Read lunyore ESEKIELI 25 Bible Online

ESEKIELI 25 - lunyore bible

ESEKIELI 25

¹OMWAMI yal'loma n'nase.

²Yaboola mbu, “Omwana womundu, Laama esibala sia Amoni.

³Babool'le bahulile khuke Ise OMWAMI Nyasaye mboolanga. Mwali okhwekhoya okhulola Ehekalu yanje obwa yali okhufwabibwa, nende obwesibala sia Isiraeli siali okhukwisibwa likunda, khandi obwabandu ba Yuda bali okhwatisibwa mubuhambe.

⁴Sichila mwali okhusangala, nandekhe tsinzibulo okhurula ebukwe wemusitsimi natsimuleke. Nabombokhe etsikambi tsiabwe musibala sienywe ma nabamenyemwo. Bakhalie amatunde ma balanywe amabeele akakhabeye akenywe.

⁵Nangalukhanie litookho lia Rabba okhuba habundu hokhuruchila tsingamia, ne esibala siosi esia Amoni nasikalukhanie okhuba habundu hokhuruchila amakondi, kho mulamanye mbu ise nise OMWAMI.

⁶“Kano niko ako MWAMI Nyasaye aboolanga. Mwakhupa amakhono nimwetuuta khulwobusangali. Mwachiayilisia esibala sia Isiraeli.

⁷Sichila mwakhola yaka naamuhaane mumakhono kabetsimbia tsindi abanabamunuule ebiamuli n'nabio. Namumume okhusila mbu mulalekhe okhubakhwo lihanga khandi nohomba esibala khubwenywe tawe. Nilwo olwa mwakhamanye mbu ise nise OMWAMI.”

⁸OMWAMI Nyasaye yaboola mbu, “Sichila Moabu waboola mbu Yuda ali butswa singa amahanga kandi,

⁹nandekhe amatookho akalindanga khulwakho lwa Moabu nakaseerwe nikalimwo nende amatookho amalahi okhusila singa Betsi Yeshimotsi, Baalimeoni, nende Kiriatsaimu.

¹⁰Nandekhe tsimbia tsiebukwe wesitsiimi natsileke Moabu, halala nende Amoni, ma Moabu nalibule okhubakhwo lihanga khandi.

¹¹Nambelesie Moabu esinyasio, ne abandu bamwo nabamanye mbu Ise nise OMWAMI.”

¹²OMWAMI Nyasaye yaboola mbu, “Abandu ba Edomu barungia Yuda es'sialia esilulu, ma es'sialia siene yisio sichil'le esiina okhufwila Edomu khulwoluhono olurambi.

¹³Luno nandinjia mbu nambelesie Edomu esinyasio khandi nanzire abandu bosi abali Moabu halala netsisolo tsiosi. Nandilombe okhuba likunda, okhurula khwitookho lia Temani okhwola khwitookho lia Dedani, ne abandu bakher'rwe mwihe.

¹⁴Abandu banje ba Isiraeli nabarunjie es'sialia khu Edomu khulwa Ise, ma nabakhole Edomu okhulola obululu bwelileko lianje. Edomu nalimanye obwakali okhunyoola es'sialia sianje.” OMWAMI Nyasaye umal'le okhuboola.

¹⁵OMWAMI Nyasaye yaboola mbu, “Abafilisiti barumikhila obululu okhurunga es'sialia khubasuku babwe abamatukhu amarambi ma nibabamuma muburima bwabwe.

¹⁶Ma kho nase nandinjia mbu naseere Abafilisiti ma nambahinie khusibala. Naamume siomundu owasikala namenyanga Musipaapi sie Bufilisiti.

¹⁷Nambahelesie esinyasio esikali nende okhurunga es'sialia siosi khubo. Nabahul'le obululu bwelileko lianje. Nilwo olwa nabamanye mbu ise nise OMWAMI.”