Read lunyore ESEKIELI 19 Bible Online

ESEKIELI 19 - lunyore bible

ESEKIELI 19

¹Nyasaye yambool'la nyembele abaruchi babili ba Isiraeli olwembo lwesibeela yilu:

²Mako obwa mama wenywe yalinji esimba ikhasi mutsimbia! Yakhusisia abaanabe mutsisimba tsisaatsa tsindulu.

³Yakhusia mulala khubaanabe khandi namwekia okhuhiima. Yamala nakwa owokhulia abandu.

⁴Abetsimbia bahulila oluyalilwe ma nibamutiil'la mubuko. Bamukhwesa netsingaka okhumuhila Emisiri.

⁵Yalindil'la okhwola olwa yahiniakhwo omwoyo. Kho yamala nakhusia omwana oundi, yamukhusia okhuba esimba indulu.

⁶Olwa yali nakhul'le ma nakalihile, yachaaka okhuchenda nende etsisimba tsindi. Naye khandi yeeka okhuhiima ma yamala nachaaka okhulia abandu.

⁷Yafunaka tsimbinga, nende okhwononia amatookho kabwe. Abandu bomusibala bali okhuria buli lwosi olwa yahuumanga.

⁸Abetsimbia bebunjikha khulwo okhuchilwana; abandu betsa okhurula habundu hosi. Babambula amakoko kabwe ma nibachihamba mumubero kwabwe.

⁹Bachira musikuuli, ma nibamuhila khumuruchi wa Babulonia. Bamulinda butinyu kho okhuhuumakhwe khurahul'likha khubikulu bia Isiraeli khandi tawe.

¹⁰Mama uwo yali singa omusaala kwomusabibu okwarakwa hamuchela. Kwali okhunera ma nikwama ebiamo, sichila kwanyoola amaatsi amenji.

¹¹Tsisaka tsiakwo tsiali tsindinyu, ma nitsikwa tsindabusi tsioburuchi. Omusabibu kwakhula nikurambiha okhwola khumalumbesi, abandu bosi balola singa obwa kuli namasaafu amalahi, khandi obwa kuli omurambi.

¹²Nebutswa kwehwa muburima obukali ma nikufuubwa hasi. Omuyeka okusambanga okhurula ebukwe kwomia amatunde kakwo. Tsisaka tsiakwo tsifuunakwa nitsihinibwakhwo; tsiomibwa ma nitsisambwa.

¹³Luno kwasimikhwa musitsiimi, musibala esiomu esirali namaatsi.

¹⁴Es'sina siomusabibu siahamba omul'lo; omul'lo kwasamba tsisaka tsiakwo nende amatunde kakwo. Tsisaka tsiakwo sitsiakhabekhwo netsingufu khandi tawe, sitsiakhabe tsindabusi tsioburuchi tawe. Yilu nolwembo lwesibeela; lwembwanga khase na khase.