esitambaya siekatani indahi khumurwekwo ma nikhufuunikhakhwo likabuti liekatani indorotoro.

¹¹Ndakhusiaha ebimili, nira emikasa khumakhono kaako nende esiyuma mwikosi.

¹²Ndara ingaka mumoolu kaako nende tsingaka etsiokhubirwi, nolusimbi olung'wonekhu khumurwe kukwo.

¹³Kho nilwo olwa wasiahwakhwo nende etsahabu nefetsa ma niwebiikha tsingubo tsiekatani indorotoro nende etsianabwakhwo amahwa. Waliitsanga omukaati okutekhelwe okhurula khubusie obunyukhe nobuukhi nende amafura. Wali owelikondo lilahi okhusila ma nofwana omukhaye womuruchi.

¹⁴Kata oluyali lulwo lwalanda mutsimbia khulwe likondo lilio, okhuba liali lilahi po sichila nise owakhukhola okhuba nelikondo liokhuyanzisia.” Kano niko ako MWAMI Nyasaye aboolanga.

¹⁵“Nebutswa wekhoyela likondolio, nokhola obutamba khulwoluyalilwo, noheya nende buli mundu wosi owabiranga aha wali.

¹⁶Wabukula tsindala khutsingubo tsitsio nosiahakhwo habundu hokhwekayakayila ma niwehaana khumundu wosi singa litamba.

¹⁷Wabukula ebimili bietsahabu nende efetsa ebia ndali nikhuheye, nobilombakhwo ebifwanani biabasaatsa, ma noheya n'nabio.

¹⁸Wabukula tsingubo etsianabwakhwo amahwa, etsia ndakhuhelesia notsifuunikha khubifwanani tsana ma nohaana emisango chiamafura komuseituni nende obwali obwa ndali nikhuheye.

¹⁹Ndakhuhelesia esiokhulia sianje, nobusie obulahi po nende amafura komuseituni nobuukhi. Nebutswa wabihaana singa omusango khubiniini mbu bikhubeele esirenda.” Kano niko ako MWAMI Nyasaye aboolanga.

²⁰“Khandi wabukula abaanabo abasiani nabakhaana aba wanzibul'la, nobahaana singa omusango khubiniini. Mbula okhubula okhuba nobusubilwa khukhwo sikhwali okhubi okhusila?

²¹Nebutswa okhumeetakhwo, wabukula abaana banje nobahaana singa omusango khubiniini.

²²Ne mubisinyobio biosi nende mubutambabwo bwosi siwayitsul'la amatukhu kobwanabwo, olwa wali noli butswa esihekenye, nokalakalanga mumatsahiko tawe.”

²³OMWAMI Nyasaye yaboola mbu, “Olitsiboolelwa! Olitsiboolelwa ibe! Wakhola obubi yibwo bwosi ma

²⁴niwombokha habundu hokhwekayakayila ebiniini khutsinjila tsiosi ma nokhola obutamba.

²⁵Wabisisia likondolio lilahi mubutohi. Wehaana khubabiri bokhunjila ma nokhola obutamba sielitukhu.

²⁶Khandi waheyanga nende abarendebo abekombi okhurula Emisiri ma khulwo obutambabwo, wanjema oburima.

²⁷“Khulwe yako, lola, ndi ahembi okhukhuhelesia esinyasio nokhukhuhiniakhwo omukabwakwo okwetsikhabi. Mal'le okhukhuhaana khu Bafilisiti abali abasukubo khandi ababihil'lwanga ifwoyo eyesifwabwi.

²⁸“Khandi wakhola obulina nende Abasiria sichila abandi sibakhuhela tawe. Wakhola obutamba n'nabo nebutswa siwanyalikha tawe.

²⁹Khandi wali omutamba khu Babulonia, abelihanga liobukhala; nebutswa sibakhuhela tawe.”

³⁰OMWAMI Nyasaye aboolanga mbu: “Mako obwomwoyo kukwo kwitsuyemwo tsimbi olwa okholanga yako kosi singa omutamba obula tsisoni.

³¹Wombokha habundu hokhwekayakayila emisambwa nende ahokhukhol'la obutamba mumihanda chiosi buli habundu. Nebutswa siwali singa omutamba tawe, sichila wasuulanga emirungo.

³²Ibe oli singa omukhasi omuheyi, owinjisianga abacheni musilenje siokhuyanza omusaatsawe.

³³Abandu barunganga abatamba amapesa, nebutswa ibe wahelesia bosi ebihanwabio, nobahelesia ebihetso mbu betse khuibe okhurula tsimbeka tsiosi okhukona n'nawe.

³⁴Kho ibe oli omutamba wokhuhuka owabukhan'ne nabatamba bandi mubutambabwo. Abulaho owakhuhachia okhuheya n'naye. Khandi sorungwanga omurungo tawe, nebutswa niwe obarunganga. Kho wabukhan'ne nabatamba bandi.”

³⁵Khulwe yako, omutamba olangwanga Yerusalemu ibe, hulila ling'ana lio MWAMI.

³⁶Kano niko ako MWAMI Nyasaye aboolanga: “Wabakala es'simba murwesio esioba niwenabula esihekenyesio ma niwehaana singa omusambale okhukhola obuheyi nabasaatsa abayanzibo. Khandi wehaana khubifwanani biabanyasaye ebili ebies'simba murwe ma niwira abaanabo singa omusango khubifwanani tsana.

³⁷Khulwe yako nambunjelesie halala abayanzibo bosi, yabo bosi aba wayanzanga nende yabo aba wasuulanga. Nambalere okhukhufumbila halala singa ingara ma nafuunule esihekenyesio imbeli wabwe, mbu bosi basilole.

