Read lunyore ESEKIELI 23 Bible Online

ESEKIELI 23 - lunyore bible

ESEKIELI 23

²Yaboola mbu, “Omwana womundu,” balinjiho abakhaana babili abebulwa m'mukhasi mulala.

³Olwa bali nibasili abaana bati, nibamenyanga Emisiri, bakosia olukhaana lwabwe ma nibakwa abatamba.

⁴Omukhulundu yalangwa Ohola[2] (ye nesifwanani sia Samaria), ne omutu yalangwa Oholiba[3] (ye nesifwanani sia Yerusalemu). Ndali okhubateesia bombi, ma nibanzibul'la abaana.

⁵Kata olwa Ohola yali owanje, yatsilil'la okhuba omutamba ne abalina baabe okhurula Asiria bali okhumwonyonya okhusila.

⁶Bali abasikari nibebiikha tsingubo tsinando halala nabakafuna nende etsisawoni. Bosi bali ababuukha belikondo lilahi abachendelanga khutsisululi.

⁷Yakhola obutamba nabasikari ba Asiria bosi, ne omwekombokwe kwatsilil'la okhumukhola okhweyononia omwene khulwokhwekayakaya ebiniini biabanyasaye ba Asiria.

⁸Yatsilil'la okhukhola obutamba obwa yali niyachiaka olwa yali Emisiri, owa yakosisia olukhaanalwe. Okhurula mumatukhu kayali omukhaana, abasaatsa bakona n'naye ma nibamukhola singa omutamba.

⁹Kho ndamala nimuhaana khu Baasiria abalinji abalina baabe abayenyanga okhusila.

¹⁰Bamunabula esihekenye, nibafumila abasianibe nende abakhaana, ma nibamwira nolukanga. Abakhasi bachenda neliira lilie buli habundu khulwamabi akamukwila yako.

¹¹“Ne kata olwomukhaana wabwe Oholiba yalola yaka, yakwa omubi okhusila ma nayombiakhwo Ohola mubutambabwe.

¹²Ye khandi yali niyonyonywa nabakhulundu ba Asiria nende etsisawoni tsiabasikari — abasikari abebiikhanga tsingubo tsing'inang'inu. Khandi yali okhwonyonywa nabasikari abachendelanga khutsisululi, ababuukha yabo bosi belikondo lilahi.

¹³Ndalola mbu yali owesifwabwi okhusila, ma kho omukhaana wakhabili uyo yali butswa omubi singa owokhuranga.

¹⁴“Yeyinikha okhusila mubukholi bubwe obwesifwabwi. Yalola ebifwanani biabasaatsa nende biabakhongo ba Babulonia ebiali nibiang'oolwa khumasisi ma nibabakhwa erangi inzakhanyu.

¹⁵Khandi bali nibebohele emikhoba mubisienje biabwe nende ebilemba biobukusi khumirwe chiabwe. Bosi balolekha singa abakhongo okhurula musibala sia Abababulonia.

¹⁶Ne olwa yabilola, yetsula nende okhwekomba ma naruma abarumwa khubo mu Babulonia.

¹⁷Abababulonia beetsa ma nibakona n'naye. Bamurumikhila ma nibamwononia okhusila mbu olunyuma yamala nasinyikha n'nabo.

¹⁸Yebakala omwene habulafu ma nachila abandu bosi nibamanya mbu yali omutamba. Ndali okhumubihil'lwa singa obwandali okhubihil'lwa omukhaana wabwe.

¹⁹Yamala naba omutamba okhuyombakhwo olundi, nakhola singa butswa obwa yakholanga nali omukhaana, olwayali omutamba Emisiri.

²⁰Yali niyetsula nomwekombo khubandu abali nibabirana mubuheyi, abobwekombi bwabwe khubakhasi bwabwe khubakhasi bwali obukali singa obwetsipunda khandi singa obwetsisululi.”

²¹(Oholiba, ibe wenya okhukalukha mukhukhola abuheyi obwesiina siakhufwilakhwo olwa wali nosili omukhaana mu Misiri, ahabandu bakhutilanga khutsimbeele tsitsio ma nokosia olukhaana lulwo).

²²“Khe luno, Oholiba, yaka niko ako MWAMI Nyasaye aboolanga khuibe. Abalina baabo yabo bakhuchonyisie, nebutswa nambakhole okhuba nelileko n'nawe nende okhubaleera bakhubotokhane.

²³Nandeere Abababulonia bosi nende Abakalidayo, abandu okhurula Pekodi, Shoa, Koa, nende Ashuru bosi. Nambunjelesie ababuukha belikondo lilahi nabakafuna nabakhongo nende abemeli bosi, halala nende abandu boluyali lweikulu abachendelanga khutsisululi.

²⁴Nabakhuseere okhurula esinyolu nibali nomukanda kwabasikari omukali nende amakaari ketsisululi nende emikongomo. Nabakhufumbile ibe nibali nebikhumba nende ebikutu singa ebiesingo biabwe. Nakhuhaane khubo, ne nabakhukhalachile esiina okhulondokhana namalako kabwe abene.

