Read lunyore ESEKIELI 22 Bible Online

ESEKIELI 22 - lunyore bible

ESEKIELI 22

¹OMWAMI yal'loma n'nase.

²Yaboola mbu, “Omwana womundu, werechekhele okhukhalachila litookho yilio elietsulamwo abeeri? Linoosie ebindu biosi ebies'sinyo ebia liakhola.

³Bool'la litookho ake Ise OMWAMI Nyasaye, mboolanga, sichila ibe wamala okhwira abandu baabo abenji okhusila khandi wayefwabia khulwokhwekayakaya ebiniini biabanyasaye bandi, neinyinga yiyo yitsanga.

⁴Esiina sikhufwiliye khubwiri yibwo khandi wefwabisie khulwebiniini ebiawalomba, ma kho litukhulio litsanga, inyingayo imal'le okhwola. Yisio nisio esichil'le nindekha tsimbia tsikhutsekhel'le ne amahanga kosi kakhukhol'le esihenyehenye.

⁵Amahanga akali ahembi nende akali ehale kakhukhol'langa esihenyehenye khulwokhubula okhuria amalako.

⁶Abemeli ba Isiraeli bosi basubilanga mutsingufu tsiabwe abene ma bakhola obwiri.

⁷Abulaho omundu wosi mwitookho ohelesinjia abebuli baabe oluyali. Mukaatanga abacheni abali musibala muno nimulilil'la abalekhwa nende ababisandu.

⁸Simuhaananga oluyali khwitukhu lie Sabato tawe.

⁹Abalala khubandu benywe bachiikhanga abasiabwe nibaruna mbu beerwe. Abandi khubo balitsanga ebiemisango ebihan'nwe khubiniini. Abandi bakholanga akemioyo chiabwe chionyonywanga okhukhola.

¹⁰Abalala khubo baheyanga nende abakhasi ba basamwana. Abalala bahachianga abakhasi okhuba n'nabo olwa bali m'mwesi.

¹¹Abandi bakholanga obuheyi olwa bandi baselelanga abakhasi babaana baabwe nende abakhaana ba samwana yebul'la m'mukhasi undi.

¹²Abandi khubandu benywe beranga khulwa okhurungwa. Abandi barungianga inganga khulwokhukopia Abaisiraeli basiabwe nende okhukwa abahinda khulwo khubalilil'la. Banzibiliye.” OMWAMI Nyasaye umal'le okhuboola.

¹³“Nanzikal'le obunuuli bwenywe nende obwiri bwenywe.

¹⁴Mupaalanga namube nimusili nolutswoni nohomba tsingufu olwa nambe nimal'le okhuhesia okanjoomanga okhukhola khwinywe noho? Ise OMWAMI mal'le okhuboola, ne eliambooye okhwola liekhole.

¹⁵Nasalanie abandu benywe mubuli sibala nende mubuli lihanga ne nanzikal'le ebikholwa bienywe ebibi.

¹⁶Ma kho amahanga kandi nakamuchaaye, nebutswa mwakhamanye mbu nise OMWAMI.”

¹⁷OMWAMI yal'loma n'nase.

¹⁸Yaboola mbu, “Omwana womundu, Abaisiraeli sibali nobukhonyi khu ise tawe. Bali singa esibia esibula obukhala. Bali singa omukasa, lipanga, nohomba esibia esiahinibwa nisifuubwa olwefetsa emal'le okhusiiywa mumul'lo.

¹⁹Kho luno Ise, OMWAMI Nyasaye, mbabool'langa mbu babula obukhonyi bwosi khu ise singa obuchafu yibwo buli. Nambabunjelesie nimbaleera bosi halala mu Yerusalemu

²⁰singa obwomukasa, nolusaasi, esibia nende lipanga birebwanga m'mul'lo kwokhubisiiya. Lileko lianje nende lirima nabimusal'lusie singa obwomul'lo kusal'lusianga ebindu yibi.

²¹Yee, Nambabunjelesie mu Yerusalemu, nisichikha omul'lo isi wabwe, ma nambasal'lusie mwileko lianje.

²²Nabasal'lusibubwe mu Yerusalemu singa efetsa esal'lusibubwanga m'mul'lo hakari, ma nilwo olwa nabamanye mbu ise mal'le okhusundula lileko lianje.”

²³OMWAMI Yal'loma n'nase khandi.

²⁴Yaboola mbu, “Omwana womundu, bool'la Abaisiraeli mbu liloba liabwe silili litsienukhu tawe, khulwe yako ndihelesianga esinyasio mwileko lianje.

²⁵Abemeli babwe bali singa etsisimba etsihumilanga khunyama eyatsir're. Beranga abandu, nibabukula amapesa kosi nende emiandu echia banyala okhunyoola, ma khulwobwiri bwabwe, balekhanga abalekhwa abenji.

²⁶Abesaalisi bafunakanga lilako lianje ne sibali noluyali khubindu ebitsienukhu tawe. Sibabukhanianga hakari webitsienukhu nende ebirali ebitsienukhu tawe. Sibekianga obwabukhani obuli hakari webindu ebisiyikhu nende ebirali ebisiyikhu tawe, khandi sibalindanga litukhu lie Sabato tawe. Ma nisio esichilanga abandu ba Isiraeli nibarambelesia oluyali.

²⁷Abemeli bomuruchi bafwana tsimbwa tsiom'mutsuru etsirandulanianga inyama yatsir're. Beranga kho babe abahinda.

²⁸Abaroobi babisa tsimbi yitsi singa abandu bafuunikhanga lisisi nende lilongo. Balolanga amabisulo akarali akatooto nibahaana oburoobi oburali obwatooto. Baboolanga mbu bal'lomanga ling'ana lio MWAMI Nyasaye, nebutswa Ise, OMWAMI, simbarumanga tawe.

²⁹Abahinda bakaatanga abandu ne nibanuula emiandu. Babakhondokhondia abatakha nibalilil'la abacheni.

³⁰Ndali okhukhaaba omundu onyala okhwombokha lisisi, onyala okhusinjila ahamasisi kalibulukha ma asoole liloba olwe lileko lianje lili ahembi okhulimuma, nebutswa sindanyoolakhwo omundu wosi tawe.

³¹Khulwe yako nandakhuule lileko lianje okhwitsa khubo, ne nambamume khulwobubi bwabwe singa omul'lo.” OMWAMI Nyasaye umal'le okhuboola.