Read lunyore ESEKIELI 3 Bible Online

ESEKIELI 3 - lunyore bible

ESEKIELI 3

¹Nyasaye yambool'la mbu, “Omwana womundu, lia esitapu yisi; ma otsie okhul'loma khubandu ba Isiraeli.”

²Kho nase ndeekula omunwa kwanje, naye niyambelesia esitapu tsana ndie.

³Ne niyambool'la mbu, “Omwana womundu, lia esitapu esia khuhelesianga yisi ne wikure t'tu.” Khe ndasilia; ne siali esibuulu m'munwa kwanje singa obuukhi.

⁴Ma Nyasaye niyambool'la mbu, “Omwana womundu, tsia khubandu ba Isiraeli, ma obabool'le kosi aka nzia okhukhubool'la.

⁵Ise sikhurumanga khubandu abal'lomanga ol'lolomo olucheni oluli olutinyu tawe, nebutswa khurumanga khubandu ba Isiraeli.

⁶Nimba nikhuruma khumahanga amakali akal'lomanga olulimi olucheni olworanyala okhuhul'la, bo bakhanyala okhuhul'la amang'anako.

⁷Nebutswa abandu ba Isiraeli sinabakhuhul'lekhwo tawe; kata nase sinabambulile tawe. Bosi nabemirwe emitinyu khandi abesifwabi.

⁸Luno nzia okhukhukhola owesikala marwe singa nabo bali abesikala marwi.

⁹Nakhuralisie singa olwanda khandi nakhutinyie singa lichina lia alumasi; kho oraria abandu beinduli yabo tawe.”

¹⁰Khandi Nyasaye yambool'la mbu: “Omwana Womundu, orechelesie khandi witsul'le kosi akakhubool'langa.

¹¹Ma otsie, khubandu besibalasio abali mukhwatisibwa ma obabool'le ake ise OMWAMI Nyasaye mbabool'langa kata nibaba nibakhuhul'la nohomba nibasuula okhuhul'la.”

¹²Kho Omwoyo wa Nyasaye yanjinguula ikulu, ma nimbul'la okhurula emukongo, okhuhuuma okhukali okhwomwoyo okwaboola mbu, “OMWAMI ahebwe oluyali ikulu mwikulu!”

¹³Ndahul'la liyoosi lietsimbaha tsie ebili mwoyo nibikhupanga halala, nende liyoka liamakurutumu mumbafu mwatsio, ne liali likali singa okhutechela khwesibala,

¹⁴Obunyali bwo MWAMI bwetsa khu ise mubunyali obukali, ne olwo omwoyo uwe yanjinguula ikulu ndahul'la obululu ma nimba noburima.

¹⁵Kho ndetsa ma ninzola Telabibu, ahembi nomuchela kwa Kebari, ahabandu abatisibwa bali nibamenyanga, ma amatukhu kane nakataru ndekhalaho ning'aangal'le.

¹⁶Olwa Amatukhu kane nakataru yako kali nikahweye, OMWAMI yal'loma n'nase

¹⁷naboola mbu: “Omwana womundu ndakhukhola obe omulindi welihanga lia Isiraeli. Nobahelesie amachetsiyio aka nzia okhukhuha.

¹⁸Nimba nindakhabool'la omundu omubi wosi mbu, alafwa ne nawe nobula okhumuchetsiyia mbu alekhe tsinjila tsitsie tsiobubi khe ahonie obulamu bubwe, omundu mubi uyo alafwila mububi bubwe; nebutswa ndakhakhubanze ibe khulwo khufwa khukhwe.

¹⁹Nebutswa noba nochetsiyia omundu mubi, ne narasukhana okhurula khunjila tsisie etsiobubi alafwila mububi bubwe, nebutswa ibe olaba niwehoniisie obulamu bubwo.

²⁰“Khandi nikaba omundu omulunji asukhana okhurula khubulunji nakhola obubi, nase nimura muliiba libibiibi alafwa, noba noramuchetsiyia. Alafwa khulwe tsimbi tsitsie ne sindakhetsul'la obulunji bubwe obwa yakhaba niyakhola tawe; nebutswa ndakhakhubanze ibe khulwo khufwa khukhwe.

²¹Ne noba niwakhachetsiyia omundu omulunji mbu alekhe, okhukhola tsimbi naye nahulila ma nalekha tsimbi tsitsie, siahene alaba mwoyo, ne nawe olaba nohonisie obulamu bubwo.”

²²Ndahul'la obunyali bwokhubaho khwo MWAMI nibuli khu ise ma nimbul'la niyambool'langa mbu: “Rula otsie mwibanda ne nan'nomeyo n'nawe.”

²³Kho ndamala ninzia mwibanda ne ebwene iyo ndalola oluyali lwo MWAMI singa olwa ndali okhulola hamuchela kwa Kebari. Ndamala ngwe hasi mafung'ama,

²⁴nebutswa Omwoyo wa Nyasaye yenjila mu ise, ma niyasinjisia. OMWAMI nal'loma n'nase niyambool'la mbu, “Tsia ingo, ma weyikal'le munyumba yiyo.

²⁵Ne ibe, E omwana womundu, nobohwe khumikoye, ma khulwako sinonyale okhutsia esioba habulafu tawe.

²⁶Nakhole ol'limi lulwo okhuhanda musilakhula siomunwa kukwo, ma mbwo olaba limuma noranyala okhubakondokhela tawe, sichila nabandu beinduli.

²⁷Nebutswa nyinga nan'nome n'nawe, ma nanzikule omunwa kukwo, ne nawe nobabool'le, ake ise OMWAMI Nyasaye mboolanga. Abalala khubo nabahulile nebutswa abandi nabamaayie amang'ana kaako sichila bo nabandu beinduli.”