Read lunyore ESEKIELI 28 Bible Online

ESEKIELI 28 - lunyore bible

ESEKIELI 28

¹OMWAMI yal'loma n'nase.

²Yaboola mbu, “Omwana womundu, bool'la omuruchi wa Tiro ake Ise OMWAMI Nyasaye mboolanga khuye: Ibe oli nesunga ingali echilanga noboola mbu oli nyasaye. Oboolanga mbu oli singa nyasaye sichila wikhalanga khuluruba nobotokhan'nwe nende tsinyanza. Onyala okhwekaatia oli nyasaye, nebutswa tawe, ibe oli omundu namundu sioli nyasaye tawe.

³Opaalanga oli omuchesi okhuyomba Daneli[4], mbu libulaho libiso elinyala okhubiswa okhurula khuibe.

⁴Obulwenyukhu bubwo nende amachesiko kakhukhola okhuba nobuhinda bwefetsa nende obwetsahabu.

⁵Wakhola obukhala mutsinjila tsiobuchesi ma natsilil'la okhunyoola injelesio. Mako obwoli nesunga khulwobuhinda bubwo!

⁶“Kho luno, kano niko ake Ise OMWAMI Nyasaye, mboolanga: sichila opaalanga oli omuchesi singa nyasaye,

⁷Nandeere abasuku abarali netsimbabasi okhwitsa okhukhuseera. Nabamulule ebindu biosi ebilahi ebiawanyoola khulwobusitsa bubwo nende obuchesi bubwo.

⁸Nabakhwire ma nabakhuhile musilindwa esiatsinziba.

⁹Olwa nabetse okhukhwiira, mbula notsilil'le okhuboola mbu oli nyasaye noho? Olwa aberi naboole khuibe nobe butswa omundu namundu ne tawe omunyasaye.

¹⁰Nofwe singa imbwa mumukhono kwabandu beb'bala biebucheni abarali nanyasaye. Ise, OMWAMI Nyasaye mal'le okhuhaana lilako.”

¹¹OMWAMI yal'loma n'nase khandi.

¹²Yaboola mbu, “Omwana womundu, belela khulwe sibi esia nasiitse khumuruchi wa Tiro. Mubool'le ake Ise, OMWAMI Nyasaye, mboolanga kano: Olundi walinji esilolelo siomahesikhu. Mako obwa wali omulwenyukhu ma owelikondo!

¹³Wamenyanga mu Edeni, omukunda kwa Nyasaye, ma niwebiikha ebimili bietsimbila tsiosi: etsilulu nende alumasi, topasi, zumaradi isiyikhu, amachina keshohamu, yasipa, safira, emikoche, nende eparaketo[5]. Wali nende ebimili bietsahabu. Bialombwa khulwe ibe khwitukhu eliawalombwa.

¹⁴Ndali okhuraho om'malaika owokhurisia khulwo okhukhulinda. Wamenyanga musikulu sianje esitsienukhu ne nochenda hakari wetsilulu ebing'inang'inanga.

¹⁵Okhukhola khukhwo khwali okhulunji okhurula litukhu lia walombwa okhwola olwa wachaaka okhukhola obubi.

¹⁶Wali okhufulukhana mukhukulana nende mukhukusia ebindu, ne yaka kali okhuchila nokhola obulwani nende tsimbi. Kho ndali okhukhuhakia okhurula khusikulu sianje esitsienukhu, ne om'malaika owakhulindanga yakhukhunga okhurula mubimili ebing'inang'inanga.

¹⁷Wali okhutsaalikha khulwe likondo lilio lilahi, ma ifuma yiyo yakhulomba nokhola singa omuhingwa. Khusifune yisi ndali okhukhwisia khumaloba ma nikhulekha obe esilolelo khubaruchi bandi.

¹⁸Wakhola obubi olwa wali okhukula nende okhukusia ma nikachila habundu henywe hokhwekayakayila nihakoyanibwa. Kho ndahambia omul'lo mwitaala nindisamba liosi p'pe. Bosi abakhuhengakhwo leelo bakhulolanga niwakwa likokhe.

¹⁹Ibe umal'le okhuhiinibwaho ma utsiye khulweinziayo, netsimbia tsiosi etsiali nitsiakhumanya tsimal'le okhuriisibwa tsiriiye mbu khase natsio tsiakhanyoola esibi singa esie ibe onyooye.”

²⁰OMWAMI yambool'la mbu,

²¹“Omwana womundu, rooba nofukulanga litookho lia Sidoni.

²²Bool'la abandu baliho ake Ise OMWAMI mboolanga khubo: Ndi omusuku wenywe inywe abelitookho lia Sidoni; abandu nabanzitsoomie khulwo aka nzia okhumukhol'la inywe. Nabamanye mbu ise nise OMWAMI, olwa manyianga singa obwandi omutsienukhu khulwe okhuhaana esinyasio khuyabo abamenyanga mwiwe.

²³Narume obulwaye khwinywe ma amatsahi nakasundukhe mumihanda chienywe. Namuseerwe okhurula mutsimbeka tsiosi ma abandu benywe naberwe. Nilwo olwa namumanye mbu ise nise OMWAMI.”

²⁴OMWAMI yaboola mbu, “Libulakhwoho kata elala khumahanga akali ahembi na Isiraeli akakhol'la Isiraeli inzekhelesi eliakhabe singa ebisisia nende amarakalu kokhusalisia Isiraeli. Ma bakhamanye mbu ise nise OMWAMI Nyasaye.”

²⁵OMWAMI Nyasaye yaboola mbu, “Nangalusie abandu ba Isiraeli okhurula mutsimbia owandali nindabasalanisia, ma amahanga kosi nakamanye mbu ndi omutsienukhu. Abandu ba Isiraeli nabamenye musibala siabwe abene, esibala esiandalaamila omurumikhili wanje Yakobo.

²⁶Nabamenyemwo bulahi. Nabombokhemwo tsinyumba nende okhusimikhamwo emikunda chiemisabibu. Ndakhahane esinyasio khubarende babwe bosi abali okhubakhol'la inzekhelesi ma Isiraeli yakhabe nomulembe. Khe nilwo olwa nabamanye mbu ise nise OMWAMI Nyasaye wabwe.”