Read lunyore ESEKIELI 20 Bible Online

ESEKIELI 20 - lunyore bible

ESEKIELI 20

¹Liali litukhu lielikhumi khumwesi kwakharano omuhika kwakhane nakhataru khwokhwatisibwa khwefwe mubuhambe, abalala khubemeli ba Baisiraeli beetsa nibareeba khukobulalilo bwo MWAMI, ma nibekhala hasi imbeli wanje.

²Kho OMWAMI yambool'la mbu,

³“Omwana womundu, l'loma khubasaatsa yaba obabool'le mbu Ise OMWAMI Nyasaye mboolanga mbu; mbula mukhetsele okhureeba obulalilo bwanje noho? Tooto mwene singa obwandi Nyasaye oli mwoyo sinamulekhe namureebe sindu siosi tawe. Ise OMWAMI Nyasaye mal'le okhuboola.

⁴“Omwana womundu, werechekhele okhubakhalachila noho? Kho khakhole mbwo. Obetsusie ebindu ebies'sinyo ebia bapapa babwe bakhola.

⁵Babool'le akamboolanga. Olwa ndali okhwela Isiraeli, ndali okhulomba esiesuho khubo. Ndali okhwebisula khubo nibali Emisiri ma nimbabool'la mbu nise OMWAMI Nyasaye wabwe.

⁶Olwene yilwo nilwo olwa ndasubisia okhubahiinia Emisiri nende okhubemel'la okhutsia musibala esiandali okhubeel'la omwene, siobunolu nende obuhinda, khandi esieliloba lilahi okhusila.

⁷Ndali okhubabool'la bafuube ehale ebiniini bies'sinyo ebiabali nibayanza khandi balekha okhwekhola abomusilo khulwokhwekayakaya abanyasaye bobubehi abe Misiri sichila ise nise OMWAMI Nyasaye wabwe.

⁸Nebutswa bali okhukhol'la indiri na nibasuula okhumbulila. Sibafuuba ehale ebiniini biabwe ebia bekayakayanga tawe, kata sibalekha okhulonda abanyasaye be Misiri tawe. Kho ndali okhuboola mbu nambasundul'le oburima bwanje nende lileko lianje nibali Emisiri.

⁹Nebutswa khulwoluyali lweliira lianje, ndakhola yako akakhekaliiye es'simba murwe imbeli wabandu ababali nibamenyanga hakari wabwe, khandi aba ndali okhwebisul'la Abaisiraeli mutsimoni tsiabwe olwa ndabahinia Emisiri.

¹⁰“Ma kho ndabemel'la okhurula Emisiri okhutsia musitsiimi.

¹¹Ndabahelesia amebaalo kanje ma nimbekia amalako kanje akahaananga obulamu khumundu wosi okalondanga nakafumila.

¹²Ndabahelesia etsisabato singa esilolelo sieindakano hakari wanje n'nabo, okhubetsusia mbu Ise, OMWAMI mbakholanga abatsienukhu.

¹³Nebutswa kata musitsiimi abandu ba Isiraeli bali okhuukhol'la indiri. Bafunaka obwibaali bwanje nibasuula okhulonda amalako kanje, akahaananga obulamu khumundu wosi okalondanga. Khandi bafwabia litukhu liakhane nakhataru okhusila. Ndali ahembi okhubasundul'la lirima lianje ma mbamulul'le musitsiimi.

¹⁴Nebutswa khulwoluyali lweliira lianje, ndakhola akakhekaliiye es'simba murwe mumoni tsiabandu abali okhundola nimbahiinianga Emisiri.

¹⁵Kho ndabesuhila musitsiimi mbu, sindakhabahile musibala esiandali nindabahelesia tawe, esilimwo obuhinda nende obunolu, liloba lilahi okhusila.

¹⁶Ndabesuhila sichila bali nibasuuye amalako kanje nibafunakile amebaalo kanje, khandi nibafwabisie litukhu lie Esabato nibekomba okhwekayakaya ebiniini biabwe.