²⁵Nandekhe nabakhole kosi akabenya khuibe mwileko liabwe sichila ndi nelileko n'nawe. Nabakhalake eliolu lilio nende ebirwibio ma nabeere abaanabo. Yee, nabakhunuule abasianibo nende abakhaanabo ma nababasambe nibalimwoyo.

²⁶Nabakhurandule tsingubo ma nababukule ebimili bibio.

²⁷Nanzikale omwekombo kukwo nende obutamba bubwo obwawakholanga olwa wali nomenyele Emisiri. Sinohengekhwo khandi khubiniini nohomba okhupaalakhwo khuke Misiri khandi tawe.”

²⁸Kano niko ako MWAMI Nyasaye aboolanga: “Nakhuhaane khubandu abawasuula nende abawabihil'lwa.

²⁹Ne sichila bakhubihil'lwa, nababukule ebindu biosi ebiawatiyila ma nabakhulekhe nonabuuywe esihechenye khandi noli esiahonyo singa omutamba. Omwekombo kukwo nende obutamba bubwo

³⁰bikhuchemeye okhunyoola yaka. Walinji omutamba khumahanga ma niweyonoonia nende ebiniini biako.

³¹Wali okhulonda mumakulu komukhaana wenywe, ma kho nakhuhelesie esikombe siesinyasio esiaye yanyoolakhwo mbu nawe osinywekhwo.”

³²OMWAMI Nyasaye aboolanga mbu, “Nonywele musikombe siomukhaana wenywe, nesikali khandi nesirambi. Siomundu alakhutsekhel'la nokhukhunyokhosia; esikombe sitsuye.

³³Nasikhukhole omukholwi wamalwa khandi owesibeela, esikombe yisio nesioburi khandi nesiokhwononia, nesikombe siomukhaana wenywe Samaria.

³⁴Nosinywe ma nosikhamie nasiome, ma ebitonye biasio ebiatikhile nabikhalake olubeele lulwo. Ise OMWAMI Nyasaye mal'le okhuboola.”

³⁵Luno kano niko ako MWAMI Nyasaye aboolanga. “Sichila wali okhunzibil'la ma niukhupa omukongo, nosalile khulwomwekombo kukwo nende obutamba bubwo.”

³⁶OMWAMI yareeba mbu, “Omwana womundu, werechekhele okhukhalachila Ohola nende Oholiba? Obayaale khulwa amang'ana amabi akabakhola.

³⁷Bakhola obuheyi nende obwiri. Baheya nende ebiniini ma nibeera abasiani babwe ababali okhunzibul'la. Bali okhuhaana abasiani banje okhuba omusango khubiniini biabwe.

³⁸Ne sikali niyako konyene akabakhola tawe. Bafwabia Ehekalu yanje ma nibafunaka amalako kelitukhu lie Sabato, elia ndali okhutsienula.

³⁹Khwitukhu eliaber'rakhwo abaana banje singa emisango khuniniini, betsa khu Hekalu yanje ma nibachifwabia!

⁴⁰“Khase na khase baruma abarumwa okhulanga abandu okhurula ehale okhusila, ma abandu tsana nibetsa. Abakhaana babili yabo besaabanga ma bebakha erangi khutsimoni nende okhwesiaha ebimili.

⁴¹Bekhalanga khusitanda esien'gono, ne imbeli wabwe balinji nende emesa niyitsuyekhwo ebindu ebilahi, nibilimwo obwali nende amafura komuseituni aka ndali okhubaha.

⁴²Liyoka liabandu abayanza okhwesangasia abene liahul'likha, abandu baleerwa okhurula musitsiimi. Babiikha abakhasi yabo emikasa khumikhono chiabwe nende tsisimbi tsindahi khumirwe chiabwe.

⁴³Ma nindebool'la omwene mbu abandu bakholanga omukhasi ochonyele khulwobuheyi okhuba omutamba.

⁴⁴Bakalukhanga khubatamba yaba hali akhenji. Bakalukha khu Ohola nende Oholiba, abakhasi besifwabwi yabo.

⁴⁵Abandu abalunji nababakhalachile khukobuheyi nende obwiri bwabwe, sichila bakholanga abuheyi ma amakhono kabwe kalikhwo amatsahi kobwiri.”

⁴⁶Kano niko ako MWAMI Nyasaye aboolanga: “Leere omukanda kwabandu khubo kubakhondakhondie nende okhubanuula ebindu.

⁴⁷Lekha omukanda kubalase namachina ma kubaseere netsinganga, kwire abaana baabwe, khandi kusambe tsinyumba tsiabwe.

⁴⁸Nambinie obusambale musibala siosi singa lichetsiyio khumukhasi wosi mbu arakholakhwo obuheyi singa obwabo bakhola tawe.

⁴⁹Ne inywe abakhaana babili namuhelesie esinyasio khulwo obusambale bwenywe nende tsimbi tsienywe tsiokhwekayakaya ebiniini. Ma nilwo olwa namumanye mbu ise nise OMWAMI Nyasaye.”