Read lunyore ESEKIELI 21 Bible Online

ESEKIELI 21 - lunyore bible

ESEKIELI 21

¹OMWAMI yal'loma n'nase.

²Yaboola mbu, “Omwana womundu, l'loma butinyu nofukulanga Yerusalemu. Ofukule buli habundu ahabandu bekayakayilanga. Chetsiyia esibala sia Isiraeli

³mbu Ise OMWAMI mboolanga mbu: Ise ndi omusuku wenywe. Nanzomole olukanga ma namwire inywe mwesi abali abalahi nende ababi.

⁴Narumikhile olukanga lwanje okhwira abandu bosi okhurula esinyolu okhwola enandete.

⁵Siomundu namanye mbu Ise OMWAMI mal'le okhuchomola olukanga lwanje ne sindakhalure mulwola khandi tawe.

⁶“Omwana womundu, binda singa owomwoyokwo kukhalikhanga khulwe esibi. Binda khulwe esibeela imbeli wabandu bosi.

⁷Olwa nabakhureebe esichilanga nobinda nisina, obabool'le mbu obindanga khulwamang'ana aketsanga. Olwa naketse, emioyo chiabwe nachibe noburi obukali, amakhono kabwe nakatofule, esinani siabwe nasifwe, khandi amasikamo kabwe nakatechele. Inyinga tsana imal'le okhwola ne eli hano.” OMWAMI Nyasaye umal'le okhul'loma.

⁸OMWAMI yal'loma n'nase.

⁹Yaboola mbu, “Omwana womundu, rooba. Bool'la abandu ake ise OMWAMI mboolanga mbu: Olukanga, olukanga luyiakaywe ma lubakhilwe amafura.

¹⁰Luyiakaywe okhwira, lubakhilwe amafura okhwakha singa oluheni. Okhusangala sikhulabaho tawe, okhuba abandu banje bamala okhulechelesia buli lichetsiyio nende buli esinyasio.

¹¹Olukanga lubakhwanga amafura, okhulurechekha khulwokhurumikhilwa. Lumal'le okhuyikalwa ma khandi lubakhilwe amafura, lureebwe mumakhono komwiri.

¹²Lakaya mukhubelela, omwana womundu; olukanga yilu luliho khulwabandu banje, khandi khulwabemeli ba Isiraeli bosi. Batsitsanga okhwirwa halala nende abandu banje bandi bosi. Mwefumbel'le mubilifu bienywe khulwe esibeela.

¹³Ndemanga abandu banje, ne nibaba nibasuula okhwekalukhania, ebindu yibi biosi nabiekhole khubo.

¹⁴“Luno, omwana womundu, rooba. Khupa amakhono ma olukanga nalwire khase nakhase. Yilu nolukanga olwiranga, olukanga olurisianga khandi olusinzanga.

¹⁵Luchilanga abandu banje nibakosia olutswoni khandi nibesikar'ra. Risianga litookho liabwe nende olukanga lwang'ang'ananga singa oluheni ne lwerechekhele okhwira.

¹⁶Khalaka notsia khulubeka lwomukhono musaatsa nende khumukhono mukhasi, ibe olukanga olwochi! Khalaka hosi ahosukhan'na.

¹⁷Nase khandi nakhupe amakhono kanje, ne lileko lianje nalihwe. Ise OMWAMI mal'le okhuboola.”

¹⁸OMWAMI yal'loma n'nase.

¹⁹Yaboola mbu, “Omwana womundu, ra esimanyilo khumihanda chibili echiomuruchi wa Babulonia anyala okhwitsilakhwo nolukanga lulwe. Chiosi chibili chichiakile musibala silala. Ore emisaala chiesimanyilo silikhwo ahemihanda chiabukhan'nanga.

²⁰Omukhono mulala nakumanyie omuruchi injila yokhutsia mwitookho lia Baamoni elilangwanga Rabba, ne okundi nakumanyie injila yokhutsia Yuda, mwitookho lia Yerusalemu eliasirwa lisisi.

²¹Omuruchi wa Babulonia asinjila hamusaala kwesimanyilo silikhwo ahemihanda chiabukhan'nanga okhunyoola injila yatsiakhwo, nabungul'la tsisele; areeba ebiniini bibie okhumwibaal'la; alambule ingurumani yeinyama ehan'nwe singa omusango.

²²Luno, omukhonokwe omusaatsa kuchingile olusele olwarebwakhwo esimanyilo esiahandikwa mbu, ‘Yerusalemu!’ Lum'bool'langa atsie ma arechekhe ebilasan'we, okhusichikha emikanda chiobulwani nokhulangisia abasikari okhutsia mwihe, okhusiamia emikanda chiabasikari mubilibwa, okhusichikha ebifuumi, nende okhuyaba emitalo.

²³Abandu ba Yerusalemu sibanyala okhusubila yaka khulwe tsindakano etsia balomba tawe. Nebutswa obuloli yibu nobwokhubetsusia khuketsimbi tsiabwe nende okhubachetsiyia mbu nabafumilwe.

²⁴Yaka niko ake Ise OMWAMI Nyasaye mboolanga. Tsimbi tsienywe tsiebakaaye habulafu. Siomundu umanyile obwe esiina simufwiliye. Mumanyianga tsimbi tsienywe mukosi akamukholanga. Musinjilanga nimumal'le okhukhalachilwa, ne Ise namuhaane mumakhono kabasuku benywe.

²⁵“Ibe omundu omubi, owesifwabwi, omuruchi wa Isiraeli, litukhu lilio, litukhu liesinyasio sisio liokhumal'likha litsanga.

²⁶Ise OMWAMI Nyasaye, mal'le okhuboola. Enabule olusimbi lulwo nende esilembasio. Esindu siosi sinasibekhwo singa sibetsanga khandi tawe. Helesia abatakha obunyali! Wisie hasi abali abaruchi!

²⁷Okhumumwa; okhumumwa! Yee, ise naamume litookho. Nebutswa yaka sinakekhole uyo owandeela okhuhaana esinyasio khwitookho nasili okhwitsa tawe. Nilwo olwa ndakhalihaane khuye.

²⁸“Omwana womundu, rooba. Oboole ake Ise, OMWAMI Nyasaye mbool'langa Abaamoni, abanyekanga Isiraeli. Babool'le mbu: ‘Olukanga lwerechekhele okhumuma; lubakhilwe amafura okhwira, nende okhwakha singa oluheni.

²⁹Amabisulo aka mulolanga sikali akatooto tawe, ne obuloli bwa muboolanga sibuli obwatooto tawe. Muli ababi khandi abasiamu, ne litukhu lienywe litsanga, litukhu lienywe eliokhuhebwa esinyasio siokhumal'likha. Olukanga nalukhalake amakosi kenywe.

³⁰“ ‘Kalusia olukanga mulwola lwalwo! Namukhalachile esiina habundu yaho aha mwalongelwa, khandi mwiloba eliamwebul'lwamwo.

³¹Lileko lianje nalimusundukhekhwo olwa nandilakhuule khwinywe singa omul'lo okwatukhanga. Ne namuhaane mumakhono kabandu aberi abali abasitsa bokhwonoonia.

³²Namumululwe nomul'lo. Amatsahi kenywe nakaratsibwe musibala sienywe abene, ne omundu wosi siyakhamwitsulilekhwo khandi tawe.’ ” OMWAMI umal'le okhuboola.