¹⁷“Nebutswa ndali okhubabelel'la. Kho sindamala mber're mutsitsimi tawe.

¹⁸Musilenjesie yako, ndachetsiyia ababuukha abali mubo mbu: Muralonda obwibaali bwabakuka benywe tawe. Muralonda tsifwo tsiabwe kata murefwabiakhwo nebiniini biabwe tawe.

¹⁹Nise OMWAMI Nyasaye wenywe. Mulonde obwibaali bwanje nende amalako kanje.

²⁰Mutsienula Esabato okhuba litukhu litsienukhu, khe libe esilolelo esie indakano yanje ninabo, khandi siakhamwitsusie mbu nise OMWAMI Nyasaye wenywe.

²¹“Nebutswa olwibulo yilwo khandi lwali okhuukhol'la indiri. Bafunaka amebaalo kanje khandi sibalonda amalako kanje akahaananga obulamu khumundu wosi okalondanga tawe. Bafwabia litukhu lie Sabato. Ndali ahembi okhubasundul'la lirima lianje nibali musitsiimi nende okhubeera bosi.

²²Nebutswa khulwoluyali lweliira lianje ndakhola yako akakhekaliiye es'simba murwe mumoni tsiabandu abali okhundola nimbinianga Abaisiraeli okhurula Emisiri.

²³Kho ndalomba esiesuho sindi musitsiimi. Ndali okhwesuha mbu ndakhabasalaanie musibala siosi.

²⁴Ndakhola yaka sichila bali nibasuuye amalako kanje, nibafunaka amebaalo kanje, khandi nibafwabisie litukhu lie Sabato khandi nibekayakaya ebiniini ebia abakuka babwe bekayakaya.

²⁵“Ma nimbahelesia amebaalo akarali amalahi nende amalako akarahaananga obulamu tawe.

²⁶Ndabalekha befwabie abene nemisango chiabwe khandi nimbalekha beere abasiani babwe abakhulundu nibabahaana singa omusango. Yikhwo khwali okhubaha esinyasio nende okhubamanyia mbu Ise nise OMWAMI.

²⁷“Kho luno, omwana womundu, bool'la Abaisiraeli ake ise OMWAMI Nyasaye mbabool'langa. Yiyi neinjila yindi eya abasamwana babwe bali okhunyekelamwo khulwokhubula okhuba abasubilwa khu ise.

²⁸Ndabaleera musibala esiandali nindasubisia okhubahelesia. Olwabalola ebikulu ebirambi nende emisaala chiamasafu amabisi bahaana khubio biosi emisango. Bali okhunjema lirima khulwe emisango echiabasamba nende ewaini eyabaleera singa ebihanwa.

²⁹Ndabareeba mbu: Habundu yaho aha mutsitsanga okhwekayakayila, halangwanga mbwena? Kho nihalangwa mbu ‘Bama’ (eliboolanga mbu habundu ahechingu hokhwekayakayila) okhurula olwene yilwo.

³⁰Luno bool'la Abaisiraeli ake Ise OMWAMI Nyasaye mboolanga: Busina okhwola mukhole tsimbi etsifwanana nende etsia bapapa benywe bakhola nimwekayakaya ebiniini biabwe?

³¹Kata luno musihaananga ebihanwa ebitelwa nimwefwabia abene nebiniini ebitelwa khulwo okhwira abaana benywe singa omusango okhubir'ra mumul'lo. Khandi Luno inywe Abaisiraeli musiitsanga okhureeba obulalilo bwanje singa buli! Singa obwa Ise OMWAMI Nyasaye, oli mwoyo, sinamuhuchil'le inywe mureebe esindu siosi tawe.

³²Mwali okhwekomba mumakani kenywe okhuba singa amahanga kandi, mwekomba singa abandu bebibala bindi abamenyanga nibekayakaya emisaala nende amachina. Nebutswa yako sikanyalikha tawe.

³³“Singa obwe Ise OMWAMI Nyasaye, ndi Nyasaye oli mwoyo, muchetsiyianga mbu namwamihe inywe mwirima lianje nomukhono kwetsingufu, nende obunyali bwanje bwosi.

