Read lunyore ESEKIELI 24 Bible Online

ESEKIELI 24 - lunyore bible

ESEKIELI 24

¹Khwitukhu lielikhumi eliomwesi kwelikhumi mumuhika okwakharano nakhane okwokhwatisibwa khwefwe, OMWAMI yal'loma n'nase,

²Yaboola mbu, “Omwana womundu, handika hasi omwesi kwelitukhu lino, sichila lino nilio litukhu eliomuruchi wa Babulonia achiakanga okhufumbila Yerusalemu.

³Bool'la abandu banje abesikala marwi olukano yilu olwe ise OMWAMI Nyasaye nyenyanga okhubabool'la: Renjekhe indabu khumahika ma witsusimwo amaatsi.

⁴Remwo ebitonye ebilahi ebieinyama, mbu amabeka nende ebilenje; khandi yitsusiamwo ebitonye biamakumba ebilahi.

⁵Murumikhile inyama yelikondi lilahi okhusila, mure tsikhwi isi weindabu tsana, lekhe amaatsi kabilile; Mutekhe amakumba nende inyama.”

⁶Kano niko ako OMWAMI Nyasaye aboolanga: “Litookho liabandu abeeri litibile! Lili singa indabu eyakhupa olukukhu erasabwangakhwo tawe. Ebitonye bieinyama bibukulwangamwo sisilala, ne kata silala sisisikalangakhwomwo tawe.

⁷Obwiri buliho mwitookho, nebutswa amatsahi sikasundukha aholukuukhi lwakhakabisile tawe; kasundukha butswa khulwanda olwele.

⁸Ise ndekhele amatsahi yako yaho, aha karanyala okhubiswa, aha kenyanga okhurunjia es'sialia sielileko.”

⁹Kano niko ako OMWAMI Nyasaye aboolanga: “Litookho liabandu abeeri litibile! Ise omwene nambunjikhe tsikhwi.

¹⁰Leere tsikhwi tsindi! Furel'le olumemo! Teekhe inyama! Teekhe omunyu! Sambe amakumba!

¹¹Luno re indabu yomukasa khumanda ma mutekhe eyie ma yakhanye. Khe indabu yitsa okhuba isiyikhu olukukhu lwosi nilusambilwe,

¹²Kata nikali olukukhu lwosi sinalukor're m'mul'lo tawe.

¹³Yerusalemu, ebikholwa bibio ebibi bikhufwabisie. Kata nikali mbu ndateema okhukhusiiya siwasieyikha tawe. Siwakhabe omusiyikhu khandi tawe okhwola olwa wakhabe niwehuliye obusiro bwelileko lianje liosi.

¹⁴Ise OMWAMI Nyasaye mal'le okhuboola. Esaa eyokhuhesia lichoomo lianje imal'le okhwola. Sinanzibil'le butswa tsimbi tsienywe tawe, kata okhumanyia esirenda nohomba okhuba netsimbabasi khwinywe tawe. Olanyoola esinyasio khulwamang'ana kamwakhola.” OMWAMI Nyasaye umal'le okhuboola.

¹⁵OMWAMI yal'loma n'nase.

¹⁶Yaboola mbu, “Omwana womundu, nzitsanga okhuhiniaho omundu owawayanza okhusila khulwokhumutiaba noluhi l'lala. Orakhekaanakhwo nohomba okhulakaya kata okhuronyia amasika kosi tawe.

¹⁷Okhulakaya khukhwo khurahul'likhakhwo tawe. Oralekha okhwefuunikha omurwe kuukwo nohomba okhwebiikha ebilaaro singa esilolelo esiokhwekhuula tawe. Orefuunikha mumoni mumwo nohomba okhuliakhwo ebiakhulia biamasika tawe.”

¹⁸Mukamba khale litukhu yilio ndali nin'nomanga nabandu, omukolooba kwelitukhu yilio omukhasi wanje yafwa, ne litukhu lialondakhwo ndakhola singa obwandali nimbooleywe.

¹⁹Abandu nibaareeba mbu, “Esichilanga nokhola singa mbu nisina?”

²⁰Kho nase nimbabool'la mbu, “OMWAMI al'lomele n'nase ma niyambool'la

²¹mubool'le amang'ana yaka mbu: Muli nokhwelola khulwe tsingufu tsie Hekalu. Mwayanza okhuchihengakhwo nende okhuchikonya, nebutswa OMWAMI atsitsanga okhuchiononia ne ababuukha abasikaye mu Yerusalemu abali abetsinyumba tsienywe naber'rwe mwihe.

²²Khe namukhole singa obwandaali okhukhola. Sinamwefuunikhe m'moni mwenywe nohomba okhulia ebiokhulia biamasika tawe.

²³Sinamutsie nimurefuunikhile emirwe chienywe nohomba nimurebikhile ebilaaro mubilenje bienywe kata okhwekhuula nohomba okhulakaya tawe. Namuhwetsekhel'le khulwe tsimbi tsienywe, ma namubinde abene khubene.

²⁴Ma ise nambe esimanyilo khwinywe. Namukhole ebindu biosi ebia ndaali okhukhola. OMWAMI aboolanga mbu olwe yaka nakekhole, namumanye mbu ye niye OMWAMI Nyasaye.”

²⁵OMWAMI naboola mbu, “Luno, omwana womundu, nambahiniekhwo Ehekalu yetsingufu eyabelol'langakhwo nende okhusangal'lakhwo, eyabali nibayanza okhuhengakhwo nende okhuchikonya. Ma nambinieho abaana babwe abasiani nende abakhaana.

²⁶Ne litukhu elianakhol'lemwo yaka, omundu owakhahonokokhe mukhwononibwa yikhu yakhetse okhumubool'lakhwo akakhabe nikakwiye.

²⁷Litukhu liene yilio mwakhakalusibubwe obunyali bwokhul'loma obwa mwali nimwakosia, ne mwakhal'lome n'naye. Munjila yiyi mwakhabe esilolelo khubandu, ne bakhamanye mbu ise nise OMWAMI.”