Read lunyore ESEKIELI 18 Bible Online

ESEKIELI 18 - lunyore bible

ESEKIELI 18

¹OMWAMI yal'loma n'nase.

²Yaboola mbu, “Esifune esichilanga Abaisiraeli nibakalukhila muluchelo oluboolanga mbu, ‘Abebuli balia emisabibu emilulu, ne abahul'la obululu bwatsio, nabaana nisina?’ ”

³OMWAMI Nyasaye aboolanga mbu, “Siahene singa ise ndi OMWAMI Nyasaye oli mwoyo, ndesuuhanga mbu sinamukalukhilekhwo okhuboola oluchelo luno Muisiraeli tawe.

⁴Obulamu bwabandu bosi nobwanje, obulamu bwomwibuli, nende obwomwana bwosi nobwanje. Omundu okholanga tsimbi, niye owakhafwe.

⁵“Omundu anyala okhuba nomulahi, omulunji khandi nomusubilwa.

⁶Anyala okhuba naralitsangakhwo emisango echihanwanga khubiniini nohomba kata okhwekayakayakhwo ebiniini bia Baisiraeli. Anyala okhuba naraheyangakhwo nomukhasi wowasie nohomba okhukona nomukhasi otsiye mumwesi.

⁷Anyala okhuba naranuulangakhwo omundu wosi esindu nohomba okhumukaata tawe. Nebutswa akalusisianga owelikobi esihambil'losie nakabul'la abatakha ebiokhulia nende okhubiikha abali esihekenye tsingubo.

⁸Uyo orakopianga khulwokhwenya okhunyoola injelesio tawe. Asuulanga okhukhola amabi nebutswa ahaananga obukhalachi bwatooto hakari womundu nende owasie.

⁹Omundu singa uyo alondanga amalako nafumila amebaalo akobukhalachi bwanje. Ye nomulunji ne siahene omwene uyo alamenya.”

¹⁰“Haundi omundu mwene uyo yebule omwana omwiri, khandi omunuuli okholanga amang'ana yako kosi,

¹¹aka samwana arakholakhwo. Anyala okhuba mbu nalitsanga ebiokhulia ebiahanwa singa emisango khubikulu nakona nabakhasi babasie.

¹²Anyala okhuba nakaatanga ababisandu, nanuula abasie, ne nahanda khusihambil'lo siomundu welikobi. Haundi yekayakayanga ebiniini bies'sinyo khubikulu,

¹³nakopia khulwokhuyoola injelesio. Mbula ofwana mbwo yakhamenye noho? Tawe siyakhamenye tawe. Wamala okhukoola ebindu biosi ebies'sinyo kho alafwa, siahene alatulwa omwene khulwokhufwa khukhwe.

¹⁴“Luno khuboole mbu omundu uyo ali nomusiani. Omusiani tsana yalola tsimbi tsiosi tsiasamwana yakholanga, nebutswa siyalonda amang'ana kene yako tawe.

¹⁵Siyekayakayanga ebiniini bia Baisiraeli nohomba kata sialitsanga emisango echiahanwa khutsisambwa tsiomusilo tawe. Khandi sakonanga nomukhasi wowasie

¹⁶nohomba okhulilil'la omundu wosi kata okhunuula omundu wosi tawe. Akabusianga esio owelikobi yahaana khuye singa esihambil'lo. Akabul'langa oweinzala ebiokhulia nabiikha oli esihekenye tsingubo.

¹⁷Siyenyanga okhukhola obubi khandi sakopianga khulwokhunyoola inganga tawe. Afumilanga amalako kanje nakalonda, siyakhafwe khulwa tsimbi tsia samwana tawe, nebutswa alamenya.

¹⁸Samwana, yakholanga obubi khubandu bosi khulwe yako yafwa khulwe tsimbi tsiomwene yakhola.

¹⁹“Nebutswa olareeba mbu, ‘Busina omwana arasaalila khulwe tsimbi tsia samwana?’ Likalusio lili mbu omwana yakhola akali amalunji khandi amalahi. Yalonda amalako kanje nakafumila butinyu, ma khulwako alamenya.

²⁰Omundu okholanga tsimbi niye owanofwe. Omwana sialasaalila khulwe tsimbi tsia samwana tawe, kata samwana sialasaalila khulwe tsimbi tsiomwanawe tawe. Omundu omulahi yakharungwe khulwobukholi obulahi ne omundu omubi yakhasaalile khulwobubi bwakholanga.

²¹“Omundu omubi naba nalekha okhukhola tsimbi ne nalinda amalako kanje, ma nakhola akali amalunji nende amalahi, siyakhafwe tawe; siahene alamenya.

²²Kata ndala khutsimbi tsiayakhola siyakhetsul'lwekhwo tawe. Ne khulwe ebindu ebilunji ebiayakhola yakhamenye.”

²³OMWAMI Nyasaye areebanga mbu, ibe opaalanga sangal'langa okhufwa khwomundu omubi noho? Tawe, ndakhekombele okhumulola niyekalukhanisie ma amenye.

²⁴“Nebutswa omundu omulunji naba nalekha okhukhola obulahi ma nachaaka okhukhola obubi bwosi obwes'sinyo obwabandu ababi bakholanga, mbula yakhatsilil'la okhumenya noho? Tawe! Kata elala khumalahi kayakhola silinyala okhwitsulilwakhwo tawe. Yakhafwe khulwokhubula okhuba omusubilwa khandi khulwe tsimbitsie.

²⁵“Nebutswa muboolanga mbu, ‘Ako MWAMI akholanga sikali akahabwene tawe’ Mumbuyie, inywe Abaisiraeli. Mupaalanga injila yakhol'langamwo ebindu sieli inunji tawe? Injila yenywe niyo erali inunji.

²⁶Olwomundu omulunji alekhanga okhukhola amalahi ma achiaka okhukhola obubi ma olunyuma afwe, afwitsanga khulwobubi obwa yakhola.

²⁷Olwomundu omubi alekhanga okhukhola tsimbi nakhola amalunji khandi amalahi, ahonianga obulamubwe.

²⁸Amanyilisianga akakholanga ma alekha okhukhola tsimbi, kho siahene sinafwe tawe, nebutswa alatsilil'la okhumenya.

²⁹Ne inywe Abaisiraeli muboolanga mbu, ‘Ake ise MWAMI Nyasaye akholanga sikali amalunji tawe!’ Siahene tooto mupaalanga mbu injila yanje sieli inunji tawe? Injila yenywe niyo erali inunji.

³⁰“Khulweyako ise OMWAMI Nyasaye mubool'langa inywe Abaisiraeli mbu nakhalachile siomundu okhuhelana nebikholebie. Mwekalukhanie murule mutsimbi, khase obubi bwakhamuchemela.

³¹Mulekhe okhukhola tsimbi tsiosi etsiamwakhol'lenje ma mube abayia mumakani nende mumioyo! Esichilanga inywe Abaisiraeli nimwenya mufwe nisina?

³²Ise sindekombangakhwo omundu wosi afwe tawe. Rule mutsimbi tsienywe ma mumenye.” Nimbwo OMWAMI Nyasaye aboolanga.