³⁴Namumanyie obunyali bwanje nende lirima lianje olwa namubunjelesie halala nende okhumuchelesia okhurula mubibala biosi ebiamwasalanamwo.

³⁵Ndakhamuleere musitsiimi siamahanga; ne ebwene yiyo ndimukhalachilayo esiina moni namoni.

³⁶Luno ndakhamukhalachile esiina singa butswa obwa ndakhalachila abapapa benywe musitsiimi sia Sinai,” Nimbwo OMWAMI Nyasaye aboolanga.

³⁷“Ndakhamure mubulindi obutinyu ne nimuhachia okhulonda indakano yanje.

³⁸Ndakhahinie mwinywe abeindiri nende abooni. Ndakhabahinie mumaloba akabamenyangamwo luno, nebutswa sindakhabahuchil'le balakalukhe mwiloba lia Baisiraeli tawe. Khe mulimanya mbu Ise nise OMWAMI.”

³⁹OMWAMI Nyasaye yaboola mbu, “Ne luno inywe Abaisiraeli mwesi mweyanzisie abene! Tsilil'le okhwekayakaya ebiniini bienywe! Nebutswa muchetsiyianga mbu inyuma weyaka mwakhambulile ma mulalekhe okhuleer'ra eliira lianje litsienukhu es'simba murwe khulwa okhuhaana emisango khubiniini bienywe.

⁴⁰Ebwene yila, musibala tsana khusikulu sianje esitsienukhu, esili esikulu esirambi esia Isiraeli, inywe Abaisiraeli mwesi mwakhandekayakaye. Ndakhayanzisibwe n'nenywe khandi ndakhenye mbu munder're emisango chienywe, ebihanwa bienywe ebilahi okhusila, nende ebihanwa bienywe ebitsienukhu.

⁴¹Nimal'le okhumuhinia mubibala ebiamwasalanamwo ma nimubunjelesia halala, ndakhahuchil'le emisango chienywe echia mwakhasambe khandi tsimbia tsiakhalole mbu ise ndi omutsienukhu.

⁴²Olwa ndakhamuchelesie mu Isiraeli, liloba elia ndalaka okhuhelesia abakuka benywe, mwakhamanye mbu, Ise nise OMWAMI.

⁴³Nilwo olwa mwakhetsul'le ebindu ebibi biosi ebiamwakhola khandi singa mwali okhwefwabia abene. Mwakhetule abene khulwe ebindu ebibi biosi ebiamwakhola.

⁴⁴Mwakhamanye mbu ise nise OMWAMI olwa ndakhanyool'le eliira lianje oluyali khulwo khumukhol'la amalahi kata olwe tsinjila tsienywe tsili tsimbibibi halala nebikhole bienywe ebibi.” OMWAMI Nyasaye umal'le okhuboola.

⁴⁵OMWAMI yal'loma n'nase.

⁴⁶Yaboola mbu, “Omwana womundu, henga enandete. L'loma nofukulanga abandu benandete ma oroobe nofukulanga omutsuru kwenandete.

⁴⁷Obool'le omutsuru kwenandete kuhulile aka OMWAMI Nyasaye aboolanga mbu: Lola Mambianga omul'lo, ne nakusambe buli musaala okuli m'mutsuru yibe, kata kube nikuli om'mbisi nohomba omwomu. Sisiliho esianasinyale okhusimia omul'lo yikwo tawe. Nakulande okhurula enandete okhwola esinyolu, ne siomundu wosi nahulile oluuya lwomul'lo tsana.

⁴⁸Bosi nabalole mbu ise OMWAMI mambisie enandete nomul'lo ne khandi mbu abulaho onyala okhukusimia.”

⁴⁹Nebutswa ndali okhusuula nimboola mbu, “OMWAMI Nyasaye, oranomba khole yaka tawe! Buli mundu umal'le okhuchiaka okhwekaana mbu buli lwosi ise n'nomelanga mutsinjelo.”