Read lunyore ESEKIELI 17 Bible Online

ESEKIELI 17 - lunyore bible

ESEKIELI 17

¹OMWAMI yal'loma n'nase.

²Yaboola mbu, “Omwana womundu, bool'la Abaisiraeli olukano yilu

³ma olekhe bamanye ake ise OMWAMI Nyasaye mbabool'langa. Inditsu ingali okhusila eyali netsimbaha tsingali nemiilo emirambi, eyelikondo lilahi, yeetsa khubikulu Lebanoni ma nekhalaka esirwe siomusaala kwomusiita.

⁴Yanokakhwo olusaka l'lala olwali hekulu, neluhila musibala siobukhala, nelusimikha mwitookho liabakhala.

⁵Khandi yabukula imwo yomusibala yisio nechisimikha mwiloba linolu, ahamaatsi kali amenji akokhuchikhusia.

⁶Ne yamela, ma neba omusaala kwewaini omwimbichiti. Tsisaka tsiakwo tsiakhula nitsihengele ikulu aheinditsu tsana yali, ne emisi chiakwo nichiesimikha hasi m'maloba. Omusaala yikwo kwalikhwo etsisaka tsinyinji nende amasaafu amenji.

⁷“Khandi yaliyo inditsu yindi ingali, eyali netsimbaha tsingali namabaha amenji. Ne luno omusaala kwewaini tsana kwayila emisi chiakwo okhuhenga khunditsu iyo khandi kwabambula tsisaka tsiakwo okhuhengia khuyo khulwo okhunyoola amaatsi amenji okhurula khunditsu iyo.

⁸Nebutswa omusaala kwewaini yikwo kwali nikwasimikhwa mwiloba linolu kho kube okunyala okhusebulakwo tsisaka nende okhwamakhwo amatunde ma kube omusaala omulahi.

⁹“Kho kano niko ake ise OMWAMI Nyasaye reebanga. Mbula omusaala yikwo nakube nobulamu nikukhula noho? Inditsu yokhuranga sinekwihe nemisi chiakwo, nehalula ebiamo biakwo, nefunaka etsisaka tsiakwo tsiosi netsilekha nitsinial'le? Sikwakheenya tsingufu tsinyinji okhusila nohomba lihanga lietsingufu khulwokhukwiha tawe.

¹⁰Ne lola, nikusimulwa ma nikusimikhwa khandi, mbula kwakhaba omulamu ma nikukhula noho? Sikwakhanial'la elala nyinga omuyeka okusambanga okhurula ebukwe kwakhakutilakhwo? Siikwakhanial'la mumukunda omwa kwamel'la?”

¹¹OMWAMI yambool'la mbu,

¹²“Luno reeba abandu beinduli yaba nibaba nibamanyile esifune siolukano yilu. Obabool'le mbu, omuruchi wa Babulonia yetsa Yerusalemu, ma nafumila omuruchi walio nende abemeli balio bosi natsia n'nabo Babulonia.

¹³Yabukula mulala khubomunyumba yomuruchi ma nalomba n'naye Indakano ma namutsuuba okhwesuha okhuba omusubilwa khuye. Ne yali nabukuye abandu abakhongo musibala nabahila mubuhambe,

¹⁴khulwokhwikala lihanga libule okhuba netsingufu, khandi khulwokhulola mbu indakanoye etsilil'langa okhulindwa.

¹⁵Nebutswa omuruchi wa Yuda yamukhol'la indiri, khulwokhuruma abarumwabe Emisiri mbu bamukhonye netsisululi nende abasikari abenji. Mbula alanyoola amalahi noho? Oukhola akafwana mbwo yakhehonia omwene noho? Siyakhafunaka indakano ma yehonie tawe.

¹⁶“Siahene singa ndi Nyasaye oli mwoyo ndesuhanga mbu omuruchi uyu yakhafwile Babulonia sichila wafunaka esiesuhosie indakano eya yalomba nende omuruchi wa Babulonia owamura khubwami.

¹⁷Kata abasikari abalulu abomuruchi we Misiri sinabanyale okhumukhonya okhulwana olwa Babulonia nababe nibombokhele ebifuumi biokhufumbila litookho nende okhuyaba emitalo khulwokhwira abandu abenji tawe.

¹⁸Sichila yachaaya esiesuho khandi nafunaka indakano eyomwene yahuchil'la, sinahonokokhe tawe.”

¹⁹Khulwe yako, kano niko aka OMWAMI Nyasaye aboolanga; mbu, “Ise uno! Siahene singa ise ndi Nyasaye olimwoyo, namuhe esinyasio khulwokhuchaaya esiesuho sianje, nende indakano yanje eya yafunachile eyomwene yasangakhwo.

²⁰Ne namambule likoko liomuhitsi ma namutiil'lemwo. Namuhile Babulonia ma namuhelesie esinyasio khulwokhubula okhuba omusubilwa khu ise.

²¹Abasikaribe abalulu nebeer'rwe mwihe; ne abanababe nibasikaye nabasalanibwe okhutsia mutsimbeka tsiosi. Nilwo olwa nabamanye mbu ise OMWAMI mal'le okhuboola.”

²²Kano niko aka OMWAMI Nyasaye aboolanga: “Ise omwene nambukule olusaka oluli khumurwe kwomusiita omurambi, ma nanoke akhasaka akhatoro akhokhutsinyel'le etsili hekulu, nikhasimikha khubutenje bwesikulu esirambi.

²³Khubutenje bwesikulu sia Isiraeli niho ahanamusimikhe. Nakwo nakuhinie tsisaka nikwama ebiamo, nikuba omusiita omulahi. Kata amanyonyi ketsimbila tsiosi nakamenyenjemwo, nikebisa musiinikha sietsisaka tsiakwo.

²⁴Ne emisaala chiosi echiomubulimo nachimanye mbu ise nise OMWAMI! Nachimanye mbu nise oremakanga emisaala emirambi, ne nirambiyia emisaala emimbichiti. Nyomianga emisaala emibisi, ne nindendeemia emisaala emiomu; Ise OMWAMI mal'le okhuboola. Ne nakhole akambooye mbu nakhole.”