Read lunyore ESEKIELI 29 Bible Online

ESEKIELI 29 - lunyore bible

ESEKIELI 29

¹Khwitukhu lielikhumi nakhabili khumwesi kwelikhumi mumuhika kwelikhumi okwokhwatisibwa khwefwe, OMWAMI yal'loma n'nase.

²Yaboola mbu, “Omwana womundu, rooba nofukulanga omuruchi we Misiri. Mubool'le mbu ye nende abandu bosi besibala sie Misiri nabanyoole esinyasio.

³Boola mbu yaka niko ake ise OMWAMI Nyasaye mbool'langa omuruchi we Misiri: Ndi omusuku uwo, ibe ing'wena ingali ekonanga mumuchela. Oboolanga mbu omuchela kwa Naili nokukwo khandi mbu niwe owakulomba.

⁴Nzitsanga okhura ingaka okhubir'ra muluseya lulwo ma nakhole tsisuche tsili mumuchela kukwo okhuhanda khuibe butinyu. Ma nakhukhwese okhurula mumuchela kwa Naili, ne tsisutse tsiosi nitsihande khuibe.

⁵Nakhufuube halala ne tsisuche yitsio tsiosi musitsiimi. Omubili kukwo nakukwe hasi ma nakulekhwe sila okhuyabilwa. Nanguhaane khumanyonyi nende khutsisolo okhuba esiokhulia siatsio.

⁶Nilwo olwabandu be Misiri bosi nabamanye mbu ise nise OMWAMI Nyasaye.” OMWAMI aboolanga mbu, “Abaisiraeli, bali okhweleta khu ibe Emisiri khulwokhunyoola obukhonyi, nebutswa wali butswa singa olusaala olutekhele tawe.

⁷Olwa bali okhwesetamia khuibe, mwabafuunikha, nobafumira mutsikwaha tsiabwe, khandi nofunaka emikongo chiabwe.

⁸Khe luno, Ise OMWAMI Nyasaye, khubool'langa mbu, nandeere abandu abanabakhuseere netsinganga, ne nabeere abandu baabo halala nemiruko tsitsio tsiosi.

⁹Emisiri nekwe likunda. Khe nilwo olwa namumanye mbu ise nise OMWAMI. “Sichila wali okhuboola mbu omuchela kwa Naili nokukwo khandi niwe owakulomba,

¹⁰Khe ise ndi omusuku uwo khandi omusuku womuchela kukwo okwa Naili. Nanombe Emisiri yosi okhukwa esialanze esikhaya, okhurula mwitookho lia Mikitoli elili esinyolu okhwola khwitookho lia Aswani elili enandete nende okhutsia okhwola khulwakho lwa Etsiopia.

¹¹Saaliho kata omundu nohomba esolo owakhachende okhubir'ramwo tawe. Khulwemihika amakhumi kane esindu siosi sisilimenyakhwomwo tawe.

¹²Ndakhakhole Emisiri okhuba esibala sies'soma okhusila musibala siosie. Khulwemihika amakhumi kane Amatookho ke Misiri nakamumwe obubi okhusila okhuyombakhwo litookho lindi liosi. Ndakhatisie Abaamisiri okhutsia okhumenya musibala sindi. Bakhelukhile mubuli esibala nende okhumenya mubandu bandi.”

¹³OMWAMI Nyasaye aboolanga mbu, “Olunyuma lwemihika amakhumi kane, ndakhachelesie Abaamisiri okhurula mumahanga akandakhabe nindabasalanisiamwo,

¹⁴ne ndakhalekhe bamenye enandete we Misiri, aha bamenyanga khale. Ebwene iyo bakhabe olwibulo olutekhele,

¹⁵oluli olutekhele okhusila mutsimbia tsiosi, ne khandi sibakharukekhwo amahanga kandi tawe. Ndakhabakhole okhuba abarali matsami mbu sibakhabe abanyala okhuhakia lihanga lindi liosi okhukhola akobulalilo bwabwe tawe.

¹⁶Isiraeli siyakhelete khubo khulwobukhonyi khandi tawe. Esibi sie Misiri nenyoole siakhetsusie Isiraeli obwa Baisiraeli bakhola obubi okhweleka khu Bamisiri. Ma nilwo olwa Isiraeli nemanye mbu ise nise OMWAMI Nyasaye.”

¹⁷Khwitukhu liokhuranga eliomwesi kwokhuranga mumuhika kwamakhumi kabili nachine nachitaru okwokhwatisibwa khwefwe, OMWAMI yal'loma n'nase.

¹⁸Yaboola mbu, “Omwana womundu, omuruchi Nebukadinesa wa Babulonia yatsia okhuseera Tiro. Yakhola abasikari baabe okhuchinga emisiko emisiro mbu kata emirwe chiabwe chiakhurikha ebiole ne amabeka kabwe nikachonya okhusila, nebutswa kata omuruchi nohomba abasikari baabe sibanyoolakhwo esindu siosi khulwomunyakhano kwabwe kwosi tawe.

¹⁹Kho luno kano niko ake Ise OMWAMI Nyasaye mboolanga: mbaananga esibala sie Misiri khumuruchi Nebukadinesa. Naasifumile ma nayaake ebindu bilimwo. Nabukule emiandu chie Misiri nachibe singa omurungo kwabasikari baabe.

²⁰Muhelesianga esibala sie Misiri singa omurungo khulwobutiyi bubwe, sichila abasikari baabe bayikholeyenge ise emilimo. Ise OMWAMI Nyasaye, mal'le okhuboola.

²¹“Olwa akene yako kakhekhole, ndakhakhole abandu ba Isiraeli okhuba abakufu ma ndakhakhukhole ibe Esekieli, okhul'loma butinyu ahomundu wosi anyala okhukhuhulila, kho bamanye mbu ise nise OMWAMI.”