Read lunyore ESEKIELI 27 Bible Online

ESEKIELI 27 - lunyore bible

ESEKIELI 27

¹OMWAMI yal'loma n'nase.

²Yaboola mbu, “Omwana womundu, yembela Tiro olwembo lwamasika,

³litookho yilio elili khundulo khweinyanza ne nilikhola obukhala nende abandu abamenyanga khubuli luchinga lweinyanza. Libool'le ake Ise OMWAMI Nyasaye mboolanga kano: Tiro, mwepaaka khulwe likondo lilio lilahi.

⁴Hango haho hali khunyanza. Abombokhi baabo bakhulomba singa emeeli indahi.

⁵Barumikhila emisaala echiarula musikulu sia Herimoni okhulombakhwo tsimbao, Nende emisiita echiarula Lebanoni khulwo okhulombela omulingoti.

⁶Babukula emisaala chiemiruba okhurula Bashani nibalomba emiikho. Balomba obwelubwo okhurula khutsimbao etsiarula Kupuro, Ma nibasiaha mukari mwabwo nende ameno ketsinzofu.

⁷Amatanga kemeeli kali okhulombwa okhurula khutsikatani, Etsikatani etsianabwa nobuusi okhurula Emisiri, etsiokhulolekha noli ehale. Ebifuunikho bibio bialombwa okhurula khungubo indahi okhusila, ingubo isembe eyarula musiekhalachinga sia Kupuro.

⁸Abandu abakhufukilanga emeeli barulanga mumatookho ka Sidoni nende Arawadi. Abandubo abasitsa nibo abahilanga etsimeeli.

⁹Abakhulundu ba Bibulosi halala nende abafundi babwe, bali musibalasio khulwokhulomba etsimeeli. Abahili betsimeeli tsiosi etsili khunyanza bakula ebindu mumaduka kaako.

¹⁰“Abandu okhurula Perisia, Ludia, nende Libia barumikha singa abasikari mumukanda kukwo kwelihe. Basunga ebikhumba biabwe nende ebikutu biabwe mutsikambi tsiabasikari. Nibo abandu abakhuleer'ra oluyali.”

¹¹Abasikari okhurula Arawadi balinda amasisi, ne abandu okhurula Kamadi balinda eminaara chichio. Basunga ebikhumba biabwe khumasisi kaako. Nibo abandu abachila nooba nelikondo lilahi.

¹²“Wali okhukhol'la obukhala musibala sia Esipania ma nobukula efetsa, esibia, lipati nende olusasi singa omurungo kwebindu bio ebinji.

¹³Wakhol'la obukhala bibala bie Buyunani, Tubali nende Mesheki ma nosilania ebindubio khulwokhunyoola abasumba nende ebimili biomukasa.

¹⁴Wakusia ebindubio khulwokhunyoola etsisululi emisiko nende etsiobulwani nende tsinyumbu okhurula Betsi — Tokarima.

¹⁵Abandu ba Rodesi bakhola obukhala n'nawe; abandu bebibala biokhutsinjinga tsietsinyanza bakhuhelesia ameno ketsinzofu nende tsimbaho khulwokhunyoola ebindu khuibe.

¹⁶Abandu ba Siria bakhola obukhala n'nawe khulwebindu ebinji ebia wali n'nabio. Bakhurunga emikoche, ingubo isembe, ingubo eyanabwakhwo amahwa, earakhwananga indahi, amakongolo komunyanza nende etsilulu khulwebindu bio ebinji.

¹⁷Yuda nende Isiraeli bakhurunga ingano, obuukhi, amafura komuseituni, nende ebihunyanga bulahi khulwemianduchio.

¹⁸Abandu ba Damasiko bakhola obukhala n'nawe khulwebindu ebinji ebia wali n'nabio. Bakhurunga ewaini okhurula Heliboni nende epamba indafu.

¹⁹Vedani nende Yavani bakhurunga esibia, ebihunyanga bulahi nende esukari khulwebindu ebiabanyoola khuibe.

²⁰Abandu ba Dedani basilania ebikhalo biokhutsisululi khulwe ebindu ebiabanyoola khuibe.

²¹Abaharabu nende abaruchi besibala sia Kedari bakhurunga ebimeme biamakondi, amakondi nende tsimbusi khulwebindu ebiabanyoola khuibe.

²²Abakhala okhurula Sheba nende Raama bakhuhelesia ebimili, etsahabu nende ebihunyanga obulahi, khulwebindu ebiabanyoola okhurula khuibe.

²³Amatookho ka Harani, Kane nende Edeni halala nende abakhala ba Sheba, nende abomumatookho ka Ashuru nende Kilimadi bosi bakhola obukhala n'nawe.

²⁴Bakusia khuibe tsingubo tsioluyali etsiabuluu nende etsiamakha, nende tsingubo tsindahi, nende emikeka etsialwanga hasi, nende emikoye chiabaswa nende emikoye chindi.

²⁵Ebindu bibio biobukhala biachingwa nende emikanda chietsimeli tsikhongo etsichinganga emisiko. “Wali singa etsimeeli munyanza etsiitsuyemwo emisiko emisiro.

²⁶Olwabafuki betsimeeli bakhuhila munyanza, omuyeka kwabukwe kwamulula emeeliyo hakari munyanza.

²⁷Obuhinga bubwo bwosi obwobukhala, nende abahili betsimeeli tsitsio bosi, halala nende Abalombi betsimeeli tsitsio nende abakhala baabo, kata nende abasikari bosi abali mumeeli. Bosi p'pe bakor'ra munyanza olwe meeli yiyo yamululwa.

²⁸Okhuhanzukha khwabandu abali nibeyinikhanga, khwahul'likha ehale khuluchinga lwinyanza.

²⁹“Abandu bayilukha okhurula mutsimeeli tsiosi. Abahili betsimeeli bakalukha khuluchinga.

³⁰Bosi bekhuulanga bululu khulwe ibe, nibafuuba olukhuukhi khumirwe chiabwe nende okhukalakala mwikokhe.

³¹Bebekanga emirwe chiabwe abene khulweibe, nibebiikha tsingubo tsiamatasi. Emioyo chiabwe nemilulu olwa bekhuulanga.

³²Balakhwembela olwembo lwamasika nibaboola mbu, ‘Niwina owamumwakhwo singa Tiro munyanza hakari?

³³Olwebindubio biobukhala biola mubibala bieinjelekha, mwahesisia buli lihanga kosi aka lienyanga. Abaruchi bakwa abahinda khulwobuhinda bwebindu bienywe.

³⁴Luno mumumiywe munyanza; mweinikhile okhwola mutsindungu tsieinyanza. Ebindu bibio nende bosi abali okhukhukhol'la emilimo, bamal'le okhukor'ra munyanza halala n'nawe.’

³⁵“Siomundu omenyanga khuluchinga lweinyanza wekosele khulwe esibi esikhukwiliye ibe. Kata abaruchi babwe bakoselwe, ma oburi bumal'le okhwehandika khubweni bwabwe.

³⁶Ibe umal'le okhuhiinibwaho ma utsiye khulweinziayo, ne abakhala bomusibala mwosi bekosele, bariye mbu khase nabo khandi bakhanyoola esibi singa esisio.”