Read lunyore ESEKIELI 26 Bible Online

ESEKIELI 26 - lunyore bible

ESEKIELI 26

¹Khwitukhu liokhuranga eliomwesi mumuhika kwelikhumi namulala okhurula nikhwatisibwa okhuhilwa mubuhambe, OMWAMI yal'loma n'nase.

²Yaboola mbu, “Omwana womundu, yaka niko akabandu mwitookho lia Tiro batsekhel'langa. Balangisianga mbu, ‘Litookho lia Yerusalemu limumilwe! Obuhinda bwalio buhweye! Silinyala okhwechelania n'nefwe khandi tawe!’

³“Khe, luno kano niko ake Ise OMWAMI Nyasaye mboolanga. Ndi omusuku wenywe, inywe abe litookho lia Tiro. Nandeere abetsimbia tsinyinji okhumuseera, ne nabetse singa amarunda kokhunyanza.

⁴Nabafunake amasisi kelitookho lienywe nende okhulikulula eminaara chienywe ma nanzeye olukhuukhi lwosi ma nandekhe butswa olwanda olwele.

⁵Abalubi betsisuche nabomisienjekhwo etsineti tsiabwe, yaho aha lusinjilanga munyanza hakari. Ise OMWAMI Nyasaye mal'le okhuboola. Abandu bamahanga bakhayaake litookho lia Tiro ebindu bialio,

⁶Ne bakheere yabo abamenyanga mumatookho kalio matititi akali musibala esirabotokhanwa neinyanza, nibarumikhilanga tsinganga tsiabwe. Nilwo olwa Tiro yakhamanye mbu ise nise OMWAMI.”

⁷OMWAMI Nyasaye aboolanga mbu, “Nzitsanga okhuleera omuruchi Nebukadinesa wa Babulonia oli omukhongo khubaruchi bosi okhwitsa okhuseera Tiro. Nayetse okhurula esinyolu nende omukanda kwabasikari abenji nibali nende etsisululi nende amakaari kobulwani.

⁸Yabo abamenyanga mumatookho matititi akali musibala esirabotokhanwa neinyanza Tiro naber'rwe mubulwani. Omusuku nayabe amasisi amatinyu akokhukhwikal'la.

⁹Nabatuye amasisi kaako nemisinga chiabwe, khandi nabasambule eminaarachio nebibia biabwe.

¹⁰Amalumbesi kolukukhi akachingulwanga nokhwilukha khwe etsisululi tsiabwe nakakhufunikhe. Liyoka elietsisululi tsiabwe etsikhwesanga amaakari kemisiiko nende amakaari kobulwani nalitekesie amasisi kaako olwa babir'ranga mubilibwa bielitookho elimumilwe.

¹¹Abasikari baabwe abokhutsisululi nabetsule mutsinjila tsienywe, nibeera abandu benywe netsinganga. Etsisiilo tsienywe tsietsingufu natsilumbwe hasi.

¹²Abasuku baabo nababukule obuhinda bubwo nende ebindu bibio ebiobukhala. Nabalumbe amasisi kenywe hasi nende okhufunaka tsinyumba tsienywe tsingasu. Nababukule amachina, emisaala nende biosi ebitubukhile nokhubifuuba munyanza.

¹³Nanzikale tsinyembo tsienywe tsiosi, ma nasiling'anie amayoosi kobukhana bwenywe.

¹⁴Nandekhe butswa olwanda olwele olwa balubi betsisuche banyala okhubakalakhwo etsineti tsiabwe. Litookho siliakhombokhwe obuhia tawe. Ise OMWAMI Nyasaye mal'le okhuboola.”

¹⁵Kano niko ako OMWAMI Nyasaye abool'langa abandu ba Tiro: “Olwa namube nimulekwanga, abandu bamenyanga khundulo khweinyanza nababe noburi obukali olwa nabahul'le etsikhwisi etsie yabo abanababe nibasinzwanga.

¹⁶Abaruchi bosi abaamihanga kamahanga akali khundulo khweinyanza nabekhe okhurula khutsiruba tsiabwe. Nabanabule etsikanzo tsiabwe tsiobwami nende tsingubo tsiabwe etsianabwakhwo amahwa ma nabekhale hasi nibatechelanga. Nababe nokhutechesibwa okhukali khulweesibi sianobe nonyoye ma kata sinababe abanyala okhulekha okhutechela tawe.

¹⁷Nabakhwembele olwembo olwa masika yilu: Litookho eliafumanga limumilwe! Etsimeeli tsialio tsihinibwe mutsinyanza. Abandu balio barukanga tsinyanza, khandi barisianga bosi abamenyanga khutsindulo tsietsinyanza.

¹⁸Luno, khwitukhu lialikwiye, ebiekhalachinga bitechelanga, ma abandu babio bekosele khulwo okhumumwa yikhwo.”

¹⁹OMWAMI Nyasaye aboolanga mbu, “Namukhole okhuba singa amatookho akamumwa akali likunda ahomundu wosi aramenyanga. Namufunikhe nende amaatsi komutsindungu tsieinyanza.

²⁰Ndakhamuhile okhutsia musibala sie Makombe mukhumumwa khweinziayo, nimumenya halala nabafwa. Khulwe yako abulaho owakhamenya musibala sienywe nokhubukula obukono bwenywe musibala esiabali mwoyo tawe.

²¹Ndakhamukhole esilolelo siokhurisia ne yisio nisio esiakhabe esihesi sienywe. Abandu bakhamukhabe, nebutswa simwakhanyoolekhe tawe.” OMWAMI Nyasaye umal'le okhuboola.