³⁸Ne nakhukhalachile khulwobusambale bubwo nende obwiribwo ne nakhuhe esinyasio siokhukhwira. Nakhuhaane mwirima lianje nende obululu bwanje.

³⁹Nakhuhaane mumakhono kabwe, nabo nabakwisie habundu hokhol'langa obusambale niwekayakayilaho ebifwanani biabanyasaye bandi. Nabakhunaabule tsingubotsio nebimili ebilahi, ma nabakhulekhe noli butswa esihekenye.

⁴⁰“Nabacheme omukanda lirima okhukhulasa amachina, nende okhukhutonyania netsinganga tsiabwe mubitonye.

⁴¹Balasamba tsinyumbatsio nibakhuha esinyasio imbeli wabakhasi abenji. Nanzikal'le obutambabwo, khandi sinotsilil'le okhuha abayanzibo ebihanwa tawe.

⁴²Nilwo olwe lirima lianje khuibe nalihwe ma nase nambutsulukhe. Sinanzilil'le okhuba nelirima nende imbalikha khandi tawe.

⁴³Siwitsul'langa akandakhukhol'la nosili omwana muti tawe, ne unjemanga lirima mumang'ana kosi akookholanga. Niko akachil'le nikhukhola okarunge kosi. Nisina esichil'le nomeeta obusambale khubisinyobio biosi?” OMWAMI Nyasaye umal'le okhuboola.

⁴⁴OMWAMI Nyasaye aboolanga mbu, “Buli mundu orumikhila tsinjelo alarumikhila oluchelo luno khuibe mbu, ‘Omwana weinzokha neinzokha.’

⁴⁵Ibe oli omukhaana wamamawo tooto, owomusaatsawe nabaanabe bamusinya; khandi oli singa abakhaana benywe, ababasaatsa babwe nabaana babwe babasinya. Mamawo yali Omuhiti, ne papawo yali Omuamori.

⁴⁶Omukhaana wenywe omukhulundu niye Samaria, owamenya elubeka lwesinyolu halala nabaanabe abakhaana. Omukhaana wenywe omutu, owamenyanga enandete niye Sodoma, halala nabaanabe abakhaana.

⁴⁷Ne siwalonda butswa ebikhole, nohomba okhukhola akebisinyo biabwe tawe; nebutswa olunyuma wali omubi okhubayomba munjilatsio tsiosi.

⁴⁸“Ise uno tooto, singa obwandi Nyasaye oli mwoyo; omukhaana wenywe Sodoma nabakhaanabe sibaakholakhwo amabi ake ibe wakhol'le, halala namataalako tawe.

⁴⁹Ye halala nabakhaanabe bali nesunga khulwebiokhulia ebia bali n'nabio ebinji ma nibamenya mumulembe nende mubwale, nebutswa sibakhonya ababisandu nende abatakha tawe.

⁵⁰Bali abesunga, khandi abesikala marwi ma nibakhola es'sinyo imbeli wanje. Niko akachila nimbamuma singa omanyile bulahi.

⁵¹“Ne kata Samaria siyakhola kata enusu yetsimbitsio tsiosi tawe. Ibe wainjiyia ebisinyobio okhuyomba Samaria. Obubatsabwo buchilanga abakhaana benywe nibalolekha okhuba abalunji okhuyomba ibe.

⁵²Nawe wetukhe es'simba murwesio omwene. Tsimbitsio netsingali okhusila okhuyomba etsiabakhaana benywe ma khulwako, bo balolekhanga abalunji okhuyomba ibe. Nisio esichila luno wetukhe es'simba murwe sisio omwene, sichila niwe ochil'le abakhaana benywe nibalolekha singa abalunji.”

⁵³OMWAMI abool'langa Yerusalemu mbu, “Nangalusie tsikhabi tsiabwe, mbu tsikhabi tsia Sodoma namataala kalio, netsikhabi tsia Samaria nabakhaanabe. Kata khandi nawe nakhukalusisie tsikhabi tsitsio.

⁵⁴Nawesimbie omurwe omwene ne tsisoni tsitsio natsichile abakhaana benywe nabalola obwa bali obulahi okhukhuyomba.

⁵⁵Nabanyoole tsikhabi tsiabwe, etsiokhuranga, kata nawe omwene nende abakhaanabo namunyoola tsikhabi tsienywe.

⁵⁶Siwakhol'langa Sodoma tsisambo mumatukhu akawali nesunga,

⁵⁷olwo obubibwo bwali nibusili okhumanyikha? Luno ibe oli singa ye — oli linyeko khumataala ka Edomu nende aka Filisiti khandi khubarende baabo bosi abakhuchiayanga ibe.

⁵⁸Okhwola onyoole esinyasio khulwamang'anako amabi nende ebisinyobio.” Nimbwo OMWAMI aboolanga.

⁵⁹Kano niko ako MWAMI Nyasaye aboolanga; “Nakhukhol'le okhuhelana nebikholebio, sichila wachaaya ebiesuhobio ne nofunaka Indakano.

⁶⁰Nebutswa nanzitsul'le indakano eya ndalomba n'nawe mumatukhu kobwanabwo, ne nanombe indakano n'nawe eyakhahindile inziayo.

⁶¹Nawe nawitsul'le ebikholebio, ma nosimba omurwe olwa nakhukalusisie omukhaana wenywe omukhulundu nende omutu. Nambakhole okhuba singa abakhaana baabo, kata olwa karali mbwo mundakano yanje.

⁶²Nanzienule indakano yanje n'nawe, ma nomanye mbu ise nise OMWAMI.

⁶³Nakhubeela khumabi kosi akawakhola, nebutswa ibe noketsul'le nosimba omurwe, norachinga omunwakwo khandi tawe.” Nimbwo OMWAMI Nyasaye aboolanga.